Tumri Nittèerra ây 2

1Unji daprum yey înin Pentikosta ye kpèrre, aw pî aw kimjige a gin tikpolo. 2Kòsòng jàk dûurra de ana kà hiski ɓèl a faktiturum, lege a àay, mûuye a gin tâan gi pî. 3De rabin rèeng ây aw ɗòlnjige kà rèeng ebi, citɗa dawrre. De tâa a hak waw kpolo kpolo pî. 4Tinîir waw pî mûu ni Jungci Delliya. Aw ɗaa yèerra ni yèk kana 'nang 'nang, kà yey hîi daw Jungci Delliya aw yèeni gi. 5A ni-Yude ây tâage a Yerusalem, anga nà mgban a riiy ây pî, aw nit tolla Fay ɗi. 6Ye ragin dûurra maan, de dàaran pî aw kimji a gin tikpolo. De kpul daw jungci isi, koo wuna rakɗe yèk wàa, ngam a nit goosum ây aw yèenjirre koo ni yèk riiy hâ. 7De naa daw hay de tâa daw 'nang, de gàan: A nit yèerra ây gi aw tâa ni-Galile ây ba yi? 8Kà kà rakna orro pî yèerra yèk yey koo wuna kà yèk riiy wàa ya? 9Orro ot ni-Partiya ây, ni-Mediya ây, ni-Elamiya ây, ni nit ây tâage a Mesopotamiya, ni Yude, ni Kapadokiya, ni Pontus, ni Asiya, 10ni Firigiya, ni Pamfiliya, ni Ejip, ni ngirra Libiya tâage gaarra a Kirene, ni nit ây anga a Roma. 11Dorro aw kpàana a tîim ni-Yude ây, a nit ây kana aw futɗe hàar ni-Yude ây, ni ni-Kereta ây ɗa, ni ni-Arab ây. Orro pî ot rakɗe, aw yèerre ni yèk worro 'nang 'nang yèk tèem Fay 'mirre gi. 12De naa daw hay dèy, ha aw cèngni jày gaw dàn ba. De gàanjin a tîim waw: Ji mbirge kà yey gi ya? 13A nit ây kana de wâskin daw de gàan: Mbàl ràmgi daw! 14Piyèr de ane ni nit ây tèe daw Yeesu ra sàm kpolo. De ɗaa yèerra ɓàng da mûsa nit ây, de gàa daw: Un ni-Yude ây, ni un pî tâage a Yerusalem, raksin yèk yey, iin tuy a yèk mum! 15A nit ây gi mbàl ti ràmi dawrre kà yey dànnu ba, ngam unji ɗà ti naa ba. 16Amma jàk yey dii kà yey gàa nà Joyel nit lònum yèk Fay. 17Fay gàaye: Jàk yey tâa ge tâa a mgbàr gbèeni. Hîi gim hîi Jungci mum e yeski a gin nit ây pî. A hàm ta wun, a hàm nihun ây ni hàm nikin ây, kpàa gaw kpàa lònum jày ge mbir a ɗàm kpeesi gi. A lor ta wun ra gaw rap jày ni jungci waw. Ndaram à ge ày da nit wàrfi ây. 18Mgbàr maan hîi gim hîi Jungci mum koo a gin sàay rra mum, da nihun ây ni nikin ây. Lò gaw lòni jày ge mbir a ɗàm kpeesi gi. 19Lò gim lòni kayeefi 'nang 'nang a faktiturum, ni kàlnum jàk ây a deesi: njîim, ni ebi, ni tufki ɓèl. 20Unji i ge ir kulpi, corri ngaa kà njîim, ɗoko unji Nitcoorra e dàara gi, unji ɓèl ni 'mita. 21Tâa ge tâa koo wun 'naase nîir Nitcoorra, kpàa ge kpàa saarra. 22Piyèr de gàasirra bak: Un ni-Israyel ây, raksin yèk yey: Fay lòni dunge seedamku a gin Yeesu ni-Nasaret, ni mbinum tèem 'nang 'nang, ni kayeefi ây, ni kàlnum jàk ây. Hû go mbire Fay a gin wàa, a tîim wun, kà yey cèngnunu gi. 23A gin wàa Fay gbèesige dànda wàa ni cata, woo dunge nit yey. Un un gbalu a minjum kpiiri, un ɓàruge ni kàn nit ây èege yèk Fay. 24Amma Fay gûysuge, yuunu a 'màar wurra, ngam ta ti gesu wurra e mòow ba. 25Dawda gàa a hak wàa kà yey: Mi rapɗe Nitcoorra a ɗàm kpees mum koo ningàa, ey tâarre a riina mum, ngam ta mi mal ba. 26Yòo jày kâwse tinîir mum dèy. Mîrngi mum ngaa iirre tijaga. Is mum ɗa wu ge wuysi a loca ni dànda jàk mbâri. 27Ngam muy gum woo jungci mum a gin tâam nit ây wutke gi ba. Hîi gum hîi orri di nit della wey, ta e raa a wurra wàa ba. 28Muy mu kàlnim ot gûyrra. Mûu gi mûunim tinîir mum kâwrriya a ɗàm kpees wey. 29Piyèr de gàasirra bak: Un kor ta mum, mi gerre mi yèenu tolnji cen a yèk Dawda wosom gi. Ey wurre aw siptuge, geb wàa dii ha niyey a tîim worro. 30Ey tâage nà nit lònum yèk Fay, cèngnige Fay hàawrrage ni tihàani, ii ge ii nirri kpolo a yòot wàa, e tâa a gbaat wûun wàa. 31Dawda rabe nà mgban a ɗàm kpeesi. De yèe yèk gûysum Kristu, de gàa: Fay ti woow a gin tâam nit ây wutke gi ba. Is wàa ngaa ti raa ba. 32Fay gûysuge di Yeesu gi. Orro pî ot nit seedum ây ɗi a yèk yey. 33Ye naase a riina Fay, kpàa a gin Too wàa Jungci Delliya yey gàa nà ge hîiw gi. Jungci maan de citna kà yey raknu, rapnu ɗa. 34Dawda ey ti naasi a faktiturum ba, amma gàaye: Tooy Ɓèl gàa di Nitcoorra mum: Tâa a cewci riina mum, 35ha mi ii nit yiir ta wey gin nafta nak wey! 36Hû go ndika ni-Israyel ây pî aw cèngni takundi ɗi, Yeesu yey gbalu un a minjum kpiiri, Fay iiwe Nitcoorra, iiwe ɗa Kristu. 37A ye ragin yèk yey, de 'nun daw tinîiri kpòt. De gunuwan di Piyèr ni nit ây kana tèe daw Yeesu gi: Un kor ta worro, kà got mbir ya? 38Piyèr de gàa daw: Inin tinîir wun, koo wuna e ngor baptisma ni nîir Yeesu Kristu, ngam ha jàk maarra wàa e tâa yaafumya, ha Fay e hîinu Jungci Delliya! 39Ngam yèk mòonjum kàn ni Fay diinu ni hàm ta wun, ni nit ây tâage kpâarriya. Fay Tooy Ɓèl 'naa ge 'naasi daw. 40Piyèr de mgbèng daw dèy ni yèy 'nang 'nang, de gàa daw: Yuunsin hak wun a yòot nit rèeng ây gi! 41A nit ây mûsi jày aw goosi yèk Piyèr, aw ngore baptisma. A unji maan aw iisirra nit ây ujinè taan. 42Aw pî aw futɗe a kàlnjum yèk nit ây tèe daw Yeesu. Aw futɗe ɗa a kûngda tàarri, ni waarra Fay. Aw pî aw 'mèmsi ni tinîiri kpolo. 43Tolnji Fay mòo da nit ây pî. A nit ây tèe daw Yeesu gi aw tèerre kayeefi ây ni kàlnum jàk ây dèy. 44A nit ây pî goosu di Fay aw tâanjirre mbâra, aw 'mèmsi jàk ta waw pî a gin kpolo. 45Aw sàangi hèmna waw, ni àay, ni jày tâagi daw gi. Aw mîinji a tîim waw, koo wuna a gayam wàa. 46Unji pî aw mòorre kimjum a àay Fay ni tinîiri kpolo. Aw kûngde tàarri, aw riinjirre a àay rra waw ni kâwrum, ni ɗotkum tinîiri. 47Aw 'misirre nîir Fay. A nit ây pî aw yiɗi dawrre. Koo ningàa Nitcoorra iisirra dawrre nit goosum ây a 'mèmsum waw.

will be added

X\