Tumri Nittèerra ây 19

1Apollos ye tâa a Korintu gi, Pawlu dige a Efesu ot gbòosi. De kpàa nit futa ây kana a farra. 2De gun daw: A ye goosunu di Fay gi, un kpàa Jungci Delliya yi? De gàawan: Oow, ot haa rakta jày tâage go Jungci Delliya gi ba. 3Pawlu de gun daw: Baptisma hâ kpàanu ya? De gàan: Baptisma Yuhanna. 4De gàa daw: Yuhanna ii baptisma da nit ây ini tinîir waw, kàl dawge aw goosu di nit yey ge dàara a dat wàa, nit maan Yeesu ɗi. 5Ye ragin kà yey, de ngorin baptisma ni nîir Yeesu Nitcoorra. 6Pawlu de iirra daw kàn. Jungci Delliya de cirra a gin waw. De lònin yèy, de yèen ni yèk ni-riiy ây 'nang 'nang. 7A nit ây maan aw tâa jày ge ii ra sàm cuk. 8Pawlu de lege a àay gin kimjum, sak dawrre yèy tolnji cen corri taan, cèngnini dawrre jày tâage wûun Fay. 9Amma a nit ây kana aw dii ni tinîir ndèktiya, de hàwin goosum, de maasin ot Nitcoorra a ɗàm kpees nit ây. Pawlu de woo daw, de ɗòle nit futa ây aw tâanji ni ey, sak dawrre yèk Fay unji pî a àay Tiranu. 10Futɗe mbita kà yey yeri cuk, ha a nit ây a dees Asiya lang aw rage yèk Nitcoorra. Aw a ni-Yude ây ɗi, ni ni-riiy ây kana. 11Fay tèe jày tâa nirri ti haa rapta ba ni kàn Pawlu, 12ha de arrin tipini dòorròm, koo lurra yey mâagirra a is wàa, de 'maaran da nit àyci ây, ha aw ndòosi. A tindòom makta ây ngaa aw yuu a gin nit ây. 13A ni-Yude ây kana gîtnji a riiy 'nang 'nang, aw yuuni tindòom ây da nit ây, aw dii a farra. De haawan 'naasum nîir Yeesu Nitcoorra a gin nit tindòom ây, de gàan: Mi gàamde ni nîir Yeesu yey sakre Pawlu gi, yuu! 14A lor ây jòròs mbire kà yey, aw tâa lor ta Sikewa ni-Yude, nit ɓèl daprum. 15Amma tindòom kana de gàa daw: Yeesu ni Pawlu mi cèngni dawge, amma un un wun ɗi ya? 16Nit yey tâage ni jungci tindòom nà de anda daw, de sun daw de riisi daw 'màari, ha de 'nòon a àay nit maan isi kpong, ni nuki ây. 17A ni-Yude ây, ni ni-riiy ây kana tâage a Efesu ye ragin jàk yey mbirge gi, tolnji de mòo daw pî, de 'misin nîir Yeesu Nitcoorra. 18Mûsa nit ây de goosuwan, de dàaran aw kàl tèem jàk maarra waw. 19A nit ây dèy iirre nà hiila, de 'maaran defterre ta waw, aw aksifa ni ebi a ɗàm kpees nit ây pî. A nit ây kana de sagin seede defterre ây maan, de kpàawan jày ge ii seede sarrdi ujinè ra kèrèw. 20Hû go yèk Nitcoorra 'mirre, dikɗe ɗàm kpeesi ni mbinum, ni kpèw kpèw. 21A dat gbèerra jàk yey Pawlu dàne a tinîir wàa, e hòm a dees Makedoniya ni Akaya, e dik a Yerusalem. De gàa: A dat ye gim dik a farra, sey mi kpèt ɗa a Roma. 22De tèefa da nit tèenjum ta wàa cuk, Timote ni Erastu, a dees Makedoniya. Amma ey de tâasirra bak a dees Asiya unji càa. 23Mgbàr maan yèy ane dèy ngam ot Yeesu. 24Nit kana dii a Efesu, nîir wàa Demetiyu, dòosirre hàm àay mâr Artemis ni sarrdi. Tèem maan 'maara dawrre bèebi dèy da nit dòosum sarrdi ây kana. 25De kimji daw da nit ây pî tèege tèem maan, ni nit mòonjum ta waw, de gàa daw: Kor ta mum, ni tèem yey kpàanina bèebi! 26Un rapɗe, un rakɗe ɗa, kày ndòorgirre Pawlu da nit ây dèy, e ini daw a ot wàa, a Efesu ɗi gbè ba, amma ngasɗa càa a Asiya pî, gàarre jàk mbangsum ni kàn ti tâa Fak takundi ba. 27Hû go ti tâa tèem worro mboyse gbè ba, amma àay gin coorra mâr Artemis ko ge koyrra jàk ɓa hû go. 'Mita mâr yey coon a Asiya ni deesi lang gbee ge gbee. 28Ye ragin kà yey, a nit ây de mûun ni ngòlòm. De bimin de gàan: Artemis ni-Efesu ây mâr ɓèl ɗi! 29Anda yèk yey yeski a riiy maan pî. Aw gîtnjirre. Ye mòon Gayu ni Aristarku, a ni-Makedoniya ây ɗi diknji nà ni Pawlu, a nit ây pî de 'nòon ni aw a àay gin yûurra yûma. 30Pawlu ngaa yiɗi ngin e lek a farra, amma a nit futa ta Yeesu de njangguwan. 31A nit ɓèl ây kana a tîim ni-Asiya ây, soob ta wàa di Pawlu, de tèefan yèy de gàawan, ta e dik a gin yûurra yûma ba. 32Tâa daw dàpràràp da nit ây kimje a farra. A nit ây kana de bimin aw gàa hûy, a nit ây kana ngaa aw gàa 'nang. Hû go a nit ây dèy aw cèngni jày kimjin gi ba. 33A ni-Yude ây de gàawan di Aleksanda e yèe yèy, de hòmnuwan a ɗàm kpeesi. Ey de parre kàn, yiɗi e yèe yèy ngam hak ni-Yude ây. 34Mûsa nit ây ye cèngsuwan ey ni-Yude ɗi, de 'mèmsin gûn kpolo, de bimin ha jày ge ii njamdi cuk, de gàan: Artemis ni-Efesu ây mâr ɓèl ɗi! 35Nit kèta yèk wûun a riiy maan de rûusi daw da nit ây, de gàa: Un ni-Efesu ây, wun tâa ti cèngni, riiy Efesu ey faage àay gin coorra mâr Artemis ni 'mita wàa cirga a faktiturum ba ya? 36To tâa go kà yey, nirri ge kpàaw hàanjum ba, gesi ngin un tâa baak baak, ta un mbir koo jâ ni râmjum gi ba. 37Un 'maara daw da nit ây gi, amma aw aw tâa nit mboysum àay mâri, koo nit maasum jàk coorra worro ba. 38To yèk kiita diiw go di Demetiyu ni nit tèenjum ta wàa, unji kiita dàa ge dàara. A nit hiitum ây ɗa aw tâaye, ha aw yèe daw yèk kiita waw. 39To un tâa go ni yèk kana bak, raknjin yèk maan a ye gun kimji ni nit ɓèl ta wun. 40Ngam yèk yey ange unji yey, gerre ha ot kpàa kiita a hak worro. To nirri gunna go a anda yèk yey, got kpàaw sakta ngam jâ mbitna kà yey ba. 41A dat yèerra kà yey, de woo daw da nit ây aw koyi.

will be added

X\