Tumri Nittèerra ây 17

1Ye hòmin a Amfipolis ni Apolloni, de kpèrrin a Tessaloniki. Aay gin kimjum ni-Yude ây dii a farra. 2Kà rûurra wàa Pawlu de lege a àay gin kimjum. Unji wuysum ây taan de yèenjin a yèk defterre Fay ni ni-Yude ây. 3De lòni daw yèk Kristu, dàarage e rii 'màari, e gûysi a wurra. De gàa daw: Yeesu yey saknim dun gi, Kristu ɗi. 4A nit ây kana a tîim waw aw ngore, aw 'mèmsi ni Pawlu ni Silas. Hû go mûsa ni-Girèk ây cooge Fay, ni nikin ɓèl ây dèy aw ngore yèk yey. 5A ni-Yude ây de iin ngèeri, de arrin tigîtnjum ây maktiya, de 'mèmsin ni aw, de yûusin da mûsa nit ây, ha de anin ɗàari a riiy maan pî. De digin aw mgbaa àay Yason, ngam aw kàm Pawlu ni Silas, aw yuuna daw a gin nit ây. 6Ye tâa aw kpàa ba, de nàrran Yason ni kor goosum ây kana a gin nit tiɗàm kpees ây a riiy maan. De bimin de gàan: A nit ây gi a nit yûuskum kparri ɗi lang. E rri yey aw dàara ay gi ɗa. 7Yason ngot dawge a àay wàa. Aw pî aw yewe yèk mgbèngda Kaysara wûun ɓèl. Aw gàa, wûun kana dii, aw înurre Yeesu. 8A yèk yey kpul daw jungci isi da mûsa nit ây, ni nit ɓèl ây a riiy maan. 9De ndaguwan di Yason ni nit ây kana, aw jing seede ha aw woo daw. 10Ni tuma maan a kor goosum ây de arrin Pawlu ni Silas, de gàan daw aw tay a Bereya. Ye kpèrrin a farra, de legin a àay gin kimjum ni-Yude ây. 11A ni-Bereya ây gi aw hòm daw ni della tinîiri da ni-Tessaloniki ây. De ngorin yèk Fay ni yiide mbâra. Aw janggirre a defterre Fay unji pî, ngam cèngnum jày gàa Pawlu takundi ɗi go. 12Hû go a nit ây dèy a tîim waw aw goosige, aw dii ni-Girèk ây, ni nikin ɓèl ây, ni nihun ây dèy. 13A ni-Yude ây a Tessaloniki ye ragin, Pawlu sage yèk Fay a Bereya ɗa, de dàaran a farra aw yûusi da mûsa nit ây ni anda yèy. 14A kor goosum ây de tèewan di Pawlu yaale, e dik a sòo ɓèl. Amma Silas ni Timote de tâan a Bereya. 15A nit isnum ây di Pawlu de 'maawan ha Atena. De iran ni yèk yey gàarra daw Pawlu, aw kàl di Silas ni Timote, ha aw furrufa a Atena digèrrige. 16Pawlu de waa daw a Atena. Ye rabe riiy maan mûu ni àay mâr ây dèy gi, de ngòlu a tinîir wàa. 17De yèenjirre ni ni-Yude ây, ni nit ây cooge Fay a àay gin kimjum. Yèenjirre ɗa unji pî, koo ni wun kpàanji ni ey a luumu. 18A nit kàlnjum ây kana futke ot ni-Epikuriya ây ni ot ni-Sitoki ây ɗa, de anin yèy ni ey. A nit ây kana a tîim waw de gàan: Jàk ji yiɗi yèerra tigbaarkum yèy gi ya? A nit ây kana ngaa de gàan: Nit yey tâa mu gàa nit kàlnjum yèk mâr ni-riiy ây kana. Aw yèe kà yey, ngam Pawlu sak dawge yèk Yeesu, ni gûysum wàa a wurra. 19De arruwan aw naanu a Areyopag a gin yey kimjin nit raknjum ây, de gàawan: Kpàa got kpàa rakta yèk kàlnjum fûuya yi? 20Ngam mu 'maara yèy a tuk worro, tâa ot haa rakta ba. Ot yiɗi ot cèngni yèk yey jày yiɗi go gàarra gi. 21A ni-Atena ây pî ni ni-wooy ây a tîim waw, yèk fûuya dii go aw yiɗi sakta koo rakta, gaw woofa tèerra tèem kana pî. 22Pawlu de ane e gòy a tîim waw a Areyopag, de gàa: Un ni-Atena ây, mi kpàanuge, un un nit coorra mâr ây ɗi dèy. 23Ye gîrmi a riiy yey, mi gobe a àay gin coorra wun 'nang 'nang, de kpàami àay gin hîirra hîiri dii ni kèta kà yey: Di Fak yey tâa ot cèngnu ba. Woy yey coonu un gi tâa un cèngni ba, dey saknim dun. 24Fak yey mbangse kparri ni jày tâage a farra pî, ey tâage wûun faktiturum ni deesi, ge tâa a àay jâarra ni kàn nirri ba. 25Ey cen ni gayam, ha nirri e tèewrra tèem koo jâ ba. Amma hîirre koo di wuna gûyrra ni tiyîngni, ni jày pî. 26Yòot nit ây a kparri pî aw ana a gin nirri kpolo mbangsu Fay gi, ha aw kupti deesi lang. Fay ngaa gòyni mgban mgbàr gbèeni jàk ây, ey mîinji daw da nit ây gin tâam waw koo u hâ. 27Mbire kà yey ha aw kàmuwa, mba gaw ragu go, gaw kpàaw go, ngam ti kpâa koo ni wuna a tîim worro ba. 28Ngam wàa gûyna, dikna, tâana. Kà yey yèe nà nirri kpolo a tîim nit ta wun mbangse yèy, gàa: Orro ngaa ot yòot Fay ɗi. 29Ngam orro ot yòot ta wàa ɗi, ti gesi ot dàn ey tâa kà mâr timbangsum ni kangeerri, koo sarrdi, koo gòoy ba. Ti tâa kà jàk tèerra ni mbinum, koo ni dànda nirri ba. 30Fay woofa sakta mgbàr èca cèngnum jày da nit ây, amma kòsòng kàl dawrre pî koo u hâ, aw lòni jàk maarra waw aw ini tinîir waw. 31Carre unji yey ge hiiti daw ɗèm da nit ây a deesi lang, ni kàn nit yey gòyni gi. Lònige seedamku da nit ây pî, ye gûysu di nit maan a wurra gi. 32Ye ragin Pawlu yèerre yèk gûysum a wurra, a nit ây kana de wâskuwan. A nit ây kana ngaa de gàan: Ot yiɗi ot raksumda mgbàr kana bak a yèk yey gi. 33Hû go de yuu a tîim waw de taye. 34Amma a nit ây kana aw 'mèmsi ni ey aw goosige. Aw dii Diyonis nit raknjum a Areyopag, ni nikin nîir wàa Damaris, ni nit ây kana ɗa.

will be added

X\