Tumri Nittèerra ây 16

1Aw dàarage a Derbe ni Listira. Pawlu de kpàaw di nit futa Yeesu a farra, nîir wàa Timote, nuu wàa sàni-Yude dii ni goosum di Fay, amma too wàa ni-Girèk ɗi. 2A kor goosum ây tâage a Listira ni Ikoniya aw yèerre mbâra a hak wàa. 3Pawlu yiɗi aw diknji ni ey. De arru, de rrèpnuwa yèk ni-Yude ây tâage a dees maan. Ngam aw pî aw cèngni, too wàa ni-Girèk ɗi. 4A ye hòmin a riiy ây 'nang 'nang, de hîin da nit futa ta Yeesu yèk mgbèngda yey kèrin a nit ây tèedaw Yeesu gi, ni toonji nit kimjum ây tâage a Yerusalem, ngam ha aw fut yèk maan. 5A nit kimjum ây aw iisirra kpèw kpèw a goosum waw. Unji pî aw iisirrarre mûurra. 6Ye tâa Jungci Delliya njanggi daw sakta yèk Fay a Asiya, de hòmin a dees Firigiya ni Galatiya. 7De hèeran a Misiya, de yiɗin aw dik a Bitiniya. Amma Jungci Yeesu ti hîi daw orri ba. 8De hòmin a cewci Misiya, de dàaran a Torowas. 9Ndaram de àyu di Pawlu ni tuma. Ni-Makedoniya gòyrre, de waawa de gàa: Dàara ay a Makedoniya, mu mgbaanjina! 10A dat ndaram maan de yiɗina ot yew a Makedoniya, ngam ot cèngni, Fay 'naasina ot sak daw Yèk Kâwrra a farra. 11Hû go de anna a Torowas, de dikna ni koombowal 'nâar a Samotaraki. Ni ndamji de kpètna a Neyapolis. 12A ye anna a farra, de tayna a Filippe. Riiy maan dii riiy màrra woy ɓèl a dees Makedoniya, gin titâam ni-Roma ây. De tâana a farra unji càa. 13Unji wuysum de yuuna a dat àay ây a taga sîirra. Ot dàne, a farra dii gin tiwaarra Fay da ni-Yude ây. De tâana ot yèe da nikin ây kimje a farra. 14Nikin kana dii a tîim waw coorre Fay, nîir wàa Lidiya anga a Tiyatira, kin tisàangum jàk joorra woy cal delliya. Ye rage yèk Pawlu, Nitcoorra de dàngsu tinîir wàa, ha e ii hakkilo a yèk maan. 15De kpàa baptisma ni nit àay rra wàa. De waana de gàa: To un dàn go mi ire nit goosum di Nitcoorra, cirin a àay mum un tâa a farra. De ndakna ha de lekna a àay wàa. 16Mgbàr kana ot dikɗe a gin waarra Fay, de kpàanjina ni sapri ti asrum sîwsi, dii ni tindòom makta, 'maara bèebi dèy da nit ta wàa ni sîwsi maan. 17De furru di Pawlu ni orro. De bimre e gàa: A nit ây gi aw dii nit tèerra tèem Fay hòmge pî, tâage a faktiturum, aw kàlnunu ot saarra! 18Mbire kà yey unji mûsi jày. De ngòlu di Pawlu, de dûre de gàaw di tindòom nà: Ni nîir Yeesu Kristu mi gàamde, yuu a gin wàa! Tindòom nà de yuu yaale. 19A nit ta wàa di sapri maan ye rabin, ot tikpàani bèeb waw gbeeye, de mòon Pawlu ni Silas, de nàrrin daw a luumu a ɗàm kpees wûun ây. 20De 'maan daw a gin nit hiitum ây de gàan: A ni-Yude ây gi aw yûuskirre da ni-riiy worro. 21Aw kàlnarre dot ni-Roma ây a hàar ây tâa ti gesi, ha ot ngor ot fut ba! 22A mûsa nit ây de 'mèmsin, de andan daw. A nit hiitum ây ngaa de ngasuwan lurra di Pawlu ni Silas, de gàan aw lèf daw ni timbii. 23Ye lèfin daw tilèfni dèy, de leknin daw a kultuma, de gàan di nit ɓèl a àay kultuma, e faa daw mbâra. 24Nit ɓèl nà ye rage kà yey, de lekni daw a àay kultuma woy tîim, de gbali daw nak waw a kpiiri. 25Ni tîim tuma Pawlu ni Silas de waan Fay, aw 'misu ni kâarra ndûu. A nit ây tâage a farra aw raksi dawrre. 26Yooge yooge deesi de yûu ni tigòyni àay kultuma pî. A tifantunum nin ây pî aw faarige, ti'mèmni nit ây pî patige. 27Nit ɓèl a àay kultuma ye mûye, de rabe nin ây pî aw faarige. De nduu ɓet ɓèl ha e ɓàsi hak wàa, ngam dàne a nit kultuma ây aw 'nòoye. 28Amma Pawlu de bime ɓàng de gàaw: Ta mu mbisi koo jâ di is wey ba! Ngam orro pî ot tâa ay gi. 29Nit ɓèl nà de 'naase aw 'maawra ebi, de 'nòo e lekfa a àay ni timalni. De yaa a ɗàm kpees Pawlu ni Silas. 30De yuuni daw a gbaa, de gun daw: Un nit coorra ây, ji gim mbir ha mi kpàa saanum jungci mum ya? 31De gàawan: Goosi di Yeesu Nitcoorra, saa gum saa muy ni nit àay rra wey. 32Aw saguge yèk Fay, ni nit ây pî tâage a àay wàa. 33Nit ɓèl nà de arre Pawlu ni Silas ni tuma maan, de kòl daw nuki waw. De iiwrran baptisma yaale ni nit ta wàa pî. 34De naani daw a àay wàa, de hîi daw tiriici, dii ni kâwum tinîiri ni nit àay rra wàa, ngam goosuge di Fay. 35Ndamji ye kayge, a nit hiitum ây de tèeran sooje ây de gàan: Woon daw da nit ây nà aw tayi! 36Nit ɓèl kultuma nà de kàlu yèk maan di Pawlu de gàa: A nit hiitum ây aw gàara mi woonu. Hû go yuun, un tay mbâra! 37Amma Pawlu de gàa da sooje ây: Aw lèfna a nis nit ây, cen iirra kiita, dorro ni-Roma ây, aw leknina a kultuma. Kòsòng aw woonarre ot tay ni fûucu yi? Ge tâa hû go ba, sey aw dàara ni hak waw aw yuunina! 38A sooje ây de digin aw sak yèk yey da nit hiitum ây. Aw ngaa aw tole ye ragin, a ni-Roma ây ɗi gi. 39De dàaran aw waa daw ni waacu. De yuunin daw de gàan, aw tay aw woofa riiy yey. 40Ye yuun a kultuma, de digin a àay Lidiya. De kpàanjin ni kor goosum ây, de mgbènggin daw aw gòy kpèw. De tayin.

will be added

X\