Tumri Nittèerra ây 14

1Pawlu ni Barnaba ye kpèrrin a Ikoniya, de legin bak a àay gin kimjum ni-Yude ây. De yèen yèk Fay. A ni-Yude ây ni yòot ni-riiy ây kana dèy de goosin. 2Amma a ni-Yude ây tâa aw goosi ba, de anin yèy a gin nit ây èege yèk Fay, de mboysin daw hakkilo, ha aw dàn maarriya a gin kor ây. 3Koo hû go Pawlu ni Barnaba aw tâa unji dèy a farra. Aw yèerre tolnji cen, ngam aw cèngnu di Nitcoorra. Ey kàlni mbâr wàa a yèk waw, hîi daw mbinum aw lòni jày ni kayeefi ây. 4A nit ây a riiy maan aw mîinji cuk. A nit ây kana aw 'mèmsi ni ni-Yude ây, a nit ây kana ngaa aw 'mèmsi ni nit ây tèe daw Yeesu. 5A nit ây èege yèk Fay, ni ni-Yude ây de raknjan ni nit ɓèl ta waw, aw ɗàa daw ɗàari da nit ây tèe daw Yeesu gi, ha aw còori daw ni gòoy. 6Pawlu ni Barnaba ye ragin yèk maan, de 'nòon a Listira ni Derbe, ni riiy ây kana tâage a dees Likawniya. 7De sagin Yèk Kâwrra a farra. 8Nirri dii a Listira, nit wuta nay diga himni nuu wàa, ti haa dikta dikri ba. 9De rage jày yèe Pawlu. Pawlu ngaa de gobu teng teng, de rabu dii ni goosum ha àyci wàa e ndòo. 10De yèe ɓàng, de gàaw di nit àyci maan: An mu gòy sèna! De ane, de ɓure de gîre. 11Mûsa nit ây ye rabin jày tèe Pawlu gi, de bimin de gàan ni yèk riiy waw: A mâr ây aw dàarage, aw rèenji ni nirri. 12De 'naasuwan di Barnaba Jewus, Pawlu ngaa Hermes, ngam ey tâa nit tiɗàm kpeesi a yèerra yèy. 13Nit daprum a àay Jewus, àay mâr maan dii a lekni riiy, de 'maara gus ây ni bista jày, e ii a nin riiy maan. Yiɗi ni nit ây pî aw gûu daw gusi da nit ây tèe daw Yeesu cuk gi. 14Amma Pawlu ni Barnaba ye ragin kà yey, de ngòli daw de ngasin lurra waw, de 'nòon aw lek a tîim nit ây. 15De bimin de gàan: Un nit ây, ji mbitnu kà yey gi ya? Orro ngaa ot nit ây ɗi kà un! Ot kàl dunde Yèk Kâwrra ngam un woofa jàk ɓa hû go, ha un ir a gin Fak beengiya. Ey mbangse faktiturum, ni deesi, ni càng sòo ni jày tâage a farra pî. 16Mgbàr kana Fay woo daw da nit ây a èca yèk wàa, aw fut ot waw. 17Amma koo hû go ti woofa seedum hak wàa ni tèerra jàk mbâri ba. Ey hîinu jày diga faktiturum, buun, ni yer oca, ni tiriici dèy, kâwsi dunge tinîiri. 18A nit ây kèle ngin gûucu gus ây maan, amma Pawlu ni Barnaba aw njang dawge ni yèerra kà yey. 19A ni-Yude ây anga a Antakiya ni Ikoniya, de dàaran aw rûfi mûsa nit ây, ha de aaruwan di Pawlu ni gòok ây. De nàrruwan a dat àay ây, ngam aw dàne ey wurre. 20Amma a nit futa ta Yeesu ye dàan aw mgbaaw gi, Pawlu de ane, de leksi a riiy maan. Ni ndamji de taynjin ni Barnaba a Derbe. 21Ye sagin Yèk Kâwrra a riiy maan, de iin nit futa ta Yeesu dèy. A dat maan de irin a Listira, ni Antakiya a dees Pisidiya. 22De iisirran kpèwsum tinîiri da nit futa ta Yeesu. De mgbènggin daw aw mòo a goosum, de gàan daw: Sey ni riirra 'màari dèy got lek a wûun Fay. 23De carrin nit ây, aw ii daw toonji nit kimjum ây a riiy 'nang 'nang. De waarran daw Fay, de coon riirra tiriici. De woon daw aw tâa a kàn Nitcoorra yey goosuwan gi. 24Pawlu ni Barnaba de hòmin a dees Pisidiya, de digin a dees Pamfiliya. 25A dat ye yèen yèk Fay a Perge, de cirin a Attaliya. 26A farra de legin a koombowal, aw dik a Antakiya. A riiy maan aw woo daw nà mgban aw dik ni mbâr Fay, ngam aw tèe a tèem yey gbèesan gi. 27Ye kpèrran gi, de kimjin nit futa ta Yeesu, de sagin daw jày pî tèenji Fay ni aw, kày faari Fay orri da nit èca yèk wàa, ha aw ngaa aw goosi. 28Aw tâanji ni nit futa ta Yeesu unji mûsi jày a farra.

will be added

X\