Tumri Nittèerra ây 10

1Nit kana dii a Kaysariya nîir wàa Korneliyu, nit ɓèl waw da sooje ây temèrre, aw 'naasi dawrre ni-Italiya ây. 2Ey nit coorra ɗi, tolle Fay ni nit àay rra wàa pî, hîirre hîiri dèy da nit ây, waarre Fay koo ningàa. 3Mgbàr kana unji mbona de rabe jày ni ndaram. Malayka Fay lekfarre a gin wàa, gàawrre: Korneliyu! 4De gobu di malayka ni tolnji, de gunu: Ji mbirge ya, Nitcoorra? Malayka de gàaw: Waarum wey ni hîir ta wey kpèrre a ɗàm kpees Fay, de ɓaysum. 5Tèe nit ây a Yoppe a gin Simon înuwan Piyèr, aw gàaw e dàara. 6Nit maan dii a àay Simon nit munda kûu, gaarra a sòo ɓèl. 7Malayka yèegurra gi ye taye, Korneliyu de 'naase a tîim nit ta wàa lor ây cuk, ni sooje kpolo tolge Fay. 8De kàl daw jày pî mbirge gi, de tèe daw a Yoppe. 9Unji kana a nit ta Korneliyu ye hèeran a Yoppe, Piyèr naaye a fak àay e waa Fay. Unji kpèrre a tîim hay. 10Fey àyuge, yiɗi riirra tiriici. Ye tâa aw dòorarre a àay, de rabe jày ni ndaram. 11Faktiturum faarige. Jày kà godo ɓèl cirarre a deesi ni mòocu a cewci naan. 12A jàk ây pî tâage ni nay naan, ni jòoy ây, ni jooy ây pî aw dii a farra. 13De rage gûn gàawrre: Piyèr, an mu gûu mu rii! 14Amma Piyèr de gàa: Oow, Nitcoorra, ngam mi haa riirra jày pî tâage maktiya, ni joot yey coon a ni-Yude ây gi ba. 15Gûn de gàasurra bak: Jày delse Fay, ta mu raptu kà jàk makta ba. 16Jàk yey mbire hû go nak taan. A dat maan godo ɓèl nà ni jàk ây pî tâage a farra, de naase a faktiturum. 17Piyèr de dàni a jàk yey rabe gi, ɗaa e cèngni jày yiɗi gàarra ba. E rri yey a nit ây tèera Korneliyu gi aw kpèrra a gbaa, aw gunde àay Simon nit munda kûu. 18De 'naasin aw gun, to ay tâa go Simon înu wan Piyèr gi. 19Piyèr dànde bak a jàk yey rabe nà. Jungci Delliya de gàaw: E rri yey a nit ây taan aw kàmumde a gbaa. 20An mu cir, mu diknji ni aw, ta mu hàanji ba. Ngam miy tèega daw. 21Piyèr de cira a gin nit ây maan, de gàa daw: Miy tâage nit yey kàmnu gi. Yèk ji dàara un ya? 22De goosin de gàan: Korneliyu tèega dorro, nit ɓèl sooje ây, nit ɗèm ɗi, tolle Fay, a ni-Yude ây pî aw yèerre mbâra a hak wàa. Malayka Fay gàawe, e 'naasum mu difa a àay wàa, ha e rak yèy a gin wey. 23Piyèr de lekni daw a àay, e hîi daw gin kûurra. Ni ndamji de taynjin ni aw, ni kor goosum ây kana tâage a Yoppe gi. 24Ndamji yey go de kpèrrin a Kaysariya. Korneliyu waa dawrre, 'naasa nit gbaa rra wàa ni soob ta wàa aw kimji a àay. 25Piyèr ye hèera, Korneliyu de kûunjufa aw kpàanji a orri. De gbâyge e coowa. 26Amma Piyèr de aanju de gàaw: An mu gòyi, ngam miy mi nirri ɗi ɗa kà muy. 27Ye yèenjin yèy ni Korneliyu, de lege a àay, de kpàa nit ây dèy aw dii a farra. 28De ɗaa yèerra yèy de gàa daw: Un cèngnige, orri cen di ni-Yude e 'mèmsi ni ni-riiy kana, ha e lek a àay wàa ba. Amma Fay kàlnimge, ta mi gàa koo di wuna ey nit makta ɗi ba. 29Hû go mi dàarage a gin wun, mi tòora ba. Mi gunnurre: Ngam jâ 'naasim un ya? 30Korneliyu de goosi de gàaw: Unji naan ɗi niyey, unji mbona kà yey gi, mi waarre Fay a àay mum. E rri yey nirri gòye a ɗàm kpees mum ni lurra di el di el. 31De gàam: Korneliyu, Fay rage waarum wey, ɓaysi hîirra hîir ta wey ngam wàa. 32Tèe a Yoppe, aw 'naasa Simon înuwan Piyèr e dàara. Ey dii a àay Simon nit munda kûu, gaarra a sòo ɓèl. 33Kà yey de kîrimfa tèerra a gin wey, mu mbire mbâra ye dàama gi. Orro pî ot tâarre a ɗàm kpees Fay, ha mu kàlna jày lang gàam Fay gi. 34Piyèr de sage yèy de gàa: Kà yey mi cèngni takundi, Fay ti rapti nis nit ây 'nang 'nang ba. 35Amma koo a riiy hâ, nirri tolu go di Fay, tèe go jàk mbâri, ey kâwguwa. 36Un cèngni yèk yey Fay tèega da ni-Israyel ây, hîi daw Yèk Kâwrra ni raknjum a gin Yeesu Kristu. Yeesu tâage Nitcoorra da nit ây pî. 37Un rage jày pî mbirge a dees Yude. Ɗaage a Galile ni iirra baptisma, yey sage Yuhanna a yèerra yèk wàa. 38Fay mbârsu di Yeesu ni-Nasaret ni Jungci Delliya, ni mbinum. Ey gîre koo u hâ e mbir jàk mbâri, e ndòosi da nit ây pî riisi daw Seyɗan 'màari, ngam Fay tâanjirre ni ey. 39Orro ot nit seedum ây ɗi a jàk yey pî mbirge a dees Yude ni Yerusalem. Aw ɓàruge di Yeesu ni gbalcu a minjum kpiiri. 40Amma unji taanti Fay gûysuge, hîiwe mbinum e lòni hak wàa. 41Ti lòt mgbàr maan a gin nit ây pî ba, amma a gin nit seedum ây carri nà Fay mgban, orro ot nit ây riinje, njoonje ni ey a dat gûysum wàa a wurra. 42Gàana ot sak da nit ây ot kàl daw, nge Fay iiwe dey nit hiitum da nit beengiya ây ni nit wutiya ây. 43A nit ây lòni nà yèk Fay aw seedurre, nge koo wun goosu go, kpàa ge kpàa yaafum jàk maarra wàa ni nîir Yeesu. 44Piyèr ye yèe bak, Jungci Delliya de cira a gin nit ây pî rake yèk wàa. 45A nit goosum ây a yòot ni-Yude ây dàaga ni Piyèr de tâa daw 'nang, ngam Fay hîi Jungci Delliya da nit ây èege yèk wàa. 46Ngam aw rage ɗa, a nit ây maan yèerre ni yèk kana 'nang 'nang, aw 'misirre nîir Fay. Piyèr de gàa: 47Nirri ge èeni daw iirra baptisma da nit ây gi yi? Ngam aw aw kpàa Jungci Delliya kà yey kpàan nà orro. 48De gàa daw aw ngor baptisma ni nîir Yeesu Kristu. De ngorin. De waawan e tâanji ni aw unji càa.

will be added

X\