Tumri Nittèerra ây 1

1Tewfil, nit mbâr mum, mi kère nà a defterre mum woy màrra jày mbire Yeesu ni jày kàlnje pî, diga ɗaarra, 2ha a unji yey Fay naansu a faktiturum. Ɗoko e naasi, de kàl daw jày ni mbinum Jungci Delliya da nit ây carre aw tâa kà nit tèerra ta wàa gi. 3A dat wurra wàa ey lòtɗa dawge gûysige, ni kàlnum 'nang 'nang. Unji ra naan lòtɗa dawrre, yèe dawrre yèk wûun Fay. 4Mgbàr kana aw riinjirre ni ey, de gàa daw: Ta un hèesi a Yerusalem ba, amma waan jày gàa dun Tooy Ɓèl, kà yey raknu nà mgban. 5Ngam Yuhanna iirra dun nà baptisma ni sòo gbè, amma a dat unji càa kpàa gun kpàa baptisma ni Jungci Delliya. 6A ye kimjin ni Yeesu de gunuwan: Nitcoorra, mgbàr yey gum hîisi wûun da ni-Israyel ây yi? 7Yeesu de goosi de gàa daw: Ti tâa un ha un cèngni mgbàr maan ni unji maan ba. Sey Tooy Ɓèl iige ni mbinum wàa. 8Amma un kpàa gun kpàa mbinum mgbàr yey ge dàara Jungci Delliya a gin wun. Tâa gun tâa nit seedum ta mum a Yerusalem, ni dees Yude pî, ni Samariya ha a gbèeni deesi lang. 9A ye gàa daw kà yey, de naase a faktiturum a nis waw. Titurum de arruwa ha aw rapsurra ba. 10Aw toolirre u faktiturum a gin taye gi. E rri yey a nit ây cuk aw mgbapɗe lurra burriya, aw gòyrre a gin waw. 11A nit ây nà cuk gi de gàan: Un ni-Galile ây, ngam jâ un gòyrre ti, un toolirre nis wun u faktiturum ya? Yeesu gi naase a faktiturum, woo dunge, i ge isa kà yey rapnu tayrre a faktiturum gi. 12A lor ta Yeesu de anan a gopri korrom, de koyran a Yerusalem. Gopri maan dii gaarra a Yerusalem, kilomèeta kpolo. 13A ye kpèsin a farra, de naan a àay tinjoknjum u fay a gin tâam waw. Aw tâa Piyèr, ni Yuhanna, ni Yakuba, ni Andere, ni Filip, ni Toma, ni Bartolomi, ni Matta, ni Yakuba hàm Alfa, ni Simon nit yiɗum dees wàa, ni Yuda hàm Yakuba. 14Aw waarre Fay ni raknjum koo ningàa. Aw kimjirre ni nikin ây, ni Mariya nuu wàa di Yeesu, ni kaa rra wàa di Yeesu ɗa. 15Unji kana a kor goosum ây aw kimjige a nit ây gaw kpèt temèrre kpolo ni ra cuk. Piyèr de ane de gàa: 16Un kor ta mum, jày gàa defterre Fay kpèrre, Jungci Delliya yèe nà mgban ni Dawda a hak Yuda, nge nit maan i ge ir nit tiɗàm kpeesi da nit mòorra Yeesu. 17Yuda dii nà a tîim worro. Ey ɗa kpàa nà tèenjum ni orro. 18Nit yey sàaye hèmna ni seede jàk maarra wàa, yey jingguwan gi. Yaaye ticip lingiya, himni wàa ɓarre, gbuurra wàa tuuye. 19A ni-Yerusalem pî aw rage yèk maan, ha de înuwan nîir hèmna nà Hakeldama, kà gàarra hèmna njîim. 20Yèk yey ɗa dii kètiya a defterre Ndûu, gàa: Nge àay wàa e ir âwa, nirri ge tâa a farra ba. Kètiya ɗi bak: Nge nit kana e at tèem wàa. 21- 22Kà yey sey nit kana e 'mèmsi ni orro, ngam e tâa nit seedum a yèk gûysum Yeesu Nitcoorra. Ey ndika e tâa nirri kpolo a tîim worro, a woy diknjina nà ni orro unji pî, a ye gîtna nà ni Yeesu Nitcoorra, diga Yuhanna ɗaa iirra baptisma ha mgbàr yey ane Yeesu a tîim worro, naase a faktiturum gi. 23De gòynin nit ây cuk, kpolo Yosef înuwan Barsaba 'naasuwan ɗa Yustu, nit cukti ngaa Mattiyas. 24De 'mèmsin pî aw waa Fay. De gàan: Nitcoorra, mu cèngni tinîir nit ây pî, kàlnina nirri carrum a tîim waw cuk gi, 25ngam e koyrra tâam Yuda ni nîir tèem wàa woy yey woofa Yuda, ha e dik a gin dikta wàa. 26De haan saasa a tîim waw ngam cèngnum. Mattiyas de yuu a saasa. Hû go aw sagu a tîim nit ây tèe daw Yeesu ra sàm kpolo, ha aw tâasi ra sàm cuk.

will be added

X\