2 Timote 4

1Mi hàamde a ɗàm kpees Fay, ni Yeesu Kristu nit yey ge hiiti daw da nit ây tâage beengiya ni nit ây wutke gi. Mi hàamde ɗa a dàarra wàa a kparri, ni wûun wàa: 2Sak yèk Fay, gòy a kàlla yèk maan koo a unji mbâra, koo a unji makta. Ni èfta tinîiri pî a kàlnjum mu lòni da nit ây jàk maarra waw, mu yèe daw mu mgbèng daw. 3Ngam unji dàa ge dàara, ha a nit ây gaw kpàaw èfta tinîiri a yèk kàlnjum takundi ba, amma ki gaw kimji nit kàlnjum ây dèy a gin waw kà yey yiɗin gi, ngam ha aw kâwsi daw tuk waw. 4Woo gaw woofa rakta yèk takundi gi, i gaw ini tuk waw a saga nit ây 'nang 'nang. 5Amma muy, tâa nit dànda tèes a jày pî, ngor riirra 'màari, tèe tèem sakta Yèk Kâwrra, fut tèerra mbâra a tèem yey hîim Fay gi. 6Unji hèerage, ha njîim mum e tuu kà hîiri a ɗàm kpees Fay, wurra mum tâa gaarra. 7Mi haaye gbàat mbâra, mi gbèesi 'nòorra 'nòor mum, mi gòye mbâra a goosum di Fay. 8Jày ngaske gi kòsòng, aw waanimde tikangni hay a gòyrra ɗèm, yey ge hîim Nitcoorra nit hiitum ɗèm a unji gbèeni gi, ge hîim dim gbè ba, amma ni nit ây pî waage ni yiide a dàarra wàa gi. 9Dàara kènu a gin mum, ta mu tòora ba! 10Ngam Demas woomfage, ye tâa ey yiɗige jàk kparri tâarra yey, dige a Tessaloniki. Kerèske ngaa dige a Galatiya, Titus ɗa dige a Dalmatiya. 11Luka ey kpolo wàa tâanji ni miy. Arra Marku un dàanja, ngam ey dele ha e mgbaanjimi. 12Mi tèewfa di Ticiku a Efesu. 13Mu dàararre go, 'maamra lurra ngisim yey wooma a Torowas a kàn Karpus gi, ni defterre ây ɗa hayye ɗerreeji ây tâage mbangsumya ni kûu gi. 14Aleksanda nit tefki mbirim jàk maarra dèy. Fay hii ge hiituwa kày tâa tèem wàa. 15Muy ɗa faasi hak wey a gin wàa, ngam ey hàanjige yèk worro dèy. 16Ye goosim yèk hak mum màrra gi, cen nirri mgbaanjim ba, aw pî aw woomfage. Nge ta Fay e sak yèk maan a hak waw ba! 17Amma Nitcoorra mgbaanjimge kpèwsimge, ngam mi kpàaye sakta Yèk Kâwrra ha gbèeni, a nit ây pî èege yèk Fay aw rage yèk maan. Nitcoorra saanimge a mgbelyèk tidîisi. 18Nitcoorra saa ge saanim a tèem makta pî, 'maa ge 'maam mbâra a wûun wâa a faktiturum. 'Mita e tâaw tâam timgbàri ha tâam timgbàri! Amen. 19Kèp daw da Piriskilla, ni Akila, ni nit àay rra Onesiforus. 20Erastu tâarre bak a Korintu. Di Torofimu mi woowe a Miletu, ngam àyci mòowe. 21Dàara kènu ɗoko cot ngisim e ii gi! Ewbulu, ni Pudes, ni Linus, ni Kalawdiya, ni kor ây ɗa pî aw kèbumfarre. 22Nitcoorra e tâanji ni muy! Mbâr Fay e tâanji ni un!

will be added

X\