2 Timote 3

1Amma muy sey mu cèngni, ye ge hèera gbèerra kparri gi, tâa ge tâa mgbàr ndèktiya. 2A nit ây yi gaw yiɗi hak waw, yi gaw yiɗi seede, ɗè gaw ɗèpsi tiɗèpsum, 'mi gaw 'misi hak waw, maa gaw maasi nîir Fay, gaw rak tuy da nit gbaa rra waw ba, gaw gàa mbew ba, gaw coo Fay ba, 3èe gaw èe yiide, tinîir waw yi ge yiri, cîi gaw cîinji yèk ây, gaw mòosi hak waw ba, tâa gaw tâa ngàskiya, yii gaw yii jàk mbâri, 4mòo gaw mòori da nit ây ni gâra, tèe gaw tèe jày ni râmjum, râa gaw râani hak waw, hò gaw hòm yiɗum jàk kâwum ni yiɗum Fay. 5Lò gaw lòni hak waw kà nit ây tolge Fay, amma hàa gaw hàanji mbinum wàa. Sey mu kpâanji ni nit ây gi! 6A nit ây kana a tîim waw le gaw lekri a àay ây, ngam aw rûfri da nikin ây tâage dàngdiya, toke jàk maarra, futkiri a gayam 'nang 'nang gi. 7A nikin ây gi aw yiɗiri èngnum yèk fûuya koo ningàa, amma gaw kpàa kpèta a cèngnum yèk takundi ba. 8Kày Yannes ni Yambere anin ni yèy a gin Muusa, hû go ɗa a nit ây gi aw ande ni yèy a yèk takundi, aw dii ni dànda mboyrriya, aw get a goosum ba. 9Amma aw gaw kpàa dikta ɗàm kpeesi dèy ba, ngam èca còycum waw lò ge lòt a gin nit ây pî, kày lòrre nà èca còycum waw da Yannes ni Yambere gi. 10Amma muy mu furre yèk kàlnjum mum, ni dikri mum, ni dànda mum, ni goosum mum, ni èfta tinîir mum, ni yiide mum, ni gòyrra tinîir mum. 11Mu cèngni ɗa ɗàar ta mum, ni 'màar ta mum kày kpèrrim nà a Antakiya, ni Ikoniya, ni Listira. Kayto, a 'màar ây gi riimi gi! Amma Nitcoorra saanimge koo a 'màar hâ. 12Hû go ɗa koo wun yiɗi gòyrra ni tolnji Fay a 'mèmsum ni Yeesu Kristu gi, ɗàa gaw ɗàaw ɗàari. 13Amma a nit makta ây ni nit rèeng ây ii gaw iisirra dikta ɗàm kpeesi a jàk maarra, rû gaw rûf da nit ây kana, a nit ây ɗa rû gaw rûfi daw. 14Muy sey mu gòy a jày èngnum gi goosum ni ngota mbâra, ye tâa mu cèngni a gin nit yey èngnum gi. 15Diga a tâam hàm wey mu cèngni defterre yèk Fay, yey ge kpàam còycunum, e 'maam a saarra tâage goosum di Yeesu Kristu. 16Jày tâage kètiya pî a defterre gi, Fay yèege, dele ngam kàlnjum, ni lònum jàk maarra, ni nàta tinîiri, ni 'maarra a gin gòyrra ɗèm, 17ngam ha nit Fay e tâa getiya, mbangse ngam tèem mbâri pî.

will be added

X\