2 Timote 2

1Muy mu hàm mum, kpèwsi hak wey ni mbâr yey tâage a gin Yeesu Kristu. 2Jàk yey rakmu a gin mum a ɗàm kpees nit seedum ây dèy gi, hîi daw da nit mbâr ây getke kàlnjum jàk yey da nit ây kana ɗa. 3Lekni hak wey a 'màar ây kà nit bàpri mbâra a gin Yeesu Kristu! 4Nit bàpri to lek go a bàpri, ge kàmjiri jày ge mgbàani is wàa ba, ngam ey yiɗi e delu di nit ɓèl wàa catku gi. 5To nirri 'nòonjirre go ni nit ây a 'nòori gi, ge kpàa tikangni hak sunda ba, sey to fut go ot mgbèngda. 6Nit bata hèmna looge a tèem, gesi e kpàa woy wàa màrra a jày nîige gi. 7Dànji a yèk ây yèem dum gi! Nitcoorra hîi ge hîim cèngnum a jày pî. 8Ɓaysiri Yeesu Kristu anga a yòot Dawda, gûyse a tîim nit ây wutke gi! Hû go gàa Yèk Kâwrra yey sagim, 9riimi 'màari ngam maan gi, ha de tâam ay a kultuma 'mèmdiya ni yuma titefki kà nit mbita jàk maarra. Amma yèk Fay ge tâa 'mèmdiya ba. 10Hû go mi èfɗe tinîir mum a jày pî, ngam ha a nit ây carri daw Fay aw ɗa aw kpàa saarra yey tâage a gin Yeesu Kristu gi, 'mèmsa ni 'mita tâam timgbàri. 11Yèk yey yèk takundi ɗi: To ot wut go ni ey, gû got gûy ni ey ɗa. 12To ot èfɗe go tinîiri ni ey, wûu got wûuni ni ey ɗa. To orro ot hàlu go, ey ɗa hà ge hàlna. 13Koo orro ot gòyrre go mbâra ba, ey gòyrre mbâra, ngam ey ge kpàaw hàlla hak wàa ba. 14Ɓaysini daw pî yèk ây gi, hàa daw a ɗàm kpees Fay, ta aw lètnji yèy a tîim waw a jày tâa ge mgbaanji daw ba, amma ge mboysi da nit rakta ây gi. 15Hâr ha mu gòyni hak wey e tâa getiya a ɗàm kpees Fay, mu tâa kà nit tèem cen lawsam a tèem wàa, tâage nit sakta mbâra a yèk takundi gi. 16Jèmfa yèk ây tâa aw del ba gi, tâage yèk ɓa hû go, ngam a nit ây mòoge yèk ây kà yey, ii gaw iisirra hàanjum di Fay. 17Yèk waw riirre kà nuki. A tîim waw ɗa dii Himinayu ni Filetu. 18Aw gbeeye ot takundi, aw gàarre, nge gûysum a wurra gi hòme mgban. Aw inirre goosum waw da nit ây kana u daarri. 19Amma jày tare Fay gi gòyrre ge yaa ba, dii ni ticèngsunum kètiya kà yey: Tooy Ɓèl cèngni da nit ta wàa. Hû go ɗa: Koo wun gàage ey nit wàa ɗi di Tooy Ɓèl, sey e kpâa a tèem makta. 20A àay ɓèl a jàk mbangsum ây aw dii cuk. Woy yey dii mbangsumya ni kangeerri koo ni sarrdi, woy kana ni kpiiri koo ni bàanji. Woy yey dii ngam tèenum tèem della, woy kana ngam kîta tèenum tèem. 21To nirri ɓetkini go hak wàa a jàk ây tâa ti del ba gi, tâa ge tâa titèeni tèem della ɓet ɓet yey ge gerru di nit ɓèl wàa, e ngoru a tèerra tèem mbâra pî. 22Amma muy, woofa gayam lori! Fut gòyrra ɗèm, ni goosum, ni yiide, ni tâam mbâri, 'mèmsa ni nit ây 'naasi nîir Nitcoorra ni tinîir ɓetkumya gi. 23Sey mu kpâa a gatkum yèk ray ni yèk dànjum kà hàm ây, ye tâa mu cèngni jàk ây gi 'maa ge 'maara tilètnjum. 24Ti gesi sàay Nitcoorra e tâa nit lètnjum ba, amma sey e tâa nit mgbergum yèy a gin nit ây pî, e tâa nit mbinda kàlnjum, nit èfta tinîiri. 25Sey e yèe daw ni fetkum tinîiri da nit ây hàanjiri gi, mba Fay ge hîi daw go orri aw ini tinîir waw, aw cèngni yèk takundi, 26ha aw kpàasi dànda waw tèes, aw saa a tidokri Seyɗan, yey mòogi daw ngam aw fut jày yiɗi gi.

will be added

X\