1 Miy mi Pawlu, mi nit yey tèem Yeesu Kristu kà yey yiɗi Fay, ha mi sak yèk gûyrra yey tâagina ni mòonjum kàn a gin Yeesu Kristu gi, 2 mi kèbumfarre dum Timote, hàm mum yiɗum dum gi. Nge Fay Tooy ni Yeesu Kristu Nitcoorra worro aw hîimu mbâr waw, ni 'maton, ni tâam mbâri! 3 Mi gàarre mbew di Fay, furrim diga wosom ta mum ni dànjum tinîir burriya, tèemi tèem wàa gi, ye ɓaysim yèk wey a waarra Fay koo ningàa tuma ni unji. 4 Mi ɓaysirre rîsim wey, mi yiɗi dèy mi rabumu, ngam ha kâwum e mûu a tinîir mum. 5 Mi ɓaysirre ɗa goosum yey tâage a gin wey takundi cen rèeng gi, yey tâage nà màrra a gin nuu way wey înuwan Loyis, ni nuu wey Ewnike. Mi cèngni mbâra, goosum maan dii a gin wey ɗa kòsòng. 6 Ngam maan mi ɓaysumde, sey mu hengsi hîir Fay yey tâage a gin wey diga ye iim kàn mum a gin wey gi. 7 Ngam Fay ti hîina jungci tolnji ba, amma jungci kpèw kpèw, ni yiide, ni hakkilo. 8 Hû go ta mu ii lawsam a seedunum yèk Nitcoorra worro ba, ta mu ii lawsam ɗa a gin mum ba, ye tâam ay a kultuma ngam wàa gi. Amma sey mu lekni hak wey a sakta Yèk Kâwrra, kà yey hîim Fay kpèw kpèw gi. 9 Ey saaninage, 'naasinage ha ot tâa nit ta wàa, ti tâa ngam tèem worro tèena gi ba, amma ngam ey yiɗe nà kà yey a mbâr wàa, de hîina ni Yeesu Kristu diga kparri ɗà ti ɗaa ba. 10 Amma kòsòng mbâr maan lòrrage a lòta Yeesu Kristu nit saanum worro, nit yey gbeesifa wurra, 'maaga gûyrra cen raarra a kayang ni Yèk Kâwrra gi. 11 A Yèk Kâwrra gi Fay de iim mi tâa nit sakta, ni nit tèerra, ni nit kàlnjum. 12 Ngam maan riimi 'màar yey gi. Amma lawsam ge mòom ba, ngam mi cèngni di wun goosim gi. Mi cèngni mbâra, ey ge mbin e faam jày kpàam a gin wàa gi ha a unji gbèeni. 13 A yèk ây takundi rakmu a gin mum sey e tâam tigetnjunum. Mòo yèk ây gi a goosum, ni yiide yey tâage a gin Yeesu Kristu. 14 Faa yèk mbâra hîiman gi, ye tâa Jungci Delliya tâage a gin worro mgbaanjumde gi. 15 Muy mu cèngni, nge nit ây pî tâage a Asiya aw woomfage. A tîim waw dii Figelu ni Hermogenes. 16 Nitcoorra e hîi mbâr wàa da nit àay rra Onesiforus, ngam ey suusimge tinîir mum nak mûsi jày, ti ii lawsam a ti 'mèmni mum ba, 17 amma ye kpèrra ay a Roma gi, de hârim kàmda ha de kpàasimi. 18 Nitcoorra e waaw di Tooy Ɓèl, ha e hîiw mbâr wàa di Onesiforus a unji gbèeni. Muy mu cèngni mbâra ɗa tèem yey tèe pî a Efesu.
