2 Ni-Tessaloniki ây 3

1Un kor ta worro, yèk kana ngasnage. Waan Fay ngam worro, ha yèk Nitcoorra e yeski koo u hâ, ha a nit ây aw 'misi yèk maan, kà yey tâa mgban a tîim wun, 2waan ha ot saa a kàn nit makta ây ni nit kperrem ây. Ngam ti tâa a nit ây pî goosi ba. 3Amma Nitcoorra gòyge mbâra a yèk wàa, kpè ge kpèwsunu, kpâa ge kpâanunu a jàk makta. 4Ot iirre dànda tinîir worro a gin Nitcoorra ngam wun, ha un tèe jày kà yey gàana ot dun gi, un tèe hû go ɗa a ɗàm kpeesi. 5Nitcoorra e gòynunu tinîir wun ha un yiɗu di Fay, un èf tinîir wun kà yey tâa a gin Kristu gi. 6Un kor ta worro, ot yèenurre ni nîir Yeesu Nitcoorra, ɗòlnjin ni kor ây pî tâage ni taski, tâa aw goosi yèk mgbèngda worro ba. 7Ngam un ni hak wun un cèngni, gesi un fut dikri worro, ngam orro ot tàa nà ni taski a tîim wun ba. 8Ot rii tiriici a kàn nirri ɓa hû go ba, amma a hâta ni loca ot tèerre nà tuma ni unji, ngam ta ot loosu koo di wuna a tîim wun ba. 9Ot mbire kà yey, ti tâa ngam ot kpàa orri a gin wun un hîina jày ba, amma ngam ot kàlni hak worro a gin wun ha un futna. 10Ye tâanjina nà ni un gi, ot gàanu kà yey: To nirri ti yiɗi go tèerra tèem ba, ta e rii jày ɗa ba. 11Ngam ot rakɗe yèk nit ây kana a tîim wun, aw dii ni taski, aw tèerre tèem ba, amma aw lekɗe a yèk nit ây kana. 12Da nit ây kà yey ot yèe dawrre, ot mgbèng dawrre ni nîir Yeesu Kristu Nitcoorra worro, aw tèe tèem waw unji pî, ha aw kpàa tiriici ni kàn waw. 13Amma un kor ta worro, ta un loo a tèerra tèem mbâri ba! 14To nirri ti rak go tuy a yèk worro a ɗerrewol yey gi ba, raptuwan nisi di nit maan, ta un 'mèmsi ni ey ba, ha lawsam e mòowa. 15Amma ta un yiiw ba, sey un yèew kà yey gun yèew di kor wun gi. 16Nge Nitcoorra nit tâam mbâri ey ni hak wàa e hîinu tâam mbâri koo kà ya koo ningàa. E tâanji ni un pî! 17Miy mi Pawlu miy kèrge kèpri yey ni kàn mum. E rri yey kày tâa ticèngsunum ɗerrewol ta mum pî. E rri yey kày kèrmi. 18Mbâr Yeesu Kristu Nitcoorra worro e tâanji ni un pî!

will be added

X\