2 Ni-Tessaloniki ây 2

1Un kor ta worro, ot waanurre a yèk unji dàarra Nitcoorra worro, ni kimjum worro a gin wàa, 2ta dànda wun e yûusunu digèrrige ba. Ta tinîiri e tolnu ba, ye gun rak unji dàarra Nitcoorra hèerage. Ta un ngor ba, koo nirri lòni go jày ni jungci, koo gòy go a yèk kana koo a ɗerrewol kana, gàan ana a gin worro gi. 3To nirri rûfnu go jày, ta un goosu ba. Ngam unji maan ge kpèrra ba, sey ɗà a nit ây aw woofa yèk goosum, sey nit yiirra yèk mgbèngda, hàm gbeerra e lòrri. 4Ey a ge an ni yèy a jày pî 'naasin a nit ây ni nîir Fay, ni jày coon gi, ha e tâa a àay Fay, e gàa ni hak wàa ey tâage Fay. 5Un ɓaysi yèk maan saknim dun nà, ye tâami a tîim wun ba yi? 6Kà yey un cèngnige jày njanggu dàarra di nit maan. Ge kpàa lòta ba, sey unji wàa kpèrra go gi. 7Yiirra yèk mgbèngda tèerre ni fûucu koo kòsòng. Amma ge lòt ba, sey nit yey njanggu gi e hèesi. 8A dat maan nit yiirra yèk mgbèngda lò ge lòrri. Yeesu Nitcoorra ɓà ge ɓàru ni tiyîngni mgbelyèk wàa, gbee ge gbeesi ni 'mita a lòta wàa. 9Dàarra nit yey tâa ge tâa tèem Seyɗan. Lò ge lòni jàk ây dèy ni mbinum, ni kayeefi rèeng ây, 10e rûfni koo ni tirûfni makta hâ da nit ây gaw gbee gi, ngam aw hàwe yiɗum yèk takundi yey ge saani daw gi. 11Hû go Fay tèera daw jàk rûfrum ni mbinum dèy, ha aw goosi yèk rèeng. 12Kà yey a nit ây pî tâa aw goosi yèk takundi ba, amma tèem makta delgi daw gi, kpàa gaw kpàa kiita. 13Amma orro sey ot gàa mbew di Fay ngam wun koo ningàa, un kor ta worro yiɗi dun Nitcoorra gi. Ngam diga ɗaarra Fay catnuge ha un saa, ye tâa Jungci Delliya ɓetkunurre, un goosi yèk takundi gi. 14Fay 'naasunu kà yey ni Yèk Kâwrra yey 'maafa ot dun gi, ha un kpàa 'mèmsum a 'mita Yeesu Kristu Nitcoorra worro. 15Hû go un kor ta worro, gòyin kpèw, mòon yèk mgbèngda ây kàlnji ot dun gi, koo ni yèy koo ni ɗerrewol worro. 16Nge Yeesu Kristu Nitcoorra worro ni hak wàa, ni Fay Tooy Ɓèl worro yiɗi dot gi, hîigina ni mbâr wàa kpèwsum tinîiri tâam timgbàri, ni jàk dànda mbâri gi, 17aw suusunu tinîir wun, aw kpèwsunu a tèerra tèem mbâri ni yèerra yèy ɗa pî!

will be added

X\