2 Ni-Tessaloniki ây 1

1Miy mi Pawlu, ni Silas, ni Timote ot kèpfa dunde dun nit ây kimje a Tessaloniki, tâage nit ta wàa di Fay Tooy Ɓèl worro ni Yeesu Kristu Nitcoorra gi. 2Nge Fay Tooy Ɓèl ni Yeesu Kristu Nitcoorra aw hîinu mbâr waw ni tâam mbâri! 3Un kor ta worro, sey ot gàaw mbew di Fay ngam wun koo ningàa kà yey gese gi, ngam goosum wun 'mitɗe dèy, koo yiide wuna ɗa iisirrarre a tîim wun. 4Hû go ot râanirre yèk wun a gin nit ta Fay kimje a riiy ây pî, ngam èfta tinîir wun, ni goosum wun a ɗàar ây ni riirra 'màar ây kpàanu dèy gi. 5A jàk ây gi aw tâage jàk kàlnum a kiita Fay tâage ɗèm gi, ngam un un gerre lekta a wûun Fay, yey riinu 'màari ngam maan gi. 6Fay Fak ɗèm ɗi, ha e kànsi daw 'màari da nit ây riisunu 'màari gi. 7Un ngaa un tirii 'màar ây gi kpàa gun kpàa wuysum ni orro, ye ge lòrra Yeesu Nitcoorra a faktiturum ni malayka ây tâage mbinum wàa gi. 8Lò ge lòrra a eb yeerriya, e ii daw kiita da nit ây tâa aw cèngnu di Fay ba, tâa aw rak tuy a Yèk Kâwrra Yeesu Nitcoorra worro ba. 9Aw gi rii gaw rii 'màar kiita a gin gbeerra tâam timgbàri, kpâarriya ni Nitcoorra, ni 'mita mbinum wàa. 10Mbi ge mbir hû go a ye ge dàara gi, ha a nit ta wàa aw 'misuwa, ha e tâa daw 'nang da nit goosum ây pî a unji maan. Un tâa gun tâanji ni aw, ngam un goosige yèk seedamku worro. 11Kà yey ot waawrre di Fak worro ngam wun koo ningàa, ha e saknu un gerre a gûyrra yey 'naasunu gi. Ot waawrre, ha e mûununu a yiɗum jàk mbâri, e mûununu a tèem goosum wun ni mbinum wàa. 12Hû go nîir Yeesu Nitcoorra worro e 'mit a tîim wun, un ngaa un 'mit a gin wàa ngam mbâr wàa ni mbâr Fak worro.

will be added

X\