1 Miy mi toonji nit kimjum ây, mi kèbumfarre dum nuu catiya ni hàm ta wey. Mi yiɗunurre ni yiide takundi, ti tâa miy kpolo mum ba, amma ni nit ây pî cèngni takundi gi. 2 Ot yiɗunurre ngam yèk takundi yey tâage a gin worro, tâa ge tâanji ni orro tâam timgbàri. 3 Fay Tooy Ɓèl, ni Yeesu Kristu Hàm wàa hîi gaw hîina mbâr waw ni tâam mbâri, ii gaw iina 'maton, ha takundi ni yiide aw tâa a tîim worro. 4 Tinîir mum kâwim dèy, ngam mi kpàa daw da nit ây kana a tîim hàm ta wey, aw dikɗe a yèk takundi kà yey mgbèngna Tooy Ɓèl gi. 5 Mi waamde dum nuu catiya, ot yiɗinji a tîim worro pî. Ti tâa yèk mgbèngda fûuya kèrmifa dun ba, amma yèk yey diina diga màrra gi. 6 Ot yiɗu di Fay, to ot futɗe go yèk mgbèngda wàa. Sey un dik ni yiide, kà yey raknu diga màrra a yèk mgbèngda wàa gi. 7 Amma a nit rûfrum ây dèy aw gîtɗe a deesi. Aw goosirre nge Yeesu Kristu dàara ni is nirri ba. Nit mbita kà yey, tâa nit rûfrum, nit yiir Kristu. 8 Faasin hak wun, ngam ta un gbeesi mbâr tèem wun ba, amma un kpàa jàk koyrra wun mûurriya barr. 9 Koo wun tâa ti tâarre a jày kàlnje Kristu gi ba, amma hòmu di yèk wàa, ey ti 'mèmsi ni Fay ba. Nit yey futke a yèk kàlnjum maan, 'mèmsi ni Tooy Ɓèl, ni Hàm wàa ɗa. 10 To nirri dàara go a gin wun, ti 'maara yèk kàlnjum Kristu gi ba, ta un ngoru a àay wun ba, ta un kèbu kèpri ba. 11 Ngam nit yey kèpku koo kèpri gi, 'mèmsi ni ey a tèem makta wàa. 12 Yèk kana ngasim dèy, amma mi yiɗi mi kèrfa dun a ɗerrewol ni jàk yiriya ba. Mi dànde, di gim difa a gin wun ot yèenji ni mgbelyèy, ngam ha tinîir worro e kpàa e mûu ni kâwum. 13 A hàm ta kaa wey tâage catiya gi aw kèbumfarre.
