2 Ni-Korintu ây 8

1Un kor ta mum, ot yiɗi un cèngni kày lòni Fay mbâr wàa a gin nit kimjum ây a dees Makedoniya. 2Ngam koo ye tâa 'màar ây dèy gerri dawge, kâwum tinîir waw 'mirre, ha aw hîiye hîiri dèy ni ɓèlla ni kàn patiya a èca waw èen gi. 3Mi seedirre a hak waw, aw hîi ni yiide tinîiri kà yey mbinin gi, ha hòmige di mbinum waw. 4Aw waanage dèy ha aw kpàa orri aw 'mèmsi a hîirra hîiri, ngam mgbaanjum danit della ta wàa di Fay tâage a Yerusalem gi. 5Jày tèen gi hòme ɗa di jàk yey dànna orro, ngam aw hîiye hak waw màrra a gin Nitcoorra, a dat maan a gin worro kà yey yiɗi Fay. 6Ngam maan de waana di Titus e difa a gin wun, ha e dik ɗàm kpeesi ni tèerra tèem yey ɗaa nà gi, ha e gbèesinji ni un a tèem hîirra hîiri. 7Ot yiɗi un yâayi a tèem hîirra hîiri gi kà yey yâayunu a jày pî, koo a goosum, koo a yèerra yèy, koo a cèngnum jày, koo a rîirra kpèw kpèw, koo a yiide wun ngam worro. 8Mi gàanu yèk yey kà yèk mgbèngda ba, amma mi kàlnunurre kày rîin kpèw a nit ây kana, ngam ha mi gerru takundi di yiide wun. 9Un cèngni mbâr Yeesu Kristu Nitcoorra worro, nge ey koo ye tâa nit bèebi ɗi gi ire nit èca ngam wun, ngam ha e inunu nit bèeb ây ni èca wàa. 10E rri yey mi kàlnurre jàk dànda mum a yèk yey: Dele to un mòo go tèem yey ɗaanu diga yer yey hòmge gi, ti tâa a tèerra gbè ba, amma ni yiɗum tinîiri ɗa. 11Kòsòng gbèesin tèem maan tèenu gi, ngam kà yey tâa nà yiɗum wun mbâra, gbèesum maan ɗa e tâa kà yey mbinnu gi. 12Ngam to nirri yiɗi go hîirra jày ni tinîir mbâra, de ge delu di Fay ni hîir wàa a jày tâagu gi, naa a jàk yey èegu gi. 13Ta un rii fòon ngam un mgbaanji daw da nit ây kana a gayam waw ba, amma un getnji titenten ni aw. 14Ye tâa kòsong un dii ni jày dèy, mgbaanjin daw da nit ây ây daw jày gi. To mgbàr kana jày ây dun go, amma aw aw dii go ni jày dèy, kpàa gaw kpàanu mgbaanjum ɗa. Hû go tâa gaw tâa titenten ni un. 15Ngam gàarre a defterre Fay: Nit yey kimje jày dèy gi, ti gbaatu ba. Nit yey kimje jày càa gi, jày âyu ba. 16Ot gàarre mbew di Fay hîigu rîirra kpèw di Titus ngam wun, kà yey orro ɗa ot dii ni rîirra kpèw ngam wun gi. 17Ngam ngore waar worro, mûu ɗa ni yiide a tinîir wàa, ha ey ni hak wàa yiɗi e difa a gin wun. 18Ot tèewe ɗa ni ey kor yey kpàage ɓolmum a gin nit kimjum ây pî, ngam yèk tèem wàa a sakta Yèk Kâwrra. 19Ti tâa ɓòlmum kpàa gbè ba, amma a nit kimjum ây aw carruge ni iirra kàn, ha e diknji ni orro a tèem hîir yey tèena ngam 'mita Nitcoorra ni yiɗum tinîir worro gi. 20Kà yey got njang daw da nit ây, ta aw yèerina yèy a yèk tèem worro a hîir yey dèy got 'maa gi ba. 21Ngam ot kàmde jày tâage mbâra naa a ɗàm kpees Nitcoorra gbè, amma a ɗàm kpees nit ây ɗa. 22Ot tèenji daw ni aw kor worro kana, nit yey kpàana orri ha gerru ot nak mûsi jày, kàlnirre hak wàa koo ningàa ey nit rîirra kpèw ɗi gi. Kòsòng iisirra rîirra kpèw, ye tâa ii dànda tinîir wàa pî a gin wun. 23Titus ey nit 'mèmsum ɗi ni miy a tèerra tèem ngam wun. A kor ây kana cuk tèefan daw nit kimjum ây gi, aw a nit tèerra tèem ây ɗi ngam 'mita Kristu. 24Hû go kàlnin daw yiide wun, ha un lòni a ɗàm kpees nit kimjum ây nge râanum worro a hak wun gi ti tâa ɓa hû go ba.

will be added

X\