2 Ni-Korintu ây 6

1Orro ot nit tèerra tèem Fay ɗi ot waanurre, ta un woo mbâr wàa kpàanu gi e tâa jàk ɓa hû go ba. 2Ngam gàarre a defterre wàa: A mgbàr mbâri mi ragumge, a unji saarra mi mgbaanjumge. Kòsòng tâage mgbàr ngota mbâr Fay, e rri yey kòsòng unji saarra gi! 3Orro a tèem worro gi ot iinu jàk timgbòlnji koo jâ ba, ngam ta aw yèeri yèk makta a tèem yey ba. 4Amma a jày pî ot gòynirre hak worro orro ot nit tèerra tèem Fay ɗi, koo a èfta tinîiri dèy, koo a riirra 'màari, koo a tâarra a tâam fòon, koo a jàk àyrriya, 5koo a tiluni, koo a tâarra a kultuma, koo a anda yèy, koo a tèem loca, koo a èca kûurra nistikûum, koo a àyrra fey. 6Ot gòyrre a jàk ây gi pî ni tâam ɓet ɓet, ni cèngnum jày, ni èfta tinîiri, ni mgbergum yèy, ni tèerra tèem ni Jungci Delliya, ni yiide cen tibiw, 7ni yèerra yèk takundi, ni tèerra tèem ni mbinum Fay. Ot tèenirre ni jàk bàpri ây kpàana a ɗèm Fay gi, koo ngam tapnum, koo ngam njangnum. 8Ot gòyrre kpèw koo aw coonarre go, koo aw luusinarre go, koo aw yèenarre go yèk makta, koo aw yèenarre go yèk mbâra. Aw raptinarre kà nit rûfrum ây, koo ye tâa orro ot nit takundi ây ɗi gi. 9Aw raptinarre kà nit ây tâa ot cèngni daw ba, koo ye tâa ot dii cèngnumya a gin nit ây pî. Aw raptinarre kà nit wuta ây, koo ye tâa ot gûyrre gi. Aw haarra dotɗe, amma aw ɓàtna ba. 10Ot rèerre kà nit ây ày daw tinîiri, amma ot dii ni kâwum. Ot rèerre kà nit èca ây, amma ot hîi dawrre bèebi da nit ây dèy. Ot rèerre kà nit ây tâage aw cen ni jày koo càa ba, amma ot dii ni jàk ây pî. 11Un ni-Korintu ây, ot faarige mgbelyèk worro ot yèenurre koo jâ pî, tinîir worro ngaa yâayirre ngam wun. 12Orro ot fanti dun tinîir worro ba, amma un un fantina tinîir wun. 13Mi yèenurre mu gàa un hàm ta mum ɗi, mbirin dot ɗa kà yey mbitna ot dun gi, yâayinin tinîir wun! 14Ta un 'mèmsi a dikri kpolo ni nit ây èege goosum gi ba. Kà ge getnji tèem ɗèm ni tèem makta gi ya? Kà ge 'mèmsi kayang ni kulpi gi ya? 15Kà ge raknji Kristu ni Beliyar Seyɗan gi ya? Ji ge tâanji daw da nit goosum di Fay ni nirri tâa ti goosi gi ba ya? 16Kà ge getnji àay Fay ni àay mâri gi ya? Ngam orro ot àay Fak beengiya ɗi, kà yey gàa a defterre wàa: Tâa gim tâanji ni un, gî gim gîr a tîim wun, tâa gim tâa Fak wun, un ngaa tâa gun tâa nit ta mum. 17Ngam maan Tooy Ɓèl de gàa: Yuun a tîim waw, ɗòlnjin ni aw, ta un bang ɗa jàk 'miskumya ba. Kà yey miy ngo gim ngotnu. 18Tâa gim tâa Too wun, un ɗa tâa gun tâa hàm ta mum, hàm nihun ây ni hàm nikin ây. Hû go gàa Tooy Ɓèl tâage ni mbinum a jày pî gi.

will be added

X\