2 Ni-Korintu ây 3

1Ye tâa ot yèerre kà yey, ot ɗaasirre râanum hak worro yi? Koo gayam ɗerrewol gòynum diina kà nit ây kana, kà gàarra ɗerrewol anda a gin wun, koo woy tèenum a gin wun yi? 2Un tâage ɗerrewol gòynum worro kètiya a tinîir worro, ɗerrewol yey kpàan cèngnum a nit ây pî, aw janggirre. 3Lòtiya ɗi nge un tâage ɗerrewol Kristu, kètiya ni kàn worro ti tâa ni jàk yiriya ba amma ni Jungci Fak beengiya, ti tâa kètiya a gòok tifalap ba amma a mîis tinîiri. 4Ot kpàa cèngnum mbâra kà yey a gin Fay ni Yeesu Kristu. 5Orro ot get ni hak worro ha ot gàa jàk kana ana a gin worro ba, amma jày got get mbita gi ana a gin Fay. 6Ey getnina ha ot tâa nit tèerra tèem a jàk wasta fûuya, ti tâa ni jàk kèta ba amma ni Jungci Delliya. Ngam jàk kèta ɓàtɗe nirri, amma Jungci gûynurre. 7Tèem ɓàta di nirri kètiya ɗi a gòok tifalap ây dii nà ni 'mita Fay. A ni-Israyel ây aw kpàaw raptum nis wàa di Muusa ba yèk 'mita a nis wàa ge lòo gi. 8To tèem maan tâa go ni 'mita Fay, sakko kà ge tâa tèem Jungci ni 'mita Fay gi ya? 9Ngam to tâa go tèem yaanum a kiita dii nà ni 'mita Fay, sakko kà ge tâa tèem gòynum ɗèm ge hòmu 'mita dèy ba ya? 10'Mita yey tâage mgban gi, getnji koo jâ ni 'mita ɓèl a tâarra yey gi ba. 11Ngam to tâa go jàk lòorra dii nà ni 'mita gi, sakko kà ge tâa jàk tâarra koo ningàa ge hòmu 'mita ba ya? 12Ye tâa ot dii ni jàk dànda kà yey gi, ot yèerre tolnji cen. 13Orro ot tâa kà Muusa ba butke nà tiigi wàa, e njang daw da ni-Israyel ây ngam ta aw rap lòorra 'mita maan ba. 14Amma jàk dànda nit ây gi ndège. Ha niyey dànda waw burre ni jàk buta a ye janggin defterre jàk wasta mgbanti gi. Jàk buta maan ge tâa daw atiya ba, sey ni Kristu nit yey gbèese jàk wasta mgbanti gi. 15Ha kòsòng jàk buta gi yisi daw tinîir waw yiriya, a ye janggin yèk mgbèngda Muusa gi. 16Amma gàarre a defterre Fay: To nirri ira go a gin Tooy Ɓèl, jàk buta tâa ge tâa atiya a gin wàa. 17Tooy Ɓèl tâage Jungci. A gin tâa Jungci Tooy Ɓèl gi, a farra dii tâam tiròom. 18Orro pî tâage nis worro faarumya gi, ot raptirre 'mita Nitcoorra kà raptum a darrugal, ot inirre jàk tirèenjum ni Nitcoorra, ha 'mita wàa e tâa 'mita worro. Kà yey tèe Nitcoorra ni Jungci wàa.

will be added

X\