2 Ni-Korintu ây 2

1Kà yey dànsim ni hak mum, gim diksifa a gin wun ba, ngam ta mi àysunu tinîir wun bak ba. 2Ngam to mi àysunu go tinîiri gi, wun ge kâwsim tinîir mum, sonaa nit yey kpàage àyrra tinîiri gi ba ya? 3Yòo maan mi kèrfa dun nà kà yey, ngam to mi kpètfa go a gin wun, ta mi kpàa àyrra tinîiri a gin nit ây gesi ngin aw hîim kâwum gi ba. Ngam mi cèngni mbâra a hak wun pî, nge kâwum mum tâage ɗa kâwum wun. 4Mi kèrfa dun nà yèk maan ni riirra 'màari, ni àyrra tinîiri, ni umda rîsim dèy, ti tâa ngam mi àysunu tinîiri ba, amma ngam un cèngni kày yiɗim dun dèy gi. 5To nit kana tâa go nit àysum tinîiri, ti tâa dim àyse ba, amma dun pî àysunu, koo àysi daw go da nit ây kana a tîim wun, ngam ta mi hàw yèk takundi ba. 6Tiyèeni nit ây dèy a tîim wun kpàa nit maan gi, gerruge. 7Amma kòsòng ndika un yaafu un kpèwsu tinîir wàa, ta un iisurra ngòlnji ha e 'maaw a gbeesum hakkilo wàa ba. 8Hû go mi waanurre, un kàlnu yiide. 9Mi kèrfa dun nà yèk maan ngam ha mi getnu, mi cèngni to un rakɗe go tuy a yèk mum pî gi. 10To un yaafu go di nirri, miy ɗa yaa gim yaafuwa. Ngam to mi yaafu go di nirri jày getke mi yaafu gi, mi mbitɗe kà yey ngam wun a ɗàm kpees Kristu, 11ngam ta Seyɗan e sunna ba, ye tâa orro ot cèngni gâra ta wàa. 12Ye kpèrrim a Torowas ngam sakta Yèk Kâwrra yey anga a gin Kristu gi, Nitcoorra hîimi ot mbâra ngam tèerra tèem. 13Amma mi kpàa suunji a tinîir mum ba, ngam mi kpàaw di Titus kor mum a farra ba. Kà yey de wasmi daw da ni-Torowas ây, de dikmi a dees Makedoniya. 14Ot gàarre mbew di Fay, 'maagina ni Kristu kà nit sunda ây a ɗàm kpees nit ây koo ningàa, lònirre mgbirgum cèngnum wàa koo u hâ. 15Orro ot jàk mgbirgum Kristu ɗi a gin Fay, ngam nit ây saage gi ni nit ây gbeege gi. 16Ngam nit ây gbeege gi orro ot dii kà jàk mgbirgum ây a wurra, ha aw wurri. Ngam nit ây saage gi orro ot dii kà jàk mgbirgum ây a gûyrra, ha aw gûyi. Wun getke a tèerra tèem kà yey ya? 17Orro ɗi, ngam ot tâa kà nit ây kana dèy sàange yèk Fay gi ba, amma kà nit ây tèe daw gi ɗi, ot yèerre a ɗàm kpees Fay ni tinîir takundi, ot nit ây 'mèmse ni Kristu gi.

will be added

X\