2 Ni-Korintu ây 13

1Mi kèle mi difa a gin wun nak taanti. Yèy pî gò ge gòy a yèk nit seedum ây cuk koo taan, kà yey gàa a defterre Fay gi. 2Mi gàa dawrre da nit ây mbirgiri jàk maarra diga mgban, ni nit ây pî hàanje gi, kà yey gàami daw nà a ye tâanjim ni un nak cukti, mi gàafa dawrre bak kòsòng ye tâami kpâarriya gi: Mi difa go, gim gop daw ni 'maton ba. 3Ye tâa un yiɗirre cèngnum nge Kristu yèera dunde ni mgbelyèk mum, kpàa gun kpàaw ey ti tâa dàngdiya a tîim wun ba, amma dii kpèw. 4Aw gbaluge nà a minjum kpiiri ngam dàngda wàa, amma gûyrre ni mbinum Fay. A 'mèmsum worro ni ey orro ɗa ot dii dàngdiya, amma a tèerra tèem worro a gin wun gi gû got gûy ni ey a mbinum Fay. 5Gerrin hak wun, un gobu to un gûyrre go a goosum! Koo un cèngni nge Kristu tâarre a tinîir wun ba yi? To naa hû go ba, gun gòy ngin mbâra a goosum ba. 6Amma mi dànde, cè gun cèngni nge orro ot èe gòyrra mbâra a goosum ba. 7Ot waarre Fay ngam ta un tèe jàk makta koo jâ ba, naa ngam orro ot lòt ot nit gòyrra mbâra ɗi, amma ngam un tèe jàk mbâri, koo tâa ge tâa go orro ot lòtɗe kà nit ây èege gòyrra mbâra a goosum gi. 8Ngam got kpàa tèerra jày ha ot hàanji takundi gi ba, amma sey ngam takundi gbè. 9Ot kâwsirre tinîiri a ye tâana orro dàngdiya, a ye tâanu un kpèw gi. A waar worro ɗa ot waawrre di Fay, ha e mbangsunu un tâa getiya. 10Ngam maan de kèrmifa yèk ây gi a ye tâami kpâarriya, ngam ye gim tâanji ni un gi, ta mi tèe ni yèk ndèkta a mbinum yey hîim Nitcoorra gi ba. Mi kpàa mbinum maan ngam mi mgbaanjunu dikta ɗàm kpeesi a goosum, ti tâa ngam mi gbeesunu ba. 11Jày ngaskirra gi un kor ta mum, kâwsin tinîir wun, mbangsin hak wun un tâa getiya, ngorin yèk mgbèngda ây, 'mèmsin dànda wun kpolo, raknjin ha un tâanji mbâra a tîim wun! Hû go Fak yiide Fak tâam mbâri tâa ge tâanji ni un. 12Kèpnjin a tîim wun ni tikapni kor goosum ây! A nit della ta wàa di Fay pî aw kèpfa dunde. 13Mbâr Yeesu Kristu Nitcoorra, ni yiide Fay, ni 'mèmsum Jungci Delliya e tâanji ni un pî!

will be added

X\