2 Ni-Korintu ây 12

1Gesi mi râani bak hak mum, koo ye tâa ti del ba gi. Mi yiɗi mi yèe kòsòng jàk àyrra ndaram ni yèk jàk lòta yey rabim a gin Nitcoorra gi. 2Mi cèngni nit Kristu, fiwnuwan ha faktiturum taanti diga yeri ra sàm naan. Mi cèngni to jàk maan tâa go takundi ni isi koo kà àyrra ndaram ba. Sey Fay gbè cèngni. 3Mi cèngni nge nit maan aw fiwnu ha a Paradi. Mi cèngni bak to jàk maan tâa go takundi ni isi koo kà àyrra ndaram ba. Sey Fay gbè cèngni. 4A farra rage yèk ây tâa nirri ge kpàaw yèerra ba, tâa ti gesi nirri e yèe ba. 5Mi râanirre ngam maan, amma ngam hak mum gim râani ba, sey ni jàk ây tâagim dàngdiya gi. 6To mi yiɗi go ngin râanum gi, gim tâa ngin ray ba, ngam jày gim gàa gi takundi ɗi. Amma mi woofa râanum hak mum, ngam ta nirri e dàn a hak mum ha e hòmu di jày rabe a gin mum, koo rage a gin mum gi ba. 7Amma ngam ta mi 'misi hak mum yèk jàk lòta ɓèl ây rabim gi ba, Fay de iimda jàk àyrriya a is mum, tâa mu gàa hîiwe orri di malayka Seyɗan e cubim, ngam ta mi 'misi hak mum ba. 8Mi waawe di Nitcoorra nak taan, ngam ha e atnjimfa jàk àyrra maan. 9Amma Nitcoorra de gàam: Woo mbâr mum e gerrum a jày gaygum gi, ngam mbinum mum mûurre a gin wey a ye tâamu dàngdiya gi. Hû go de hòmim yiɗum a tinîir mum mi râani yèk jàk ây tâagim dàngdiya, ngam ha mbinum Kristu e tâa a hak mum. 10Ngam maan mi kâwsirre tinîir mum a jàk ây tâagim dàngdiya gi, a tinjàmni ây, a fòon, a ɗàar ây, a jàk ây àyrriya riimi ngam yèk Kristu. Ngam a ye tâami dàngdiya gi, mi dii kpèw. 11Mi yèeye kà ray, ye tâa un ndakimi a mbita kà yey. Gesi ngin un gòyni yèk mum, ngam koo ye tâa mi get koo jâ ba, mi hòm daw luurra da nit ɓèl tèerra ây ba. 12Ni èfta tinîiri dèy mi tèeye jàk ây a tîim wun, lòni nge miy mi nit yey tèem Yeesu ɗi gi, mi tèeye tèem jàk lònum ây ni kayeefi ây, ni tèem mbinum. 13Ni jàk jâ hòmnu un luurra da nit kimjum ây kana, sonaa ye woomfa dun loosum ba ya? Yaafimin jàk makta yey! 14E rri yey mi kèlfa dikta a gin wun nak taanti, gim loosunu ba. Mi kàmde jàk ta wun ba, amma sey hak wun. Ngam ti gesi a hàm ây aw ɗit daw da too rra waw ni nuu rra waw ba, amma a tooy ây ni nuu ây gaw ɗit daw da hàm ta waw. 15Mi yiɗi a tinîir mum ha mi hîi jàk ta mum pî, koo hak mum ngam mi mgbaanjunu. Amma ye tâa mi iisirra dunde yiɗum gi, yiide wun ngam mum a ge atnji yi? 16Un cèngni nge mi loosunu koo a jâ ba, amma un gàarre mi nit faarra ray ɗi, nge mi mòonu hakkilo wun ni gâra. 17Koo nit kana a tîim nit ây tèemfa a gin wun gi, arra dun jày ni burma e koynima yi? 18Mi waawe nà di Titus e diknjifa ni kor kana a gin wun. Gàa gun gàa, Titus tèenu tèem burma yi? Miy mi diknjirre ni ey a dànda kpolo ba yi, koo ot mòorre ot kpolo ba yi? 19Mba un dànde diga mgban ot goosirre yèk hak worro a gin wun yi? Ti tâa hû go ba, amma ot yèerre kà nit ta Kristu a ɗàm kpees Fay. Un nit ây yiɗina ot gi, ot yèerre jàk ây gi pî ngam ot mgbaanjunu dikta ɗàm kpeesi a goosum. 20Mi tolle ye gim difa a gin wun gi, mba gim kpàanu kà yey yiɗim ba, un ɗa gun kpàam kà yey yiɗunu ba. Mi tolle mba kpàa gim kpàa tilètnjum, ni ngèeri, ni ngòlnji, ni tihàanjum, ni njeerra yèk makta, ni yèk tiyaynjurum, ni 'misum hay, ni anda yèy a tîim wun. 21Ye gim difa a gin wun, mba Fak mum ûu ge ûunim a ɗàm kpees wun, kpàa gim kpàa àyrra tinîiri yèk nit ây dèy mbirgiri jàk maarra diga mgban, hàwge inum tinîir waw a tèem 'miskum, ni njeenu, ni haanum tuy.

will be added

X\