1 Gesi un woom mi yèerra dun ni yèk ray càa. Ndògòn, hîimin orri! 2 Mi yiɗunurre ni ngèer yey anga a gin Fay gi, mi kàmde mi hîinu a gin maa kpolo tâage Kristu, kà sapri tâa ti cèngni is nihun ba tâage ɓet ɓet gi. 3 Amma mi tolle, mba dànda wun mbo ge mboyi, un woofa 'mèmsum ni Kristu ni tinîir mbâra, kà yey rûfu nà jòoy di Hawa ni gâra gi. 4 Ngam to nirri dàara go e sak yèk Yeesu kana tâa ot sak ba gi, to un kpàa go ngota Jungci kana tâa un ngor nà ba, to un kpàa go ngota Yèk Kâwrra kana tâa un ngor nà ba, ngo gun ngor yaale. 5 Miy mi dànde, mi hòm daw luurra da nit ɓèl tèerra ây koo a jâ ba. 6 Koo ye tâa mi mbin yèerra yèy mbâra ba, amma a cèngnum jày mi tâa hû go ba. Ot lònunu kà yey a jày pî koo ningàa. 7 Malla mi mbire jàk maarra ye luusim hak mum ngam ha mi aanjunu gi yi? Oow, mi yèerre Yèk Kâwrra Fay saknim dun gi kà hîiri. 8 Mi ngore bèeb tèem a gin nit kimjum ây kana, tâa mu gàa mi ngosi dawge jày dèy, ngam ha mi tèe tèem a gin wun. 9 A ye tâama nà a gin wun ye âyim jày gi, mi loosu koo di wuna ba. Ngam a kor ây dàaga a dees Makedoniya aw mûunim a jày âygim nà gi. Mi faasi hak mum a jày pî ngam ta mi loosunu ba, faa gim faasi hak mum kà yey bak. 10 Mi gàarre ni takundi Kristu tâage a gin mum gi, nge koo wuna a dees Akaya ge njanggim râanum mum kà yey ba. 11 Ngam jâ yèemi kà yey ya? Mba mi yiɗunu ba yi? Fay cèngni to mi yiɗunu go ba. 12 Amma kà yey mbirmi gi, mbi gim mbir a ɗàm kpeesi ɗa, ngam ha mi atnjifa daw gâra nit ây yiɗi yèk gâra gi, ha a jày râanin gi aw kpàa daw aw tèerre tèem kà orro. 13 Ngam a nit ây gi aw a nit rèeng ây ɗi, aw tèerre tèem burma, aw rèenjinirre hak waw ni nit tèerra ta Kristu. 14 Jàk yey ti tâa jàk tâarra 'nang ba, ngam Seyɗan ɗa rèenjinirre hak wàa kà malayka kayang. 15 Hù go jàk ɓèl ɗi ba, to a nit tèem ta wàa di Seyɗan aw rèenjinirre go hak waw kà nit ây tèege tèem ɗèm. Kà yey tâa tèem waw gi, hû go ge tâa ɗa gbèeni waw. 16 Mi gàarre bak, ta nirri e raptim kà ray ba. Amma to un raptimde go kà yey, sey un ngorim mu gàa mi ray ɗi, ngam ha miy ɗa mi kpàa râanum hak mum càa. 17 Jày gim yèe gi, ti tâa kà yey yiɗi Nitcoorra ba. Yèe gim yèe mu gàa mi ray ɗi, ye tâa mi lekni hak mum a râanum gi. 18 Kà yey râanin nit ây dèy a yèk isi gi, miy ɗa râa gim râani. 19 Ngam un un nit còycum ây ɗi un woo daw ni kâwum tinîiri da nit ây tâage raya gi aw yèe. 20 Un woowrre di nirri, to inunurre go sàay, koo riinurre go jày, koo mòonurre go, koo 'misirre go hak wàa, koo lòsnurre go a kpalnga. 21 Mi yèerre yèk yey ni lawsam, mi gàarre: A tèem kà yey orro ot nit dàngdiya ây ɗi. Amma to nirri tol go râanum hak wàa a jày ba, miy ɗa gim tol râanum hak mum ba. Mi yèerre mu gàa mi ray ɗi. 22 Aw a ni-Hebra ây ɗi yi? Miy ɗa mi ni-Hebra ɗi. Aw a ni-Israyel ây ɗi yi? Miy ɗa mi ni-Israyel ɗi. Aw a yòot ta Abraham ɗi yi? Miy ɗa mi yòot Abraham ɗi. 23 Aw a nit ây tèege tèem Kristu ɗi yi? Miy ɗa mi nit tèerra tèem Kristu ɗi, mi hòm dawge. Amma mi yèerre yèk yey mu gàa tidoogum. Mi hòm daw loca a tèerra tèem, mi hòm daw lekta a kultuma, mi hòm daw kpàarra tiluni, nak mûsi jày mi tâarre nà gaarra a wurra. 24 Nak kèrèw a ni-Yude ây lèfimin tilèfni nde ra taan sàm ngaskàm kpolo. 25 Nak taan a nit ây lutkimin tiluni, aw còomi ni gòoy nay kpolo. Nak taan koombowal tuusim a sòo, mgbàr kana mi tâa nà a mîis sòo tuma ni unji. 26 A dikta wooy mum, nak mûsi jày mi lekni hak mum a àyrra yewrra sîirra ɓèl ây, kèl mi lek a kàn nit ây ngorge jày, kèl mi lek a kàn yòot ta mum ni-Yude ây, ni kàn nit ây èege yèk Fay. Mi lekni hak mum a tîim mûsa nit ây a riiy ɓèl, mi lekni hak mum ɗa a tâam àyrriya a tîim nûri, ni dikri àyrriya a sòo ɓèl. Kèl mi lek a gâra kor rèeng ây. 27 Mi rii 'màari a tèerra tèem dèy ni loca, ni èca kûurra nistikûum nak mûsi jày, ni àyrra fey, ni ɓòyrra sòo, ni èca tiriici, ni suurra ngisim, ni èca lurra. 28 Unji pî a nit ây aw looskimde, mi dànjirre yèk nit kimjum ây pî koo ningàa, cen yèerra yèk ây kana gi. 29 To nirri tâa go dàngdiya, miy ɗa gim ir dàngdiya ba yi? To nirri mgbòl go gi, miy ɗa jày ge àyim ba yi? 30 To gesi go mi râani hak mum gi, râa gim râani ni jàk yey tâagim dàngdiya gi. 31 Fay Tooy Yeesu Nitcoorra worro, Tooy yey gese ot 'misu tâam timgbàri gi, ey cèngni mi rèengde rèeng ba. 32 A ye tâami a Damasku gi, ngomna wûun Aresta faarre nà riiy maan lang ngam e mòomi. 33 Amma aw cinim ni gàngna a kpongna jâarra bàanji, de saami a kàn wàa.
