1 Miy mi Pawlu ni hak mum mi waanurre ni fetkum tinîir Kristu, ni mgbergum wàa, mi nit yey gàan a nit ây mi nit ûunum hay ɗi a ye tâam a tîim wun, amma mi nit mòorra tinîiri ɗi a ye kpâanjim ni un gi, 2 mi waanurre, ta un ndagim ngam mi yèe ni mòorra tinîiri ba, kà yey dànimi mi mbit daw cen tolnji da nit ây gàage ot dikɗe kà yey yiɗi isi gi. 3 Ngam koo ye tâa ot dikɗe kà yey yiɗi isi gi, ot haarre ni jàk isi ba. 4 A jàk bàpri ây haanina gbàaci ni erra gi aw tâa jàk isi ba, amma mbinum Fay ɗi ngam yaanum jàk jâarra mgbòktiya. Ot yaanifarre gâra nit ây ni jàk bàpri ây gi, 5 ot yaanifarre ɗa jàk 'misunum hay tâa ti getnji ni cèngnum Fay ba, ot 'mèmde jàk dànda nirri pî ha ot 'maaw a rakta tuy di Kristu. 6 Ot kèlle ot iiw kiita koo di wuna hàwge rakta tuy, a ye gun kpèt a rakta tuy mbâra gi. 7 Raptin jày tâage a ɗàm kpees wun gi! To nirri dànde go ni hak wàa ey nit Kristu ɗi, sey e cèngni ɗa, orro ot nit ta Kristu ɗi kà ey. 8 Ngam lawsam ge mòom ba, koo mi hòmnirra go râanum càa a mbinum yey hîina Nitcoorra gi, dii ngam ot mgbaanjunu dikta ɗàm kpeesi a goosum, ti tâa ngam ot mboysunu ba. 9 Mi yiɗi nge e tâa mi tolsunurre ni ɗerrewol ta mum ba. 10 Ngam aw gàarre, a ɗerrewol ta mum aw ndège aw dii ni kpèw kpèw, amma a tâam mum ni isi a ɗàm kpees nit ây mi dii dàngdiya, mgbelyèk mum ngaa cen ni mbinum a yèerra yèy ba. 11 A nit ây gàage kà yey gi sey aw cèngni, kà yey yèena a ɗerrewol ây gi ye tâana kpâarriya, hû go got mbir ɗa a ye got tâa a tîim wun. 12 To got tol iirra hak worro titenten ni nit ây gòyni hak waw, koo rèenjunum hak worro ni aw gi. Ngam ye tâa aw aw cèngni jày ba, aw getɗe hak waw ni tigeni waw, aw rèenjirre hak waw aw ni hak waw. 13 Amma orro ot râanirre hak worro ha e hòm a tigeni gi ba, ot râanirre gbè a 'mîik yey hîina Fay ni tigeni wàa, ha kpètfa ot a gin wun ni tèem worro gi. 14 Orro got hòm a 'mîik tèem worro ba. To ot kpètfa go ngin a gin wun ba, tâa ge tâa ngin kà yey. Amma takundi ot kpètfa ha a gin wun ni sakta Yèk Kâwrra Kristu. 15 Hû go râanum worro ti hòm a tigeni gi ba, got râani ni loca tèem nit ây kana ba. Amma ot dànde, goosum wun ii ge iisirra 'mita, ha ot kpàa tèerra tèem yey hòmge 'mita a tîim wun gi, tâa ge hòm a 'mîik worro ba. 16 Kà yey kpàa got kpàa sakta Yèk Kâwrra ha a riiy ây a ɗàm kpees riiy wun, ngam ta ot râani hak worro ni tèem nit ây a 'mîik kana ba. 17 Amma gàa a defterre Fay: Nit yey yiɗi e râani hak wàa gi, sey e râani yèk Nitcoorra. 18 Ngam ti tâa nit yey gòyni hak wàa ey gòye mbâra ba, amma sey di nit yey gòynu Nitcoorra gi.
