2 Ni-Korintu ây 1

1Miy mi Pawlu, mi nit yey tèem Yeesu Kristu kà yey yiɗi Fay gi, ni Timote kor worro, ot kèpfa dunde dun nit ta Fay kimje a Korintu, 'mèmsa ni nit della ta wàa tâage a dees Akaya lang. 2Nge Fay Too worro, ni Yeesu Kristu Nitcoorra aw hîinu mbâr waw ni tâam mbâri! 3Dàan ot 'misu di Fay Tooy Yeesu Kristu Nitcoorra worro, Tooy 'maton dèy, Tooy kpèwsum a jày pî! 4Ey kpèwsinarre a riirra 'màar worro pî, ha orro ɗa ot kpàa kpèwsum ni kpèwsum yey kpàana a gin Fay gi da nit ây kana riige koo 'màar hâ. 5Kà yey 'mèmsina a 'màar Kristu dèy gi, hû go kpàana ɗa kpèwsum dèy a gin wàa. 6Ot riirre go 'màari, tâa kà yey ngam ha un kpàa kpèwsum ni saarra. Ot kpàarre go kpèwsum, tâa kà yey ngam ha un ɗa un kpàa kpèwsum, un èf tinîir wun a 'màar ây gun rii kà yey riina orro gi. 7Jàk dànda worro dii kpèw a hak wun, ngam ot cèngni, kà yey 'mèmsunu ni orro a riirra 'màari, hû go gun 'mèmsi ɗa a kpèwsum yey kpàana gi. 8Un kor ta worro, ot yiɗi un cèngni yèk 'màar yey kpàagina a dees Asiya. Ngam 'màar maan àye dèy ha hòmna kpèw kpèw worro, ot woofa dànda nge got gûy gi. 9Orro ni hak worro ot dànde nà, ot kpàa kiita wurra mgban. Amma mbire kà yey, ngam ta ot ii jàk dànda tinîir worro a hak worro ba, amma ot ii a gin Fay Tooy gûysum da nit ây wutke gi. 10Ey Tooy saanina a wurra kà yey gi, saaninarre ha kòsòng. Ot iirre jàk dànda worro a gin wàa, nge saa ge saanina bak, 11ye tâa un ɗa un mgbaanjinarre ni waarra Fay ngam worro. Hû go a nit ây dèy gàa gaw gàa mbew di Fay yèk worro, ngam mbâr yey kpàana a waarra waar ây dèy gi. 12Orro got kpàa râanum hak worro ba yi? Ngam dànjum tinîir worro kàlnarre, nge dikri yey dikna a kparri hayye a gin wun gi, e tâage ɓetkumya ni tinîir takundi hîi Fay gi. Dikri maan ti tâa ni còycum isi ba amma ni mbâr wàa. 13Jày kèrfa ot dun a ɗerrewol gi, ti tâa yèk kana ba, sey jàk yey janggunu, raknu a farra. Mi dànde cè gun cèngni mbâra yèk yey, 14ye tâa un ɗaarre cèngnum càa càa, nge orro tâa got tâa jàk râanum wun, un ngaa tâa gun tâa jàk râanum worro a unji dàarra Yeesu Nitcoorra worro. 15Ye tâa mi cèngni mbâra a yèk yey gi, mi yiɗi ɗà mi diksi a gin wun, ngam ha un kpàa mbâr cukti, 16mi dàni nà jòlla a gin wun a dikta mum a dees Makedoniya, mi dàni nà a ita ɗa mi ira a gin wun, ha un isim a dees Yude. 17Ye yiɗim kà yey, mi tèerre tèem èca hakkilo yi? Malla mi dànde kà dànda nirri ha mi jamji gàarra eeye eeye ni oowo oowo yi? 18Kà yey tâa Fay mòorre yèk wàa mbâra gi, hû go yèk worro ɗa a gin wun ti jamji gàarra eeye ni oowo ba. 19Ngam Yeesu Kristu Hàm Fay yey sakna ot dun gi, miy ni Silas ni Timote, ti dàara ngam e jamji gàarra eeye ni oowo ba, amma ey tâage eeye a yèk Fay. 20Ey tâage eeye a yèk ây pî yèe Fay ni mòonjum kàn gi. Kà yey ot gàarre Amen ni ey ha ot 'misunu di Fay. 21Fay ey gòynina dorro ni un a gin Kristu, catkina, 22iigirra dot ticèngsunum, hîigina Jungci Delliya a tinîir worro kà jàk màrra a jàk ây got kpàa gi. 23Mi gàarre ni nîir Fay Tooy seedum jungci mum, mi woofage diksum a gin wun a Korintu, ngam mi atnjirra dun 'màari gi. 24Orro ot kàm ot wûunda dun a goosum ba, amma ot nit mgbaanjum ta wun ɗi a kâwum wun. Ngam a goosum wun un gòyrre kpèw.

will be added

X\