1 Timote 6

1A sàay ây tâage a ti 'mèmni gi pî, sey aw rapti daw da nit ɓèl ta waw aw getke coorra, ngam ta nîir Fay ni yèk kàlnjum wàa e tâa maasumya ba. 2A sàay ây tâage ni nit ɓèl ây goose yèk Fay gi, ta aw luusi daw ba ye tâa aw a kor ây ɗi gi, amma sey aw hòm daw tèerra mbâra, ngam a nit ɓèl ta waw gi a nit goosum ây ɗi, aw ɗa aw kàmde mbita jàk mbâri. Sey mu kàlnji daw, mu sagi daw yèk ây gi. 3To nirri kàlnjirre go yèk kana, mòorre go yèk takundi, yèk Yeesu Kristu Nitcoorra worro, ni yèk tolnji Fak worro ba, 4ey 'misirre hak wàa, ti cèngni koo jâ ba. Kàmde jàk kana ba, sey gatkum yèk ây, ni hàanjum a gin yey ge ana gbokri gi, ni tilètnjum, ni maasum, ni dànda maktiya, 5ni hàanjum yèy a tîim nit ây tâage ni dànda waw mboyrriya, gbeege yèk takundi gi. Aw aw dànde, tolla Fay gi gin kpàarra jày ɗi. 6Takundi, tolla Fay gi gin kpàarra jày ɗi dèy, to 'mèmsi go ni suurra tinîiri. 7Ngam ot lekra ni jày a kparri ba, hû go ɗa got kpàaw yuurra ni jày a kparri gi ba. 8To tiriici diina go ni jàk buta, getna kà yey. 9Amma a nit ây kàmge bèebi dèy, le gaw lek a jàk rûfta, ni tidokri a gayam dèy tâage tâam ray ni tâam makta, yey ge yaani da nit ây a fòon ni gbeerra gi. 10Ngam yiɗum seede e tâage sisi tèem makta pî. A nit ây kana aw dii ni gayam maan, ha aw gbeeye orri aw woofage goosum waw, aw lekni hak waw a jàk àyrra ây dèy. 11Amma muy mu nit Fay, 'nòo jàk ây gi! Fut tâarra ɗèm, ni tolnji Fay, ni goosum, ni yiide, ni èfta tinîiri, ni fetkum tinîiri. 12Haa gbàat mbâra a goosum, mu mòo gûyrra tâam timgbàri yey diimu 'naasumya ngam maan, ye lònum yèk hak wey mbâra a ɗàm kpees nit seedum ây dèy gi. 13Mi mgbènggumde a ɗàm kpees Fay Tooy gûynum jày pî, ni Yeesu Kristu nit yey seede yèk hak wàa mbâra a gin Pontiyu Pilatu, 14furri yèk mgbèngda gi, e tâa mbâriya ɓet ɓet ha a mgbàr lòta Yeesu Kristu Nitcoorra worro. 15Fak mbâri, Tooy Ɓèl kpolo tâage wûun da wûun ây, Tooy coorra da nit coorra ây, ey lò ge lònu di Yeesu Kristu a mgbàr yey gòyni gi. 16Ey kpolo wàa tâage Tooy tâam timgbàri, ge wut ba sam, dii a kayang a gin yey tâa nirri ge hèewrra ba, cen nirri haagu rapta ba, koo wuna ɗa ge kpàaw rapta ba. Dey tâa coorra ni mbinum tâam timgbàri! Amen. 17Mgbèng daw da nit bèeb ây tâarra yey ta aw 'misi hak waw ba, ta aw ii jàk dànda waw a bèeb yey ge lòo gi ba, amma aw ii a gin Fay, hîigina gbaarra jày pî ngam ot ragu kâwum maan gi. 18Mgbèng daw aw tèe jàk mbâri, aw tâa ni tèem della ây dèy, aw tâa nit hîirra hîir ây, aw mîinji jàk ta waw ni nit ây kana. 19Kà yey aw kimjirre yèk hak waw bèeb mbâra takundi ngam unji kana ge dàara gi, ha aw ngor gûyrra yey tâage gûyrra takundi. 20Timote, mòo jàk yey hîiman gi! Jèmfa, woofa yèk ây tâage ɓa hû go tâa ti getnji ni yèk Fay ba gi, ni yèk hàanjum ây rèenggin cèngnum jày gi. 21Ngam a nit ây kana gàagi ni hak waw aw dii ni yèk cèngnum maan gi, aw gbeeye ot goosum. Mbâr Fay e tâanji ni un!

will be added

X\