1 Timote 5

1Ta mu kpânu di toonji ba, amma mu yèewrra mu gàa di too wey. Da lor ây yèe daw mu gàa da kor ta wey, 2di mâynji kin mu gàa di nuu wey, da sapri ây ɗa mu yèe daw ni yèk ɓet ɓet pî mu gàa da say rra wey. 3Coo da kin wurra ây tâage kin wurra ây takundi gi. 4Amma to kin wurra dii go ni hàm ây koo ni hàm hàm ta wàa, sey a hàm ây aw èngni tèerra tèem a tolnji Fay da nit gbaa rra waw, aw insi mbâri di nuu waw ni nuu way waw, ngam kà yey dii kâwrriya a ɗàm kpees Fay. 5Kin wurra takundi tâage kpolo wàa gi, ey ii jàk dànda wàa a gin Fay, gunde mgbaanjum wàa, waawrre tuma ni unji. 6Amma kin wurra yey kàmge kâwsum hak wàa gi, ey wurre koo ye tâa dii beengiya. 7Sey mu mgbèng daw yèk ây gi, ngam ha aw tâa cen yèk kana a hak waw. 8To nirri kpâani dawrre go nisi da nit ta wàa koo da nit àay rra wàa, ey hàanji a goosum, hòm daw makta da nit ây tâa aw goosu di Fay ba. 9Kèr nîir kin wurra to kpèt go yeri ra yira, to tâa go nà ni maa kpolo gi, 10to lònirre go tèem mbâra, ɗir go nà a hàm ây, ngor go da ni-wooy ây, kòle go nay da nit della ta Fay, mgbaanji daw go da nit ây riige 'màari, to futɗe go tèerra tèem mbâra gi pî. 11Amma hàw kèta nîir kin wurra ây tâage sapriya, ngam to aw siisi go tinîiri, woo gaw woofa coorra yèk Kristu, aw yiɗi diksum di nit kana. 12Hû go aw leknirre hak waw a kiita, aw woofage goosum waw woy màrra. 13Aw ɗa aw èngnirre tâam ɓa hû go, aw gîtɗe a àay ây. Ti tâa tâam ɓa hû go gbè ba, amma aw ire ticîinjum yèy, aw lekri yèk ây, aw yèerre jày tâa ti gesi aw yèe ba. 14Kà yey mi yiɗi, a kin wurra ây tâage sapriya aw diksi di nit kana, aw kpàa a hàm ây, aw mòo tèem àay waw, ngam ta aw woo orri da nit yiir ây aw yèe yèk makta ba. 15Ngam a kin ây kana a tîim kin wurra ây gi aw gbeeye orri aw furre Seyɗan. 16Amma to kin goosum dii go ni kin wurra ây a gbaa wàa, sey e mgbaanji daw, ta e toksirra daw tèem maan da nit kimjum ây ba, ngam ha aw kpàa mgbaanjum da kin wurra ây tâage kin wurra ây takundi. 17A toonji nit kimjum ây tèege tèem waw mbâra gi, daw gesi un jing daw diɓoɓo, hayye to aw loo go a sakta yèy, ni kàlnjum jày. 18Ngam gàa a defterre Fay: Ta mu leknurra timûugum a mgbel@yèy di gusi a fòorra tirri ba. Aw gàa ɗa: Nit tèerra tèem gesi e kpàa bèeb tèem wàa. 19Ta mu ngor to aw 'maara go yèk makta a hak toonji nit kimjum ây ba, sey to nit seedum ây cuk koo taan aw seedi go yèk maan. 20Da nit ây mbirge jàk maarra, sey mu yèe daw a ɗàm kpees nit kimjum ây pî, ngam ha nit ây kana ɗa aw toli. 21Mi hàamde a ɗàm kpees Fay ni Yeesu Kristu, ni malayka ây catiya: Mòo yèk ây gi pî cen hàanjum, ta mu tèe tèem wey ni raptum nis nit ây 'nang 'nang ba. 22Ta mu kîr iirra kàn a hak nirri ba, ngam ta mu 'mèmsi a jàk maarra nit ây kana ba. Faasi hak wey mu tâa ɓetkumya. 23Ta mu njoo sòo gbè ba, sey mu njoo mbàl timgbokcum càa ngam àyci himni wey, ni yèk dàngda is wey dàngrum mgbàr kana 'nang 'nang. 24Jàk maarra nit ây kana lòtɗe ɗoko kiita e ii gi, amma a gin nit ây kana lò ge lòt a dat kiita. 25Hû go ɗa tèem mbâra lòtɗe a nis nit ây. Koo tèem kana tòo go lòta, ge tâa fûurriya ba.

will be added

X\