1 Timote 4

1Jungci Delliya gàa takundi, nge a mgbàr gbèeni a nit ây kana woo gaw woofa yèk goosum, fu gaw fut da jungci tirûfrum ây, ni yèk kàlnjum tindòom ây. 2Fu gaw fut da nit tibiw ây rèengri yèk rèeng, tâage dànjum tinîir waw wutiya, mu gàa jàk kpèfrum ni titefki nîige a ebi. 3A nit ây gi aw njangde ata kin, aw kàl dawrre aw woofa riirra tiriit ây kana mbangse Fay, ngam nit goosum ây cèngni yèk takundi gi, ngo gaw ngor ni gàarra mbew. 4A jàk ây mbangse Fay pî delliya ɗi, cen jày tâage ha nirri e hàw ba, to ngotɗe go ni gàarra mbew gi. 5Ngam yèk Fay ni waarra Fay ɗa delsirre jàk maan. 6To mu kàl dawrre go yèk ây gi da kor ây, tâa gum tâa nit mbâra a tèerra tèem Yeesu Kristu, ye tâa yèk goosum ni yèk kàlnjum mbâra tâagum tiriit wey, futmu gi. 7Amma sey mu hàw saga ni-Yude ây tâage raya, delgi daw da mâynji kin ây gi. Hâsi hak wey a tolla Fay! 8Ngam hâsum isi jàk della càa ɗi. Amma tolla Fay jàk della ɗi koo a jâ pî, dii ni jàk wasta yèk gûyrra a tâarra yey ha ɗàm kpeesi. 9Yèk yey takundi ɗi, getke ha koo wuna e ngor gi. 10Ngam maan ot hâtɗe ni riirra 'màari a tèerra tèem, ye tâa ot ii jàk dànda worro a gin Fak beengiya, tâage Tooy saanum nit ây pî hayye da nit ây goosu gi. 11Yèe yèk ây gi pî, kàlnji daw ɗa. 12Ta koo wun e luusum a tâam lor wey ba, amma tâa kà jàk kàlnum da nit goosum ây, a yèerra yèy, ni dikta dikri, ni yiide, ni goosum, ni tâarra ɓet ɓet. 13Ii kpèw kpèw wey a janggunum da nit ây, ni mgbèngda yèy, ni kàlnjum jày, ha ye gim difa gi. 14Ta mu woofa lònum hîir Jungci Delliya ba, yey kpàam a yèk lònum ni iirra kàn toonji nit goosum ây gi. 15Dàn a jàk yey, tèeni ni erra, ngam ha iisum wey a dikta ɗàm kpeesi e lòt a gin nit ây pî. 16Faasi hak wey, ni yèk kàlnjum ɗa, mu rûu a yèk maan. Ngam to mu tèerre go kà yey, saa gum saani hak wey ni nit ây rakum gi ɗa.

will be added

X\