1 Timote 3

1To nirri kàm go tâarra nit tiɗàm kpeesi, ey kàme tèem mbâra. 2Sey nit tiɗàm kpees waw da nit kimjum ây e tâa nirri cen yèk kana a hak wàa, e tâa ni kin kpolo, nit dànda tèes, nit hakkilo, nit mbâri, nit ngota ni-wooy ây, nit mbinda kàlnjum. 3Ta e tâa nit râmrum mbàl koo nit hàargum gbàaci ba, amma e tâa nit mgbergum yèy. Ta e tâa nit lètnjurum koo nit yiɗum seede ba. 4Sey e tâa nit yey mbinge mòorra nit àay rra wàa mbâra, e tâa ni hàm ây rake tuy, tâage mbâra a nis nit ây. 5Ngam nit tiɗàm kpeesi to mbin go mòorra nit àay rra wàa ba, kà ge mbin faarra da nit ta Fay kimje gi ya? 6Ta e tâa ɗa nit fûuya a goosum di Fay ba, ngam ta e 'misi hak wàa, ha e yaa a kiita Seyɗan ba. 7Sey e tâa ni seedamku mbâra a gin nit ây tâa aw dàara a kimjum ba, ngam ta aw yèe yèk makta a hak wàa, ha e lek a tidokri Seyɗan ba. 8Hû go nit tèem mgbaanjum ây a tîim nit kimjum ây ɗa sey aw tâa mbâra a nis nit ây, ta aw tâa nit yèk cuk cuk ba, ta aw njoorgi mbàl dèy ba, ta aw tâa nit yiɗum kpàarra jày ni tèem makta ba. 9Sey aw mòo yèk yey tâage nà fûurriya a goosum gi ni dànjum tinîir burriya. 10Amma ɗà sey aw gerri daw, ngam to yèk kana cen go a hak waw ba, a dat maan aw mòo tèem mgbaanjum gi. 11Hû go ɗa kin ta waw sey aw tâa mbâra a nis nit ây, ta aw cîinji yèy ba, aw tâa ni dànda tèes, aw tâa kin mbâr ây a jày pî. 12A nit tèem mgbaanjum ây sey aw tâa nirri ni kin kpolo, aw mbin mòorra hàm ta waw ni nit àay rra waw mbâra. 13Ngam nit tèem mgbaanjum ây tèege tèem waw mbâra, aw kpèrre ni hak waw a gin gòyrra mbâra, kpàa gaw kpàa yèerra jày pî tolnji cen a goosum a nîir Yeesu Kristu. 14Mi dànde, di gim difa a gin wey ɗàm kpeesi càa. Amma mi kèrumfarre yèk ây gi, 15ngam to mi tòofa go dikta, ha mu cèngni jày gesi mu mbir a tîim mûsa nit kimjum ây tâage nit ta Fak beengiya, tâage kpiir tigòyni yèk takundi ni gin tata wàa gi. 16Fûurra yèk Fay gi dii 'mitiya, takundi, nirri ge kpàaw hàanjum ba: Ey lòrre ni isi, tâaye ɗèm ni Jungci Delliya, lòtɗa dawge da malayka ây, tâaye kàlliya a gin nit dees ây, aw goosuge a kparri, Fay naansuge a 'mita wàa.

will be added

X\