1 Timote 2

1Màrra mi mgbèngnu, un lòni di Fay jàk gunda, ni waarra, ni kàmda yèk nit kana, ni gàarra mbew ngam nit ây pî, 2ngam wûun ây, ni nit ɓèl ây, ha ot kpàa tâarra mbâra cen yèk kana, ot tâa nit ây tolge Fay, ot tâa mbâra a nis nit ây. 3Kà yey dele, dii kâwrriya a ɗàm kpees Fay Tooy saanum worro. 4Ey yiɗi ha nit ây pî aw saa, aw kpèt a cèngnum yèk takundi. 5Ngam Fay dii kpolo. Nirri kpolo tâarre nit raknjum a tîim Fay ni nit ây, Yeesu Kristu ɗi, 6yey hîige hak wàa ha e sàasi da nit ây pî aw tâa tiròom. Hû go ey lòne yèk Fay a mgbàr yey getke gi. 7Ngam maan Fay de iimi mi tâa nit kàlla yèk yey, ni nit tèerra. Mi yèerre takundi, mi rèengde ba, mi kàlnjirre yèk goosum ni yèk takundi da nit ây èege yèk Fay. 8Mi yiɗi, a nihun ây aw waa Fay koo u hâ pî, aw aanji kàn ta waw ni tinîir ɓet ɓet, cen ngòlnji, cen hàanjum. 9Mi yiɗi ɗa, ha nikin ây aw mgbap lurra kày gesi gi ni hakkilo, cen ɗèpsum. Della waw ta e tâa ni ndàta hay, koo ni jàk kangeerri, koo ni tiɗoon ây, koo ni jàk mgbapta yey àyge sàari ba, 10amma ni tèem mbâri, kà yey gesi da nikin ây yiɗi aw lòni tolnji Fay, aw coow gi. 11Sey nikin e èngni jày ni tâarra baak baak, ni rakta tuy. 12Mi hîiw orri di nikin e kàlnji jày ba. Ta e ii hak wàa e hòmu di nihun ba, sey e tâa baak baak. 13Ngam Fay mbangsi màrra Adam, a dat maan Hawa. 14Adam ɗa ti ngor jàk rûfta Seyɗan ba, amma kin wàa kîrge ngota, yewge yèk Fay. 15Amma nikin saa ge saa ni kpàarra hàm ây, to gòyrre go a goosum, ni yiide, ni tâam delliya, 'mèmsa ni hakkilo gi.

will be added

X\