1 Ni-Tessaloniki ây 5

1Un kor ta worro, un cen ni gayam, ha ot kèrfa dun jày a yèk mgbàr maan ni unji maan ge mbir jàk ây gi ba. 2Ngam un ni hak wun un cèngni mbâra, unji Nitcoorra dàa ge dàara kà oori ni tuma. 3A nit ây aw gàarre go «jày pî dii mbâra, gòyrre kpèw», gbeerra kpè ge kpèt daw yaale, kà àyrra hàm di kin himni a ye ge kpàa gi, gaw saa ba sam. 4Amma un kor ta worro, un cen a kulpi ha unji maan e kpètɗa dun kà oori ba. 5Un pî un hàm kayang ây ɗi, un hàm unji ɗi. Orro ot cen a tuma, koo a kulpi ba. 6Hû go ta ot kûu kà nit ây kana ba, amma dàan ot mûyi, ta ot tâa kà nit râmda mbàl ba. 7Ngam a nit ây kûuge gi, ni tuma kûun. A nit ây râmi daw mbàl gi, ni tuma râmi daw. 8Amma orro ot nit unji ɗi, ta ot tâa kà nit râmda mbàl ba. Dàan ot mgbap goosum ni yiide kà lurra titefki, ot kupti jàk dànda a saarra kà darrhak titefki. 9Ngam Fay ti iina ha ot kpàa ngòlnji wàa ba, amma ot kpàa saarra a gin Yeesu Kristu Nitcoorra worro. 10Ey wurre ngam worro, ngam ha ot gûy ni ey, koo ot tâa go wutiya, koo beengiya a ye ge dàara gi. 11Hû go kpèwsinjin tinîiri a tîim wun, nit kpolo e mgbaanju di nit kana a goosum, kà yey mbitnu nà mgban gi. 12Amma mi waanurre un kor ta worro, coon da nit ây hârge ni tèerra tèem a tîim wun, ni nit ây ɗàagunu kpeesi a yèk Nitcoorra, mgbènggunu gi. 13Coon daw dèy ni yiide ngam tèem waw. Tâanjin mbâra a tîim wun! 14Un kor ta worro ot kàlnurre, mgbènggin daw da nit taski ây, kpèwsin daw da nit tolnji ây, mgbaanjin daw da nit ây tâage dàngdiya gi, èfin tinîir wun a gin nit ây pî. 15Faasin hak wun, ngam ta koo wuna e insu maarra di nit kana mbirgu maarra ba. Amma kàmin tèerra tèem mbâra koo ningàa a tîim wun, ni gin nit ây pî. 16Tâan ni tinîir kâwrra koo ningàa! 17Waan Fay cen woorra! 18Gàan mbew di Fay koo a jâ pî. Ngam kà yey yiɗi Fay un mbiri, un nit ây 'mèmse ni Yeesu Kristu gi. 19Ta un kûysifa Jungci Delliya ba. 20Ta un luusi yèk nit lònum yèy ba. 21Amma gerrin jày pî, mòon jày tâage mbâra gi. 22Faasin hak wun a jày pî tâage jàk makta gi! 23Fak mbâri ey ni hak wàa e ɓetkununu a tâam wun lang! Dànda wun, ni jungci wun, ni is wun pî e tâa faarriya, cen yèk kana a unji yey ge dàara Yeesu Kristu Nitcoorra worro. 24Fay 'naasunu gi, Fak gòyrra mbâra a yèk wàa ɗi, tèe ge tèera dun kà yey. 25Un kor ây, waan Fay ngam worro! 26Kèbin da kor ây pî ni tikapni kor goosum ây! 27Mi waanurre ni nîir Nitcoorra, janggin ɗerrewol yey a gin kor goosum ây pî. 28Mbâr Yeesu Kristu Nitcoorra worro e tâanji ni un!

will be added

X\