1 Ni-Tessaloniki ây 4

1Un kor ta worro, yèk kana ngas dotke. Orro ot kàlnuge, kày gesi dikri wun e delu di Fay. Koo ye tâa un mbitɗe hû go, ot waanurre ot mgbèngnurre ni nîir Yeesu Nitcoorra, un iisirra dikta ɗàm kpeesi ɗàm kpeesi a dikri maan. 2Ngam un cèngni yèk mgbèngda Yeesu Nitcoorra, yey kàlna ot dun gi. 3Fay yiɗi un ɓetkini hak wun, un woofa njeenu. 4Koo wuna a tîim wun sey e cèngni, kày ge at kin, aw lòni tâam delliya a nis nit ây, 5naa a gbaarra gayam, kà yey mbirin a nit ây tâa aw cèngni Fay ba. 6Ta nirri a tîim wun e yew, e mbiru jàk maarra ni gâra di kor wàa ba. Ngam Nitcoorra kà ge kànsi jàk ây gi pî, kà yey kàlna ot dun, yèenu ot dun mgban gi. 7Fay ti 'naasina ot tâa 'miskumya a ɗàm kpees wàa ba, amma 'naasina ot tâa delliya. 8Hû go to nirri hàw go yèk yey, ti tâa di nirri hàwe ba, amma hàwu di Fay hîigunu Jungci Delliya gi. 9Amma a yèk yiide a tîim kor goosum ây, ot cen ni gayam ha ot kèrfa dun jày ba. Ngam un ni hak wun un èngni a gin Fay, gesi un yiɗinji a tîim wun. 10Un kàlnirre yiide kà yey da kor ta wun tâage a dees Makedoniya lang. Amma un kor ta worro ot gàanurre, iisirran mbita kà yey, un dik ɗàm kpeesi ɗàm kpeesi. 11Hârin tâarra mbâra a tîim nit ây, iin nis wun a jàk ta wun, tèen tèem ni hak wun kà yey mgbèngna ot dun gi. 12Hû go tâa gun tâa mbâriya a nis nit ây tâa aw cèngni yèk Fay ba, gun tâa ni gayam a jàk kàn nirri ba. 13Un kor ta worro, ot yiɗi un èe cèngnum yèk nit ây wutke gi ba, ngam ta tinîiri e àynu kà nit ây kana, tâa aw cen ni jàk dànda a yèk maan ba. 14Ngam ot goosirre, Yeesu wurre gûysige. Hû go ot goosi ɗa, nge a nit ây goosu wutke gi, Fay gû ge gûysi daw e koyni daw ni ey. 15E rri yey ot kàlnurre kà yey gàa nà Nitcoorra: Ot nit ây tâage beengiya, ngaske a mgbàr dàarra Nitcoorra gi, got ɗàa daw anda da nit ây wutke gi ba. 16A unji maan Nitcoorra ni hak wàa a ge ana a faktiturum, a rakta tibimni ni gûn ɓèl waw da malayka ây, ni rakta ti uta Fay. A nit ây goosu di Kristu wutke gi, ɗàa gaw ɗàa anda. 17A dat maan ot nit ây got ngas beengiya gi, orro ngaa a gaw atna ot 'mèmsi ni aw a titurum, ha ot kpàanji ni Nitcoorra u fay. Kà yey tâa got tâanji ni ey tâam timgbàri. 18Rûunjin ni yèk ây gi a tîim wun!

will be added

X\