1 Ni-Tessaloniki ây 2

1Un kor ta worro, un ni hak wun un cèngnige, ye difa ot a gin wun, tèem worro ti tâa ɓa hû go ba. 2Un cèngni ɗa, ot rii nà 'màari a Filippi, aw ɗàana ɗàari a farra. Amma koo hû go Fak worro hîinage mòorra tinîiri, ha ot saknu Yèk Kâwrra wàa ni tihàanjum dèy. 3Ngam sakta yèk worro ti tâa yèy anga a yèk rèeng, koo a tèem 'miskum, koo a gâra ba. 4Amma ot yèerre kà yey yiɗi Fay, ngam ey rapna ot gerre sakta Yèk Kâwrra, de hîina yèk maan. Hû go ot yèerre ngam kâwsum di nirri ba, amma ha ot kâwsu di Fay. Ey cèngni tinîir worro. 5Orro ot haa yèerra ha ot kâwsi tuk nirri ba, kà yey cèngnunu gi. Ot dàara ot ii gâra kpàarra jày ba, Fay seedirre jàk yey. 6Orro ot kàm ha a nit ây aw 'misina ba, koo a gin wun, koo a gin nit ây kana ba, 7koo ye tâa got kpàa iirra hak worro kà nit ɓèl ây, ngam ot nit ây tèena Kristu ɗi gi. Amma ot mgbergirre yèk worro a tîim wun, kà kin ɗirge hàm wàa. 8Un lukna nisi, gesina ha ot hîinu naa Yèk Kâwrra Fay gbè, amma jungci is worro ɗa. Ngam ot yiɗunuge. 9Un kor ta worro, un ɓaysirre yèk hâta tèem worro ni loca worro tuma ni unji, ngam ot yiɗi ot loosu koo di nirri kpolo a tîim wun ba, ye tâana a tîim wun ot saknu Yèk Kâwrra Fay gi. 10Un un seedirre, ni Fay ɗa, tâam worro a tîim wun un nit ây goose gi ɓetkumya ɗi, ɗèm ɗi, cen yèk kana a hak worro. 11Un cèngni, ot mbire koo di wuna a tîim wun kà tooy mbirge da hàm ta wàa. 12Ot rûusunuge, ot ndèksunuge. Ot mgbèngnuge un dik kày gesi a ɗàm kpees Fay, 'naasunu a wûun wàa ni 'mita wàa gi. 13Hû go ot woofa gàarra mbew di Fay ba. Ye 'maafa ot yèk Fay a gin wun, un rage, un ngor kà yèk nirri ba, amma kà yèk Fay. Takundi yèk Fay ɗi tèege a tîim wun, dun nit ây goosu gi. 14Un kor ta worro, un furre da nit ta wàa di Fay ni Yeesu Kristu, kimje a dees Yude gi. Ngam un ɗa un rii 'màari a tîim nit ta wun kà yey riin aw ɗa 'màari a tîim nit ta waw ni-Yude ây, 15a ni-Yude ây ɓàrge Yeesu Nitcoorra, ni nit ây lòni nà yèk Fay gi. Aw mànna dorro ɗa. Tèem waw ti delu di Fay ba, aw a nit yiirra nit ây ɗi pî. 16Aw njangna sakta yèk saarra da nit ây èege yèk wàa. Hû go jàk maarra waw iisirrarre mûurra koo ningàa. Amma ngòlnji Fay tèksi dawge mgban. 17Un kor ta worro, ye tâa ot ɗòlnji ni un unji càa ni nisi, amma ni tinîiri ot ɗòlnji ba, gaynarre dèy ha ot hâtɗe kàmda orri ngam ot rapnu. 18Kà yey ot yiɗi ot isifa a gin wun, miy mi Pawlu mi haawe unji 'nang 'nang, amma Seyɗan njangnage orri. 19Ji tâagina jàk dànda worro, ni jàk kâwsum tinîiri, ni jàk 'misunum hak worro gi ya? Naa un ɗi a ɗàm kpees Yeesu Nitcoorra worro, ye ge dàara gi naa? 20Ngam un tâagina 'mita worro ni kâwum tinîir worro.

will be added

X\