1 Piyèr 5

1Miy mi toonji nit kimjum ây, mi nit seedum a 'màar Kristu, mi nit 'mèmsum a 'mita yey ge lòt gi ɗi, mi mgbèngnurre dun toonji nit kimjum ây ɗa, mi gàanurre: 2Faan tikukri Fay tâagunu hîirriya gi, faan daw ni yiide tinîiri kà yey yiɗi Fay, ta un ndak daw ba, ta un yiɗi kpàarra jày ba, amma faan daw ni tinîiri pî! 3Ta un tâarra daw tâam wûun da nit ta wun ba, amma tâan kà jàk kàlnum da tikukri ây gi. 4Hû go kpàa gun kpàa tikangni hak 'mita yey tâa ge mgbanti ba, a ye ge lòrra wûun waw da hàm faat ây gi. 5Un lor ây ɗa, ragin daw tuy da toonji ây! Un pî ûuninjin hay a tîim wun ha un mgbaanjiri, ngam Fay njanggi dawrre da nit ây 'misi hay, amma hîi dawrre mbâr wàa da nit ây ûuni hay gi. 6Ngam maan ûunin hak wun a kpèw kpèw kàn Fay, ngam ha e aanjunu a mgbàr yey gese gi. 7Iin loca dànda tinîir wun pî a gin wàa, ngam ey faanurre. 8Waatin mbâra, mûyin! Ngam Seyɗan nit yiir wun gîtɗe kà tidîisi guske gi, kàmge nirri ha e tufi. 9Gòyin a gin wàa ni mòorra kpèw a goosum, ɓaysin a kor ta wun tâage a kparri lang gi aw ɗa aw riirre 'màari kà yey. 10A dat ye riinu 'màari unji càa, Fay tâage ni mbâri pî, 'naasunu ni Kristu a 'mita wàa tâam timgbàri gi, ey ni hak wàa mba ge mbangsunu pî, e kpèwsunu, e gòynunu, e rîinunu. 11A gin wàa tâa mbinum tâam timgbàri ha tâam timgbàri! Amen. 12Mi kèrfa dun yèk yey càa ni kàn Silas, kor mbâra kà yey dàni miy gi. Mi mgbèngnurre mi seedunurre, yey tâage mbâr Fay takundi. Gòyin kpèw a mbâr maan! 13A nit kimjum ây a Babilon tâage catiya kà un gi, aw kèpfa dunde, 'mèmsa ni Marku hàm mum ɗa. 14Kèpnjin ni tikapni yiide. Tâam mbâri e tâanji ni un pî tâage nit ta Kristu gi!

will be added

X\