1 Un nikin ây ɗa, sey un ûuni hak wun a gin maa rra wun, ngam to nit kana a tîim waw ii go tuy a yèk Fay ba, ge kpàa e kpèt a goosum ngam dikri wun, koo cen yèerra yèy. 2 Go ge gop dikri wun ɓetkumya a tolnji Fay. 3 Ta della wun e tâa ni lèerra tilèem a dat isi, koo ni ndàta hay, koo ni iirra jàk kangeerri, koo ni mgbapta lurra delliya ba, 4 amma e tâa a tinîir wun, ni dànda yey tâa ge gbee ba gi, tâage fetkum tinîiri ni tâarra baak baak, e tâage 'mitiya a ɗàm kpees Fay. 5 Ngam kà yey lèen nà tilèem mgban a nikin ây tâage delliya a ɗàm kpees Fay, iige jàk dànda waw a gin wàa gi. Aw ûuni nà hak waw a gin maa rra waw, 6 kà Sara raku tuy di Abraham, 'naasu «nit coorra» gi. To un tèerre go kòsòng jàk mbâri, un woo go jày e tolsunu a mbita kà yey ba, hû go un tâage hàm ta Sara. 7 Un nihun ây ɗa ɓaysin, a kin ta wun aw a yòot dàngda is ây ɗi. Gobin daw mbâra, ngam aw 'mèmsi ni un a kpàarra jàk koyrra jungci a mbâr Fay. Mbirin kà yey, ngam ta jày e njang waar wun a ɗàm kpees Fay ba! 8 A gbèeni yèk ây gi pî, tâan ni dànda kpolo, raknjin 'màar ta wun ni kâwum wun, yiɗinjin a tîim wun kà kor ây, tâan ni 'maton, ûunin hay! 9 Ta un insi tèem makta ni tèem makta, koo tinjàmni ni tinjàmni ba, amma mbârsin daw da nit ây gi ni waarra Fay, ngam Fay 'naasunu un kpàa mbâr wàa, e tâagunu jàk koyrra gi. 10 Hû go gàa a defterre wàa: Nit yey yiɗi kâwum a gûyrra wàa, yiɗi e rap unji mbâr ây gi, sey e woofa yèerra yèk makta, ta mgbelyèk wàa e yèesirra yèk rèeng ba. 11 Sey e ir e woofa jàk makta, e tèe jàk mbâri, sey e kàm tâam mbâri, e furri. 12 Ngam nis Tooy Ɓèl dii rapti dawrre da nit ây gòyge ɗèm. Tuk wàa dii faarumya ngam rakta waar waw. Amma ey ini mârngi wàa a gin nit ây tèege tèem makta. 13 Wun ge mbitnu jàk makta, to un rîi go kpèw a tèerra jàk mbâri gi ya? 14 Amma un dii ni kâwum, koo un rii go 'màari yèk gòyrra ɗèm. Ta un tol daw ba, ta un woo daw aw yûusunu a tâam wun ba. 15 Coon di Kristu e tâa Nitcoorra a tinîir wun! Goosin yèy koo ningàa, to nirri gunnu go jày a yèk dànda wun gi. 16 Amma goosin daw ni fetkum tinîiri, ni coorra, un tâa ni dànjum tinîir mbâra, ngam ha lawsam e mòo daw da nit ây maasunu yèk dikri wun mbâra a gin Kristu gi. 17 Ngam hòme della, to Fay yiɗi go kà yey, nirri e rii 'màari yèk tèerra jàk mbâri, ni riirra 'màari ngam tèerra jàk makta. 18 Ɓaysin, Kristu wurre nak kpolo ngam jàk maarra nit ây, ey nit ɗèm ɗi wurre ngam nit ây èege gòyrra ɗèm, ha e 'maana a gin Fay. Aw ɓàru isi, amma Fay gûysu ni Jungci. 19 Ni Jungci gi dige e sak daw Yèk Kâwrra da jungci ây tâage a tâam 'mèmdiya, 20 da jungci nit ây tâa nà aw ragu mgban tuy di Fay ba, ye èfe tinîiri waati daw a unji Nuhu mgbàr mbangsum koombowal ɓèl gi. A farra sey a nit ây càa nan nan gbè saage a sòo. 21 Saarra maan tâage jàk lònum a saarra yey kpàanu ni baptisma kòsòng gi, ti tâa ni kòlla jàk 'miskum a isi ba, amma ni waarra di Fay ha e hîinu dànjum tinîir mbâra. Yèk saarra gi tâa hû go ngam Yeesu Kristu gûysige a wurra. 22 Ey naaye a faktiturum, tâarre a riina Fay, wûunde a hak malayka ây, ni jàk mbinum ây kana ni jàk kpèw kpèw ây pî.
