1 Piyèr 2

1Hû go woofan tèem makta pî, ni gâra pî, ni tibiw, ni ngèeri, ni njeerra yèk makta pî! 2Tâan kà hàm ây kpàan daw kòsòng gi, un yiɗi mboom takundi, mboom yèk Fay, ngam ha un 'mit ni erra un saa, 3ye tâa un haawe mgbergum Nitcoorra, kà yey gàa nà a defterre Fay gi. 4Dàaran a gin Nitcoorra! Ey tâage gòok beengiya yey 'màktufan a nit ây gi, amma dii catiya, 'mitiya a gin Fay. 5Dàaran ha un ɗa un tâa gòok ây beengiya, un 'mèmsi a jâanum àay Jungci Delliya, un tâa nit daprum ta Fay delliya, un 'maa jàk gurfum ây ni Jungci Delliya a ɗàm kpees Fay, dii ngotiya ngam Yeesu Kristu gi. 6Ngam gàa a defterre Fay: E rri yey mi iirre gòok tigòyni àay tâage catiya 'mitiya, a Siyona. Nit yey goosu gi, lawsam ge mòow ba. 7- 8Gòok maan tâanu jàk 'mitiya dun nit ây goose gi. Amma gòok yey a nit jâarra ây 'màktifa irge gòok tigòyni àay gi, de tâa daw gòok timgbòlnji ni kpata yaanum da nit ây tâa aw goosi ba. Aw mgbòlle ngam aw ii tuy a yèk Fay ba. De tâan hû go. 9Amma un tâage yòot catiya, nit daprum ta wûun, nit ây delliya getke tâarra nit ta Fay, ha un sak tèem mbâr Fak yey 'naasunu ye tâanu nà a kulpi, ha un lek a kayang wàa delge dèy gi. 10Mgban un un tâa nà nit ta Fay ba, amma kòsòng un nit ta wàa ɗi. Mgban un cèngni nà 'maton Fay ba, amma kòsòng un kpàa 'maton wàa. 11Un nit ây yiɗim dun gi tâage kà ni-wooy ây kà nit leksum ây a deesi gi, mi waanurre, woofan gayrum jàk isi haage gbàaci a tinîir wun. 12Digin dikri mbâra a tîim nit ây èege yèk Fay, ngam koo ye tâa aw gàanu un nit tèerra tèem makta ây ɗi gi, aw rap tèem wun mbâra, ha aw 'misi Fay a unji gbèeni. 13Uunin hak wun a tèem nit ɓèl ây pî yèk Nitcoorra! Coowan di Kaysara wûun ɓèl, hòmge mbinum koo di wuna. 14Coowan di ngomna, ye tâa Kaysara tèegu gi ngam iirra kiita da nit ây tèege tèem makta, ngam ɓòlmum da nit ây tèege tèem mbâra. 15Fay yiɗi ɗa, un njang daw yèerra yèk èca cèngnum jày da nit rak ây ni tèerra tèem mbâri. 16Tâan kà tiròom ây, amma ta un ii tâam tiròom wun tibuni tèem makta ba! Tâan kà sàay rra Fay! 17Coon da nit ây pî, yiɗin daw da kor ây, tolin di Fay, coowan di Kaysara! 18Un nit tèerra tèem ây, ûunin hak wun a gin nit ɓèl ta wun ni tolnji, naa da nit mbâr ây ni nit mgbergum yèk ây gbè, amma da nit ây ndèk daw hakkilo gi ɗa. 19Dele to nirri èf go tinîir wàa yèk Fay, e rii 'màar yey tâa ti gesu e rii ba gi. 20Mbâr hâ gun kpàa, to un rii go 'màari, aw cupnu go ngam jàk maarra wun tèenu gi ya? Amma to un èf go tinîir wun a riirra 'màari yèk tèem mbâri tèenu gi, kà yey dele a ɗàm kpees Fay. 21Fay 'naasunu a jàk ây gi, ngam Kristu ɗa rii 'màari ngam wun, woonu orri ha un fut nak wàa. 22Ey ti tèe jàk maarra ba, yèk rèeng ti haa yuurra a mgbelyèk wàa ba. 23Ye njàmruwan gi, ti njàmsi ba. Ye riisuwan 'màari gi, ti kpân daw ba, amma hîi hak wàa di Tooy hiitum ge hiiti ni ɗèm gi. 24Ni is wàa toge jàk maarra worro, naani a minjum kpiiri, ngam ha jàk maarra worro e tâa wutiya, ot gûy a gòyrra ɗèm. Ni nuki tilèfni wàa kpàana ndòosum. 25Ngam mgban ot dii nà kà mgbâay gbeerra ây, amma kòsòng ot ira a gin nit yey tâage hàm faat worro, ni nit waatum worro gi.

will be added

X\