1 Piyèr 1

1Miy mi Piyèr mi nit yey tèem Yeesu Kristu gi, mi kèpfa dunde un nit ây cat dun Fay, tâage ni-wooy ây a kparri, yeske a dees Pontus, ni Galatiya, ni Kapadokiya, ni Asiya, ni Bitiniya. 2Fay Tooy Ɓèl catnuge kà yey tâa dànda wàa diga màrra gi, delsunu ni Jungci wàa, ha un rak tuy di Yeesu Kristu, un kpàa mèsta njîim wàa. Fay e hîinu mbâr wàa ni tâam mbâri dèy ni ɓèlla! 3'Mita e tâaw di Fay Tooy Yeesu Kristu Nitcoorra worro, insina fûuya ni gûysum di Yeesu Kristu a wurra gi! Hû go ot dii ni jàk dànda beengiya, 4ot dii ni jàk koyrra yey iina Fay a faktiturum. Jàk koyrra maan ge raa ba, ge 'miski ba, ge yûk ba. 5Ye tâa un goosu di Fay, ey faanurre ni mbinum wàa, ha saarra yey mbangse e lòt a mgbàr gbèeni gi. 6Kâwsin tinîir wun a yèk maan, koo ye tâa gesi kòsòng un kpàa àyrra tinîiri a riirra 'màar ây 'nang 'nang unji càa. 7A 'màar ây gi tâa gaw tâa tigeni a goosum wun, ha e hòmu della di kangeerri ge lòo gi yey gerruwan ni ebi, ha un kpàa ɓòlmum, ni 'mita, ni coorra a unji yey ge lòrra Yeesu Kristu gi. 8Un yiɗurre dey koo ye tâa un rabu ba, un goosurre koo ye tâa un rabu kòsòng ba, un kâwsirre tinîir wun ni kâwum yey tâa nirri ge kpàaw yèerra ba, mûuge ni 'mita gi. 9Ngam ngo gun ngor gbèeni goosum wun, tâage saanum jungci wun. 10A nit lònum ây lòni nà mgban yèk mbâr Fay a hak wun gi, aw kàmde nà aw gatkirre a defterre yèk saarra maan. 11Aw kàmde nà cèngnum, unji hâ ni jàk jâ ge mbir jàk yey kàlni Jungci Kristu tèege a gin waw gi. Jungci gi ɗàa daw kàlla 'màar ây ge rii Kristu, ni 'mita yey ge futwa a dat maan gi. 12Fay lòni daw nge yèk yey kpàan gi, ti tâa ngam hak waw ba amma ngam wun ɗi. Yèk maan un kpàa kòsòng, ye tâa a nit sakta ây aw saknurre Yèk Kâwrra ni mbinum Jungci Delliya tâage tèerriya diga faktiturum gi. Yèk maan koo a malayka ây ɗa aw yiɗirre aw cèngni. 13Ngam maan iin hakkilo wun kpèw, waatin mbâra, un gòyni jàk dànda wun pî a mbâr yey gun kpàa a unji lòta Yeesu Kristu. 14Tâan hàm ta Fay rake tuy gi, ta un insi hak wun a dikri yey diknu nà mgban, ni gayrum jàk ây a èca cèngnum jày gi ba. 15Amma tâan delliya a ɗàm kpees Fay ni dikri wun pî, kà yey tâa Tooy Ɓèl delliya 'naasunu gi. 16Dii kètiya a defterre Fay, gàa: Tâan delliya a ɗàm kpees mum, ngam miy mi dii delliya. 17To un 'naasirre go «Tooy» di Fak yey tâa ti raptirre nis nit ây 'nang 'nang ba, hiitirre koo di wuna kày tâa tèem wàa gi, hû go sey ni tolnji a ɗàm kpees wàa, un dik dikri wun a tâam yey tâanu ni-wooy ây a deesi gi. 18Un cèngni, un dii sàasumya a dikri yey diknu nà ɓa hû go a hàar wosom ta wun, ti tâa ni jày ge lòo kà sarrdi koo kangeerri gi ba, 19amma ni sàar njîim Kristu àyrriya, tâage kà njîim hàm mgbâay ɓet ɓet, yèk kana cen a hak wàa gi. 20Fay carru mgban di Kristu kà yey ɗoko mbangse kparri, amma sey kòsòng a mgbàr gbèeni lòrra ngam wun. 21Ngam Kristu un goosu di Fay, gûysu a wurra gi hîigu 'mita, ha goosum wun ni jàk dànda wun e tâa a gin Fay. 22Un dii ɓetkumya ni rakta tuy a yèk takundi, ngam ha un kpàa yiɗum kor ây cen tibiw gi. Hû go yiɗinjin a tîim wun dèy ni tinîiri kpolo! 23Un ire nit fûuya naa ni yòot yey ge raa gi, amma ni yòot yey tâa ge raa ba, ni yèk Fay tâage beengiya tâage tâam timgbàri gi. 24Ngam gàa a defterre Fay: A nit ây pî aw dii kà bàsi. 'Mita waw pî dii kà bista jày. Bàsi yûkɗe, bista jày yaarirre, 25amma yèk Nitcoorra tâarre tâam timgbàri. Yèk maan tâage Yèk Kâwrra yey raknu gi.

will be added

X\