1 Yuhanna 3

1Raptuwan kày yiɗi dot Tooy dèy gi, ha de kpàana înda di hak worro hàm ta Fay! Hû go tâana ɗa. Ngam a nit kparri ây aw cèngnu di Fay ba, aw cèngnina ɗa ba. 2Un nit ây yiɗim dun gi, kòsòng ot hàm ta Fay ɗi, amma tâam worro ti lòt kày got tâa go ba. Amma ot cèngni, ye ge lòrra Kristu, rèe got rèenji ni ey. Ra got rabu kày tâa gi. 3Koo wun tâage ni dànda yey a gin Kristu gi, e ɓetkini hak wàa kà yey tâa Kristu ɓetkumya gi. 4Koo wun mbirge jàk maarra ya, yewe a yèk mgbèngda, ngam jàk maarra tâage yewrra a yèk mgbèngda. 5Un cèngni, Yeesu Kristu lòrrage ngam e dàa e atfa jàk maarra da nit ây. Dey jàk maarra cenu ba. 6Nit yey 'mèmse ni ey gi, ge mbir jàk maarra ba. Amma nit yey mbirge jàk maarra gi, ti rabu ba, ti cèngnu ba. 7Un hàm ta mum, ta un woo nirri e rûfnu ba! Nit yey tèege tèem ɗèm gi, nit ɗèm ɗi kà yey tâa Yeesu nit ɗèm. 8Amma nit yey mbirge jàk maarra gi, ey nit Seyɗan ɗi, ngam Seyɗan tâage timbirgum jàk maarra diga ɗaarra. Yòo maan Hàm Fay de dàara, ha e gbeesifa tèem Seyɗan. 9Koo wun tâage hàm Fay ya, ge mbir jàk maarra ba, ngam gûyrra wàa ana a gin Fay. Ge kpàaw mbita jàk maarra ba, ngam ey hàm Fay ɗi. 10Koo wun tâa ti tèe tèem gòyrra ɗèm a ɗàm kpees Fay ba, to yiɗi go ɗa kor wàa ba, ey nit Fay ɗi ba. Kà yey lòrrin a hàm ta Fay ni hàm ta Seyɗan. 11Sey ot yiɗinji a tîim worro, kà yey tâa yèk yey raknu nà diga màrra gi! 12Ta ot tâa kà Kaynu tâage nit Seyɗan, ɓàrge kaa wàa gi ba. Ngam jâ ɓàruwa? Ngam tèem wàa maktiya ɗi, amma tèem kaa wàa ɗèm ɗi. 13Un kor ta mum, ta e tâanu 'nang ba, to a nit ây a kparri aw yiinu go gi. 14Ot cèngni, ot saa a wurra, ot lege a gûyrra. Ot cèngni kà yey, ngam ot yiɗi daw da kor ta worro. Nit yey tâa yiide cenu ba, dii tâarre a wurra. 15Koo wun yiige kor wàa ya, ey nit ɓàta nirri ɗi. Un cèngni, cen nit ɓàta nirri ge kpàa gûyrra tâam timgbàri ba. 16Ot cèngni kày tâa yiide, ngam Yeesu hîi hak wàa e wut ngam worro. Gesi orro ɗa ot hîi hak worro ngam kor ta worro. 17Nit yey tâage ni bèebi a kparri gi, to rap go di kor wàa èege jày, amma ti yiɗi e hîiw jày ba, kà ge yiɗu di Fay a tinîir wàa ya? 18Un hàm ta mum, ta ot yiɗi da nit ây ni yèk kâwrra a mgbelyèy gbè ba, amma ni tèerra tèem, ni takundi ɗa. 19To ot yiɗirre go kà yey, cè got cèngni ot dii a takundi, ot suusirre tinîir worro a ɗàm kpees Fay. 20Ngam koo tinîir worro yaanina go a kiita, ot cèngni, Fay hòmu 'mita di tinîir worro, ey cèngni jày pî. 21Hû go un nit ây yiɗim dun gi, to tinîir worro ti yaanina go a kiita ba, ot dii ni gòyrra tolnji cen a ɗàm kpees Fay. 22Koo ji waana a gin wàa ya, kpàa got kpàa, ngam ot futɗe yèk mgbàngda wàa, ot tèe jày ge delu gi. 23Sey ot goosi nîir Hàm wàa Yeesu Kristu, ot yiɗinji ɗa a tîim worro kà yey gàana Kristu gi. Hû go tâa yèk mgbèngda Fay. 24Nit yey futke yèk mgbèngda wàa gi, tâarre a gin wàa, Fay ɗa tâarre a gin nit maan. Ot cèngni, ey tâarre a gin worro, ngam Jungci yey hîina gi.

will be added

X\