1 Miy mi tiròom ɗi ba yi? Mi nit yey tèem Yeesu ɗi ba yi? Mi rabu di Yeesu Nitcoorra worro ba yi? Ti tâa un tâage tèem mum a gin Nitcoorra ba yi? 2 To a nit ây kana aw raptim go kà nit yey tèem Yeesu ɗi ba, a gin wun mi nit yey tèem Yeesu ɗi. Ngam un tâage jàk ticèngsunum tèem mum a gin Nitcoorra. 3 Tèem mum kàlni jày gim goosi da nit ây yiigim gi. 4 Orri cenna, ha ot ngor jàk riirra ni jàk njoorra ba yi? 5 Orri cenna, ha ot at kin goosum yèk Fay ot gîtnji ni ey ba yi? Ngam kà yey mbirin a nit ây kana tèe daw Yeesu gi, ni kaa rra wàa di Nitcoorra, ni Piyèr ɗa. 6 Koo miy ni Barnaba orro cuk gbè, orri cenna ha ot woofa tèerra tèem ngam kpàarra tiriici ba yi? 7 Sooje hâ jingsi bèeb tumri ni hak wàa ya? Wun ge còk hèmna, ge rii jày nîige a hèmna maan ba ya? Hàm faat hâ ge faa naay, ge njoo mboom naay ba ya? 8 Mi yèerre yèk yey kà yèk nirri yi? Ti tâa yèk mgbèngda gàagi kà yey ba yi? 9 Ngam dii kètiya a yèk mgbèngda Muusa, gàa: Ta mu leknurra ti 'mûugum a mgbelyèy di gusi a fòorra tirri ba. Fay yèerre yèk yey a hak gusi gbè yi? 10 Ti yèe ngam hak worro ba yi? Takundi, ngam hak worro yèeye, dii kètiya kà yey. Ngam nit bata sey e bar ni dànda a jày ge kpàa a hèmna wàa gi, nit fòorra tirri ɗa sey e fòo ni dànda a jày ge kpàa woy wàa. 11 Ye tâa ot còge jàk Jungci, ge tâana jàk ɓèl to ot rip go jàk kparri a gin wun gi yi? 12 To a nit ây kana aw dii go ni mbinum kà yey a hak wun, orro got hòmi daw ba yi? Amma ot tèe ni mbinum yey ba, ot èfɗe tinîir worro a jày pî, ngam ta ot njang Yèk Kâwrra Kristu ba. 13 Un cèngni, nge nit ây tèege tèem a àay Fay aw kpàarre tiriit waw a àay Fay ba yi, ni nit ây tèege tèem gûurra jàk gurfum aw kpàarrarre woy waw a jày gûun gi ba yi? 14 Kà yey Nitcoorra gàa ɗa da nit ây sake Yèk Kàwrra, gesi aw kpàa a tèem maan jày gaw gûyni ni erra gi. 15 Amma miy mi haa tèerra kà yey ba, mi kèr ɗa yèk yey ha mi kpàa ot mbita kà yey ba. Hòmim della to mi wut go, ni nirri e iiw di jàk râanum mum kà jàk ɓa hû go gi. 16 A sakta Yèk Kâwrra jàk râanum cenim ba. Ngam tâami ni ndakcu a hak mum ha mi sak Yèk Kâwrra. 'Màari waamde, to mi sak go Yèk Kâwrra gi ba. 17 To mi tèerre go ni yiide tinîiri, bèeb loca mum diimi a tèem maan. Amma to mi tèerre go yiide tinîiri cenim ba, mi tèerre kà sàay gbè. 18 Ji tâagim bèeb loca tèem mum ya? Tâam a sakta Yèk Kâwrra kà jàk hîirra ɓa hû go, to mi woofa go mbita kà yey gàan gesi a hak nit sakta Yèk Kâwrra e mbir gi. 19 Ngam koo ye tâa miy mi tiròom ɗi a gin nit ây pî, mi ii hak mum sàay nit ây pî, ngam ha mi kpàa nit ây dèy a tîim waw. 20 Mi ire kà ni-Yude a gin ni-Yude ây, mi ire kà nit yèk mgbèngda a gin nit ây tâage ni yèk mgbèngda, ngam ha mi kpàa daw, koo ye tâa miy mi nit yèk mgbèngda ɗi ba. 21 Mi ire kà nit èca yèk mgbèngda a gin nit ây èege yèk mgbèngda, ngam ha mi kpàa daw. Amma mi tâa nit èca yèk mgbèngda Fay ba, mi dii ni yèk mgbèngda Kristu. 22 Mi ire kà nit dàngdiya a gin nit ây tâage dàngdiya, ngam ha mi kpàa daw. Mi ire koo nit jâ a gin nit ây pî, ngam koo kày ya mi saani daw da nit ây kana. 23 Mi tèerre jàk ây pî ngam Yèk Kâwrra, ngam ha mi ir nit 'mèmsum a yèk maan. 24 Un cèngni nge nit ây 'nòoge 'nòori ngam kpàarra jày, aw pî aw 'nòorre ba yi? Amma sey nirri kpolo sòrge gi ey getke kpàarra jàk hîiri. Ngam maan 'nòon, ha un kpàa jàk hîir maan. 25 Koo wun yiɗi go e hòmu 'nòorra 'nòori di nit kana, ey mòosirre hak wàa a jày pî. A nit ây gi aw mbitɗe kà yey ngam ha aw kpàa jàk hîir waw, tikangni hak yey ge lòo gi. Amma orro ot mbitɗe hûy ngam tikangni hak yey tâa ge lòo ba. 26 Ngam maan mi 'nòorre ɓa hû go ba, mi tâa kà nit luta yey lutke a hiski ba, 27 amma mi riisurre 'màari di is mum, mi leknu tèem yey yiɗim e tèe gi, ngam ta mi nit sakta yèk Fay da nit ây kana aw kpàam mi get ba.
