1 Ni-Korintu ây 6

1To nirri kpolo a tîim wun dii go ni yèk kiita a gin kor kana, kà ge 'maa yèk maan a ɗàm kpees nit ây tâa aw goosu di Fay ba ya? Ndika e 'maaw a gin nit goosum ây. 2Koo un cèngni, nit goosum ây gaw hiiti kparri ba yi? To un gun hiiti go kparri gi, un get hiitum yèk kaa ba yi? 3Un cèngni ɗa, orro got hiiti malayka ây ba yi, sakko yèk kparri gi yi? 4Hû go to kiita ây diinu go a yèk kparri, sey un ii daw da nit ây luusiya dàaga a kimjum, aw tâa nit hiitum wun. 5Mi yèefa dunde yèk yey, ngam ha lawsam e mòonu. Cen nirri tâage nit còycum koo kpolo a tîim wun, ge mbin raknjum yèk kana a tîim kor ây ba yi? 6Amma kor kana kor goosum 'maarre kiita di kor wàa, a ɗàm kpees nit ây tâa aw goosu di Fay ba. 7Takundi, un gbeeye orri, ngam kor goosum 'maawrre di kor goosum kana a kiita. Ndika un èf tinîiri, to nirri mbitnu go jàk maarra. Ndika un èf tinîiri, to nirri ngosunu go jày. 8Takundi, un tèerre tèem makta, un ngosirre jày koo di kor wun! 9Un cèngni, nge nit ây tèege tèem makta gaw kpàa lekta a wûun Fay ba. Ta un rûfsi hak wun ba! Koo nit ây mboysiri sapri ây, koo nit ây cooge mâri, koo nit ây iige njeenu, koo nit ây kûunjiri nihun ni nihun, nikin ni nikin, 10koo a oor ây, koo a nit ngèer ây, koo nit ây râmri daw mbàl, koo nit ây jàmri da nit ây kana, koo nit ây ngorgi jày, aw gaw kpàa lekta a wûun Fay ba. 11A nit ây kana a tîim wun aw mbiirirre nà mgban kà yey. Amma kòsòng un un dii kòliya, un dii ɓetkumya, un kpàa gòyrra ɗèm ni nîir Yeesu Kristu Nitcoorra, ni Jungci Fak worro. 12Orri dii ha mi mbir jày pî. Amma jày pî ti tâa delliya ba. Orri dii ha mi mbir jày pî, amma ta mi tâa sàay jàk maan ba. 13Tiriici dii ngam himni, himni ngaa ngam tiriici, amma Fay gbee ge gbeesifa ɗa pî. Isi ti tâa ngam iinum njeenu ba, amma ngam Nitcoorra, Nitcoorra ngaa ngam isi. 14Fay gûysuge di Nitcoorra gi, gû ge gûysina dorro ɗa ni mbinum wàa. 15Un cèngni nge is wun woy Kristu ɗi ba yi? Koo mi at jàk Kristu, mi hîiw di kin tikàm toonji yi? Ge tâa hû go ba sam! 16Un cèngni, nge nit yey 'mèmsi ni kin tikàm toonji gi, aw ire isi kpolo ba yi? Ngam defterre Fay gàaye: Aw ɗa cuk i gaw ir isi kpolo. 17Amma nit yey 'mèmsi ni Nitcoorra, aw tâa jungci kpolo. 18Woofan iirra njeenu! Jàk maarra kana pî mbire nirri gi, ti tâa a is wàa ba. Amma nit yey iige njeenu gi, mbire jàk maarra a is wàa. 19Un cèngni nge is wun tâage àay Jungci Delliya yey hîinu Fay gi ba yi? Un un tâasi jàk maan ni hak wun ba. 20Un dii sàasumya ni sàar àyrriya. Ngam maan 'misuwan di Fay ni is wun!

will be added

X\