1 Ni-Korintu ây 5

1Aw gàarre, yèk kûurra ni kin kana dii a tîim wun. Yèy kà yey cen koo a tîim nit ây èege yèk Fay ba, ha nirri e at kin too wàa gi. 2Amma un un 'misirre hak wun! Ndika un umi, un yuunufa di nit mbita jàk yey a tîim wun! 3Ngam miy mi cenda a tîim wun ni isi ba, amma jàk dànda mum tâanjirre ni un. Mi hiitu mgban di nit mbita jày kà yey, tâa mu gàa mi dii a tîim wun. 4Mi gàanurre ni nîir Yeesu Nitcoorra, ye kimjim ni un ni jàk dànda mum a mbinum Yeesu Nitcoorra worro gi, 5sey un hîiw di nit yey a kàn Seyɗan ngam is wàa e gbee, ha jungci wàa e saa a unji Nitcoorra! 6Râanum hak wun ti del ba. Un cèngni, nge njàngna càa fâasi mûta jày pî ba yi? 7Yuunifan njàngna yey tâage mgbantiya a tîim wun, ha un tâa mûta jàk fûuya. Amma takundi njàngna cennu ba, ye tâa Kristu tâage mgbâay Paska worro, aw gûuwe. 8Hû go rri go, dàan ot ii daprum naa ni njàngna mgbantiya tâage ni tèem makta, ni kperrem, amma ni tàat ɓetkumya tàat takundi, njàngna cen. 9Mi kèrfa dun nà mgban a ɗerrewol mum, ta un 'mèmsi ni nit ây iirge njeenu ba. 10Ye yèenim dun kà yey, mi dàn ta un 'mèmsi koo jâ ni nit iirra njeenu ây a kparri gi ba, koo ni nit ngèergum ngèer ây, koo ni nit ngorgum jàk ây, koo ni nit ây futke yèk mâri ba. To tâa go ngin kà yey, gesi ngin un yuu a kparri. 11Amma jàk yey gàamfa dun gi, nge to nirri yiɗi go aw 'naasu kor goosum, amma tâarre go nit iirranjeenu, koo nit ngèergum ngèeri, koo nit futa yèk mâri, koo tinjàmrum nit ây, koo nit râmrum mbàl, koo nit ngorgum jàk ây, ta un 'mèmsi ni ey ba, ta un riinji ni ey ɗa ba. 12- 13Ji tâagimda dim, gim @hiiti daw da nit ây tâa aw lek a tîim worro ba ya? Fay ey ge hiiti daw. Gesi un un hiiti daw da nit ây tâage a tîim wun ba yi? Yuunufan a tîim wun di nit makta gi!

will be added

X\