1 Ni-Korintu ây 4

1Hû go raptin dorro kà nit tèerra tèem Kristu, kà nit faarra jàk ta Fay tâage fûurriya gi. 2Jày kàmin a gin nit faarra jày gi, gesi e mòo tèem wàa mbâra. 3Miy mi dànde, jàk luusiya ɗi, nge un un hiitim go, koo kiita nit ây mòom go gi. Miy ɗa gim hiitisi hak mum ba. 4Ngam mi cèngni koo jâ a hak mum ba, amma yey ti lòni nge miy mi dii ɗèm ba. Nitcoorra tâage nit hiitum mum. 5Hû go ta un hiitu di nirri ni hâtnjum ba, ɗoko Nitcoorra e dàara gi. Ey lò ge lòni a kayang jày tâage fûurriya a kulpi, lò ge lòni ɗa jàk dànda a tinîir nit ây. Kà yey koo wuna kpàa ge kpàa ɓòlmum wàa a gin Fay. 6Un kor ta mum, ngam wun yèenim yèk ây gi a hak mum ni hak Apollo ɗa, ngam ha un èngni a gin worro jày yiɗi gàarra yèk yey: Ta nirri e hòm a jày tâage kètiya gi ba. Hû go ta koo wuna e 'misi hak wàa ngam nit kpolo, e luusu di nit kana ba. 7Wun gàagum dum, mu hòmi daw da nit ây kana ya? Ji tâagum dum, tâa ti tâa a gin Fay ngormu ba ya? Amma ye tâa mu ngore, ngam jâ 'misum hak wey mu gàa, mu ngor koo jâ ba ya? 8Un un ole, un dii ni bèebi. Un ire wûun ây, ti tâa ni orro ba. To un tâa go wûun ây, ndika orro ɗa ot tâa wûun ây ni un! 9Ngam mi dànde, Fay luusina dorro dot nit ây tèe dot Yeesu gi, iina u daarri kà nit ây kpàage kiita wurra, ot ire jàk raptum a kparri, a nis malayka ây ni nis nit ây ɗa. 10Orro ot rak ây ɗi yèk Kristu, amma un un nit còycum ây ɗi a gin wàa. Orro ot dii ni dàngda isi, amma un un dii ni kpèw kpèw. Dun aw 'misunurre, amma dorro aw luusinarre. 11Ha kòsòng orro ot nit fek ây ɗi, sòo ɓòynarre, ot èerre lurra, aw lutkinarre, àay cenna ba. 12Orro ot hâtɗe tèerra tèem ni kàn worro. Ye maasinan gi, ot mbârsi dawrre. Ye ɗàanan ɗàari gi, ot èfɗe tinîir worro. 13Ye yèenan yèk àyrriya, ot goosi dawrre ni yèk mbâra. Ot dii kà jàk ây ɓètfan a kparri lang. A gin nit ây pî ot dii kà jàk ây a bûuri ha kòsòng. 14Mi kèrfa dunde jàk ây gi, ti tâa ngam mi mòosunu lawsam ba, amma mi yèefa dunde kà hàm ta mum yiɗim dun gi. 15To nit kàlnjum ây ujinè ra diinu go a yèk Kristu, koo hû go un cen ni tooy ây dèy ba. Ngam miy tâage too wun kpolo a gin Kristu, ye saknim dun Yèk Kâwrra gi. 16Hû go mi waanurre, furrin dikri mum! 17Yòo maan mi tèefa dun Timote, nit tèerra tèem mbâra, ngorge yèk Nitcoorra a gin mum, mi yiɗuge kà hàm mum. Ey ɓa ge ɓaysunu yèk dikri mum a ot Yeesu Kristu, kà yey kàlnjim miy koo u hâ a gin kimjum nit ây. 18A nit ây kana aw 'misirra hak waw aw gàarre, gim haasifa dikta a gin wun ba. 19Amma di gim difa a gin wun yaale, to Nitcoorra yiɗi go gi. Hû go cè gim cèngni mbinum waw da nit ây 'misi hay, naa yèk waw gbè. 20Ngam wûun Fay ti lòt a yèerra yèy ba, amma a mbinum ɗi. 21Kà yiɗunu ya? Mi difa a gin wun ni tiluni yi, koo ni yiide fetkum tinîiri yi?

will be added

X\