1 Ni-Korintu ây 3

1Un kor ta mum, mi kpàanu yèerra kà nit ây tâage ni Jungci Fay ba, amma kà nit ây tâage ni dànda jàk kparri, kà hàm kaa ây a goosum di Kristu. 2Mi njoosunu mboom. Mi hîinu nàam ba, ngam gun kpàaw riirra ba. Ha kòsòng ɗa gun kpàaw riirra ba, 3ngam ha niyey un tâa kà nit kparri ây. Ye tâa ngèeri ni tilètnjum dii a tîim wun, naa un dii a kparri, un dikɗe ɗa kà nit kparri ây naa? 4Ngam nirri kpolo gàarre: Miy mi nit Pawlu ɗi. Nit kana ngaa gàarre: Miy mi nit Apollo ɗi. Kà yey un tâarre kà nit kparri ây ba yi? 5Wun tâage Apollo ya? Wun tâage Pawlu ya? Aw a nit tèerra tèem Fay ɗi, a gin nit ây raknu yèy, goosunu gi. Koo wuna tèerre kà yey hîiw Nitcoorra gi. 6Miy mi còge, Apollo njoosige, amma Fay 'misu di jàk còkta maan. 7Hû go koo nit còkta, koo nit njoosum aw get ba, sey Fay Tooy 'misum di jàk còkta gi. 8Nit còkta ni nit njoosum pî aw aw tâa kpolo, amma koo wuna kpàa ge kpàa bèeb loca tèem wàa. 9Ngam orro ot nit tèenjum ɗi ni Fay, un un hèmna Fay ɗi, un jàk jâarra wàa ɗi. 10A mbâr yey hîim Fay gi, mi tare bàanji kà nit yey mbinge jâarra. Nit kana jâarre a woy tata mum. Amma koo wuna sey e ii hakkilo kày ge jâa gi. 11Cen nirri ge kpàaw tata jàk jâarra kana ba, sey yey tâage tatiya gi, Yeesu Kristu gi. 12To nirri jâa go a tata maan ni kangeerri, koo ni sarrdi, koo ni gòok delliya, koo ni kpiiri, koo ni bàsi, koo ni sàmsi, 13tèem wàa koo di wuna lò ge lòt a unji kiita. Ngam ni ebi lò ge lòrri, ebi kà ge kàlni tèem wàa koo di wuna kày tâa gi. 14To tèem nit kana gòy go, ti ak ba gi, ey kpàa ge kpàa bèeb loca tèem wàa. 15To tèem nit kana ak go, bèeb tèem wàa gbee ge gbee. Amma ey ni hak wàa saa ge saa ni dakkèrr kà nirri saage a ebi. 16Un cèngni, un un àay Fay ɗi ba yi? Jungci Fay tâanjirre ni un ba yi? 17To nirri mboysi go àay Fay, Fay gbee ge gbeesu di nit maan, ngam àay Fay dii delliya. Un tâage àay maan. 18Ta koo wuna e rûfsi hak wàa ba. To nit kana a tîim wun dànde go, dii ni còycum a tâam kparri yey gi, sey e ir ray ngam ha e tâa nit còycumya takundi. 19Còycum kparri ray ɗi a ɗàm kpees Fay. Ngam gàa a defterre wàa: Mòorre da nit ây tâage còycumya a gâra waw. 20Gàa bak: Tooy Ɓèl cèngni jàk dànda nit ây tâage còycumya, jàk ɓa hû go ɗi. 21Kà yey ta nirri e râani hak wàa ngam nit kana ba. Ngam jàk ây pî woy wun ɗi, 22koo Pawlu, koo Apollo, koo Piyèr, koo kparri, koo gûyrra, koo wurra, koo jàk ây tâage niyey, koo jàk ây gaw dàara gi. A jàk ây gi pî woy wun ɗi, 23amma un un nit ta Kristu ɗi, Kristu ngaa Hàm Fay ɗi.

will be added

X\