1 Ni-Korintu ây 16

1E rri yey mi yèenurre a yèk kimjum seede ngam nit della ta Fay tâage a Yerusalem gi. Mbirin un ɗa kà yey gàami daw da nit kimjum ây a Galatiya. 2A unji màrra a asaweerre pî, sey koo wuna a tîim wun e ii seede yey ge kpàa hîirra gi, ngam ye gim difa gi, seede maan e tâa sàynjumya mgban. 3Ye gim kpètfa a gin wun, tèe gim tèeni ni ɗerrewol da nit ây catnu gi, ngam aw 'maa hîir wun a Yerusalem. 4To del go gi, miy ɗa di gim diknji ni aw. 5Mi hòmfa go a dees Makedoniya, di gim difa a gin wun. Ngam ye gim yew ɗà a dees Makedoniya. 6Mi yiɗi tâanjum ni un càa, mba ha cot ngisim e gbèe. Hû go kpàa gun kpàam ɗa ista a gin dikmi gi. 7Ngam a dikta wooy yey mi yiɗi mi rapnu a hòmda gbè ba, amma mi dànde tâanjum ni un unji càa, to Nitcoorra hîi go orri. 8Tâa gim tâa ay gi a Efesu ha daprum Pentikosta. 9Ngam nin ɓèl faarige a ɗàm kpees mum, ha mi tèe tèem mbâra, koo ye tâa a nit yiir ây aw dii dèy gi. 10To Timote kpètfa go, ngoruwan mbâra, ta e tâa ni tolnji a tîim wun ba. Ngam ey ɗa tèerre tèem Nitcoorra kà miy. 11Ta koo wuna e luusu ba, amma isuwan mbâra ha e ira a gin mum. Ngam mi waawrre e kpèrra ni kor goosum ây. 12Apollo kor mum, mi waawe dey dèy, ha e difa a gin wun ni kor ây, amma ey yiɗi e difa kòsòng gi ba. To kpàa go orri a ɗàm kpeesi càa, di ge difa. 13Amma un, mûyin, gòyin mbâra a goosum, mòon tinîiri kà nihun ây, tâan kpèw! 14Jày tèenu lang, tèen ni yiide! 15Un kor ta mum, un cèngni Estefanas ni nit àay rra wàa aw a nit goosum màrra ây ɗi a dees Akaya, aw lekni hak waw a tèerra tèem mgbaanjum da nit della ta Fay. 16Mi waanurre, ha un rak daw tuy da nit ây gi, ni nit ây kana pî hârge tèerra tèem ni aw. 17Estefanas, ni Fortinatu, ni Akayikus ye kpèrran a gin mum, tinîir mum kâwimde, ngam dikta waw ay gi hîim jày âygimda a gin wun gi. 18Aw wuysinim tinîir mum ni tinîir wun ɗa. Hû go coon daw da nit ây kà yey gi! 19A nit kimjum ây tâage a dees Asiya aw kèpfa dunde. Akila ni Piriskilla 'mèmsa ni nit ây kimje a àay waw gi, aw kèpfa dunde dèy a nîir Nitcoorra. 20A kor ây pî tâage ay gi aw kèpfa dunde. Kèpnjin a tîim wun ni tikapni kor goosum ây! 21E rri yey miy Pawlu kèrgifa kèpri yey ni kàn mum. 22To nirri ti yiɗu go di Nitcoorra ba, sey e tâa maasumya. Amen, Nitcoorra worro, dàara! 23Mbâr Yeesu Nitcoorra e tâanji ni un! 24Yiide mum tâanjirre ni un pî a nîir Yeesu Kristu.

will be added

X\