1 Ni-Korintu ây 15

1Un kor ta mum, mi ɓaysunurre Yèk Kâwrra yey saknim dun nà, ngotnu gi. Un gòyrre a yèk maan. 2Ni erra gun saa, to un mòorre go jày pî kà yey saknim dun gi. To naa hû go ba, goosum wun tâa ɓa hû go. 3E rri yey mi saknu nà jày ngormi gi, tâage jàk màrra: Kristu wurre ngam jàk maarra worro, kà yey gàa defterre Fay. 4Aw siptuge. A unji taanti ey gûysige, kà yey gàa defterre Fay. 5Ey lòrrurrage di Piyèr, a dat maan lòtɗa dawge da lor ta wàa ra sàm cuk. 6Lòtɗa dawge da kor ây a unji kpolo, ji gaw hòm temèrre kèrèw. Mûsa waw aw gûyrre ha niyey, amma a nit ây kana a tîim waw aw wurre. 7A dat maan lòrrurrage di Yakuba, lòtɗa dawge da nit tèerra ta wàa pî. 8A gbèeni lòta wàa a gin nit ây, lòrrimdage dim ɗa mu gàa mi hàm kpàarra a cot jòsti ɗi. 9Mi hòm daw luurra da nit tèerra ta wàa pî, mi get aw înim nit tèerra wàa ba, ngam mi ɗàa daw nà ɗàari da nit ta Fay kimje gi. 10Amma ni mbâr Fay tâami tâam yey gi. Mbâr wàa a hak mum ti ir ɓa hû go ba. Mi hòm daw tèerra tèem da nit tèerra ta Kristu pî, ti tâa miy ni kpèw kpèw mum ba, amma mbâr Fay tâanji ni miy. 11Hû go yèk Kristu, koo an go a gin mum koo a gin waw, e rri yey jày sakna, goosunu gi. 12Ye tâa ot sakɗe yèk Kristu gûysige a wurra gi, kà gàan a nit ây kana a tîim wun, gûysum a wurra cen gi ba ya? 13To gûysum a wurra cen go ngin, ɗo Kristu ɗa ti gûysi ngin ba. 14Amma to Kristu ti gûysi go ngin ba, sakta yèk worro tâa ge tâa ngin ɓa hû go, goosum wun ɗa tâa ge tâa ngin ɓa hû go. 15Kpàa gaw kpàana ngin kà yey orro ot nit seedum yèk rèeng ây ɗi a gin Fay, ngam ot seedige ot sage a hak Fay, ey gûysuge di Kristu. To yèk yey tâa go ngin takundi, nge gûysum a wurra cen gi, ngin Fay ti gûysu di Kristu ba. 16To a nit ây wutke gi gaw gûysi go ngin ba, ɗo Kristu ɗa ti gûysi ngin ba. 17Amma to Kristu ti gûysi go ngin ba, goosum wun tâa ge tâa ngin ɓa hû go, tâa gun tâa ngin bak ni jàk maarra wun cen yaafum ha kòsòng. 18To Kristu ti gûysi go ngin ba, a nit ây goosu wutke gi, aw ɗa gbee gaw gbee ngin. 19To jàk dànda worro a gin Kristu tâa go ngin ngam gûyrra a kparri gi gbè, orro hò got hòm daw ngin da nit ây pî a tâam fòon. 20Amma takundi, Kristu gûysige a wurra. Ey tâage nit gûysum màrra a tîim nit ây wutke gi. 21Ngam kà yey wurra dàara a kparri ni nirri kpolo gi, hû go ɗa gûysum a wurra dàarage ni nirri kpolo. 22Kày wurrin a nit ây pî ni Adam, hû go ɗa aw pî kpàa gaw kpàasi gûyrra ni Kristu. 23Koo wuna kpàa ge kpàa gûysum a futnji wàa: Màrra Kristu gûysige, a dat maan a nit ta wàa gû gaw gûysi a ye ge dàara gi. 24A dat maan tâa ge tâa unji gbèeni, ye ge gbeesi Kristu tâam wûun pî, ni mbinum pî, ni kpèw kpèw pî a deesi, ha e hîisu wûun di Fay Tooy Ɓèl. 25Sey Kristu e wûuni ha Fay e ii nit yiir ây pî a gin nafta nak wàa. 26Jàk yiirra yey gbeese u gbèeni gi, e tâage wurra. 27Ngam dii kètiya a defterre Fay: Jày pî ûunumya ɗi a nak wàa. Amma ye gàa «jày pî ûunumya ɗi gi», ti sak a hak Fay ba, ngam ey ûunurra jày pî di Kristu. 28Ye ge tâa jày pî ûunumya a gin Kristu gi, ey ɗa ûu ge ûuni hak wàa a gin Fay ûunurra jày pî, ngam ha Fay e wûuni a jày pî. 29To tâa go ngin takundi, nge nit ây wutke gi gaw gûysi ba, kà ge tâa yèk nit ây ngorge baptisma ngam nit ây wutke gi ya? Ngam jâ gaw ngor baptisma kà yey gi, to gûysum a wurra cen go ba ya? 30Ngam jâ orro ɗa leknina hak worro koo ningàa a gin tâa wurra ya? 31Un kor ta mum, takundi kà yey râanim yèk wun a gin Yeesu Kristu Nitcoorra worro gi, unji pî mi kèlle wucu! 32Ye tâa mu gàa ni yèk nirri katnjim ni jàk nûr ây a Efesu, ji gim kpàarra ya? To a nit ây wutke gi gaw gûysi go ba gi, sey ot mbir kà yey gàa yèk kana: Dàan ot rii ot njoo, ngam ni ndamji wu got wurri. 33Ta un rûfsi hak wun ba, ngam «tâanjum ni nit makta ây mbo ge mboysi dikri mbâra». 34Mûyin a dànda wun, tâan kà yey gese gi, ta un tèe jàk maarra ba! Ngam a nit ây kana aw cèngni Fay ba. Mi yèerre yèk yey ngam lawsam wun. 35Nit kana gu ge gun: Amma a nit ây wutke gi, kà gaw gûysi ya? Ni is hâ gaw kpàasi gûyrra ya? 36Mu ray ɗi! Jày còkmu a deesi, siptum gi, ge tâa jàk gûyrra ba, sey to ɗàa go wucu. 37Jàk yey còkmu a deesi, siptum gi, yòoci ɗi gbè, koo yòot tirri koo yòot jàk kana, ti tâa fur jàk yey ge ɓuk gi ba. 38Fay ey hîi ge hîiw fur jàk maan kà yey yiɗe gi, koo di yòot hâ pî fur wàa. 39Jooci pî ti tâa kpolo ba. Joot nirri dii 'nang ni joot jàk tinak ây, ni joot jooy ây, ni joot cîit ây ɗa. 40A jàk ây a faktiturum aw dii ni mbangsum waw, a jàk ây a deesi ɗa aw dii ni mbangsum waw. Amma della jàk ây a faktiturum dii 'nang ni della jàk ây a deesi. 41Della unji dii 'nang ni della corri, ni della tibiskum ây. Della tibiskum ây ɗa aw 'nangjirre a tîim waw. 42Kà yey tâa ɗa yèk gûysum nit ây a wurra. Is yey siptin gi raarriya ɗi. Is yey ge gûysi gi cen raarra ɗi. 43Is yey siptin gi jàk njengji ɗi, dàngdiya. Is yey ge gûysi gi jàk 'mita ɗi, kpèw. 44Is yey siptin gi is nirri ɗi. Is yey ge gûysi gi is jungci ɗi. To is nirri dii go, is jungci dii ɗa. 45Gàa a defterre Fay: Adam nit màrra ire is nirri beengiya. Amma Adam daarri kà gàarra Kristu ire Jungci hîirra gûysum a wurra. 46Nit jungci ti dàara màrra ba, amma nit isi. A dat maan furra nit jungci. 47Nit màrra ane a deesi, dii mbangsumya ni râktâm deesi. Nit cukti ana a faktiturum. 48Kà yey tâa nit yey ange a deesi gi, hû go tâan ɗa nit dees ây. Kà yey tâa nit yey anga a faktiturum gi, hû go tâan ɗa nit faktiturum ây. 49Kà yey rèenjina ni nit yey ange a deesi gi, hû go got rèenji ɗa ni nit yey anga a faktiturum. 50Un kor ta mum, e rri yey jày gàam gi: Is yey tâage ni jooci ni njîim gi, ge kpàa jàk koyrra a wûun Fay ba. Jàk raarra ɗa ge kpàa koyrra jày a jàk cen raarra ba. 51E rri yey mi lònunurre yèk fûurriya: Ti tâa orro pî got wut ba, amma is worro pî bu ge bunji. 52Ngam a ye ge ur ti uta woy gbèeni, a nit ây wutke gi gû gaw gûysi yaale kà jèmda nisi, ha aw tâa ni is cen raarra. Orro ɗa is worro bu ge bunji. 53Sey jàk raarra gi e mgbap jày tâa ge raa ba, sey jàk yey ge wut gi e mgbap jàk yey tâa ge wut ba. 54Ye ge tâa jàk raarra ge mgbap jày tâa ge raa ba gi, ni jàk wuta ɗa ge mgbap jày tâa ge wut ba gi, yèk defterre Fay gbèe ge gbèe ye gàa: Sunda hòmuge di wurra. Wurra gbeeye. 55Wurra, u hâ tâa sunum wey ya? Wurra, u hâ tâa titapni wey ya? 56Titapni wurra, jàk maarra tâage. Mbinum jàk maarra, yèk mgbèngda tâage. 57Amma ot gàawrre mbew di Fay, ye tâa ey hîigina sunda ni Yeesu Kristu Nitcoorra worro. 58Ngam maan un kor ta mum yiɗim dun gi, gòyin kpèw, ta un yûu ba, hârin dèy a tèerra tèem Nitcoorra koo ningàa, ye tâa un cèngni, nge loca tèem wun a gin Nitcoorra ge tâa jàk ɓa hû go ba.

will be added

X\