1 Ni-Korintu ây 13

1To nirri yèerre go ni yèk nit ây pî koo ni yèk malayka ây, amma yiide cenu ba, tâa ge tâa kà titefki dûuge gi, koo kà tindàam gbala. 2To nirri kpàa go lònum yèk Fay, to cèngni go yèk ây fûuge gi pî, to dii go ni cèngnum jàk ây pî, koo dii go ni goosum ha e hèeni gopri ây, amma yiide cenu ba, tâa ge tâa jàk ɓa hû go. 3To nirri hîi go jàk ta wàa pî da nit èca ây, koo hîi go is wàa aw aksi gi, amma yiide cenu ba, ge mbiruwa jàk mbâra koo jâ ba. 4Amma to nirri dii go ni yiide, ey èfɗe tinîiri, tèerre mbâri, ge ngèr ngèeri ba, ge râani ba, ge 'misi hay ba. 5To nirri dii go ni yiide, ge tèe tèem lawsam ba, ge kàm jàk hak wàa ba, ge an ngòlòm ba, ge mòosi yèk maarra ba, 6ge kâwsi tinîir wàa a tèem makta ba, amma rakɗe kâwum a yèk takundi. 7To nirri dii go ni yiide, ey èfɗe tinîiri a jày pî, gòyrre ni goosum di Fay a jày pî, dii@ni jàk dànda a jày pî, ûunirre hak wàa a jày pî. 8Yiide ti lòorre ba sam ha tâam timgbàri. Amma koo yèk lònum ây, koo yèerra ni yèk ni-riiy ây 'nang 'nang, koo cèngnum jày pî lòo ge lòo. 9Ngam orro ot dii ni cèngnum càa càa, ot lònirre yèk Fay càa càa gbè. 10Amma ye ge dàara jàk getiya, jày tâage càa càa gi, gbee ge gbee. 11A ye tâami nà hàm, mi yèerre kà hàm, mi dànde kà hàm, mi getnjirre jày kà hàm. Amma ye tâami nit ɓèl, mi woofage yèk tâam hàm. 12Kòsòng ot raptirre jày kà raptum a darrugal bir bir, amma a ɗàm kpeesi ra got rabi nisi ni nisi. Kòsòng mi cèngnirre jày càa càa, amma a ɗàm kpeesi cè gim cèngni jày pî mbâriya kà yey Fay cèngnim gi. 13Goosum, ni jàk dànda, ni yiide aw dii tâarre koo ningàa. Amma ji hòmge 'mita pî, yiide.

will be added

X\