1 Ni-Korintu ây 11

1Furrin tèerra tèem mum, kà yey furri miy tèerra tèem Kristu! 2Mi ɓòlmunurre, ngam un ɓaysimde koo ningàa pî, un futɗe yèk mgbèngda yey hîim dun gi. 3Amma mi yiɗi un cèngni, nge hak nihun pî Kristu ɗi, hak nikin @ngaanihun ɗi, hak Kristu ɗa Fay ɗi. 4Koo wuna nihun to waarre go Fay, koo lònirre yèk Fay, kupti go hak wàa, mòosirre lawsam di hak wàa gi. 5Amma koo wuna nikin to waarre go Fay, koo lònirre yèk Fay, jàk kuptum cen a hak wàa gi, mòosirre lawsam di hak wàa, tâa mu gàa kin hak cayrriya ɗi. 6To nikin kupti go hak wàa ba, sey e sàrru di gimsi hak wàa ɗa. Amma to tâaw go lawsam sàta koo cayrra gimsi hak wàa gi, sey e kupti hak wàa. 7Di nihun ti gesu ha e kupti hak wàa ba, ngam ey rèenji ni Fay, ni 'mita Fay. Amma nikin, 'mita wàa ana a gin maa wàa. 8Ngam nihun ti ana a gin nikin ba, amma nikin ana a gin nihun. 9Nihun ɗa ti tâa mbangsumya ngam nikin ba, amma nikin tâage mbangsumya ngam nihun. 10Ngam maan gesu di nikin, e kupti hak wàa ha e kàlni mbinum maa wàa gi yèk malayka ây. 11Nihun koo nikin aw kpolo waw aw get a ɗàm kpees Nitcoorra ba, sey aw ɗa cuk aw 'mèmsi go. 12Kà yey nikin ana a gin nihun gi, hû go ɗa nihun e kpàa a gin nikin, amma aw pî aw ana a gin Fay. 13Dànin un ni hak wun, to del go ha nikin e waa Fay, jàk kuptum cen a hak wàa gi! 14Naa a jàk ây mbangse Fay a deesi aw kàlninarre, jàk lawsam ɗi di nihun, to woo go gimsi hak wàa yâktiya gi naa? 15Amma to nikin woo go gimsi hak wàa yâktiya gi, jàk mbâra ɗi, ngam kpàa gimsi hay yâktiya kà jàk kuptum a gin wàa. 16To nirri yiɗi go hàanjum yèk yey, sey e cèngni, koo orro koo nit ta Fay kimje gi, ot cen ni hàar kana kà yey ba. 17E rri yey mi yèenurre a jàk ây gi, gim kpàanu ɓòlmum ba. Ngam kimjum wun ti tâa mbâra ba, amma jàk mboysum ɗi. 18Màrra mi rage, a ye kimjunu gi, ɗòlnjum dii a tîim wun. Mi ngore jàk ây kana 'nang 'nang a yèk maan. 19Yèk futa ot ây 'nang 'nang sey e tâa a tîim wun, ngam ha nit ây gòyge mbâra aw lòrri. 20Un kimjirre go a gin tikpolo, ti tâa takundi ngam riirra tiriit Nitcoorra ba. 21Ngam un riirre go tiriit wun, koo wuna ɗaa riirra woy wàa. Nit kana fey àyurre, nit kana ngaa mbàl râmurre. 22Un cen ni àay, ha un rii un njoo a farra ba yi? Un un luusirre kimjum nit ta Fay yi? Koo un mòosi dawrre lawsam da nit èca ây yi? Ji gim gàanu ya? Gim ɓòlmunu yi? Oow, a jàk yey gi gim kpàanu ɓòlmum ba! 23Jàk yey kàlnjim dun nà, a gin Nitcoorra kpàama. Yeesu Nitcoorra a tuma yey mòowan ni gâra gi, arre tàarri, 24de gàa mbew di Fay, de cèenje de gàa: Yey tâage is mum, dii hîirriya ngam wun. Mbirin kà yey ngam un ɓaysinimi! 25Hû go ɗa de arre kop njooni a dat riirra tiriici, de gàa: Kop yey tâage jàk wasta fûuya, ge gbèe ni njîim mum gi. Koo ningàa njoonu ya, mbirin kà yey ngam un ɓaysinimi. 26Ngam koo ningàa riinu tàat yey, njoonu a kop yey ya, un cèngninirre yèk wurra Nitcoorra, ha mgbàr yey ge ira gi. 27Ngam maan to nirri riirre go tàarri gi, koo njoorre go a kop Nitcoorra kày tâa ti gesi ba gi, mbire jàk maarra a is Nitcoorra ni njîim wàa ɗa. 28Amma sey nirri e dànji ɗà a tinîir wàa, ha e rii tàarri gi, e njoo a kop tinjooni gi. 29To nirri riirre go, njoorre go cen ɓaysum yèk is Nitcoorra, kiita riiye njooye a hak wàa. 30Ngam maan a nit ây dèy a tîim wun aw dii ni is dàngdiya, aw dii àyciya. A nit ây kana ɗa aw wurre. 31To orro ot hiitisirre go hak worro, got kpàa kiita ba. 32Amma ye tâa Nitcoorra hiitina gi, ey ûunina ɗa, ngam ta kiita e kpàana ni kparri ba. 33Hû go un kor ta mum, un kimjirre go riirra tiriit Nitcoorra, sey un waanji a tîim wun. 34To fey àyu go di nirri, sey e rii a àay wàa, ngam ta kimjum wun e 'maara dun kiita ba. Ye gim difa a gin wun, kà gim kàlnu ngirra yèk kana ɗa.

will be added

X\