1 Ni-Korintu ây 10

1Un kor ta mum, mi yiɗi mi ɓaysunu yèk wosom ta worro. Aw pî aw dikɗe nà ni Muusa u fur titurum Tooy Ɓèl, aw pî aw yewe nà a sòo ɓèl. 2Aw pî aw kpàaye baptisma, a ye 'mèmsin ni Muusa a titurum ni a sòo ɓèl gi. 3Aw pî aw riiye tiriit Jungci kpolo, 4mûsa waw pî aw njooye njoor Jungci kpolo, ngam aw njoo sòo a kpata Jungci futki daw gi, kpata maan Kristu ɗi. 5Amma dikri nit ây dèy a tîim waw ti delu di Fay ba, de ɓàri daw a tîim nûri. 6A jàk ây gi aw ire jàk kàlnum a gin worro, ngam ta ot lek a gayam makta kà nit ây maan ba. 7Ta un tâa nit coorra mâr ây kà yey tâan a nit ây kana a tîim waw ba, kà yey tâa kètiya a defterre Fay, gàa: A nit ây aw tâa ton ngam aw rii aw njoo, a dat maan de anin aw yûu yûma. 8Ta ot ii njeenu kà nit ây kana a tîim waw iige njeenu ba, ha yaan wurrin a nit ây ujinè ra cuk sàm taan a unji kpolo gi. 9Ta ot rûfu di Nitcoorra kà nit ây kana a tîim waw rûfku nà ba, ha a jòoy ây de numrin daw de wurrin. 10Ta un hûungi kà nit ây kana a tîim waw hûungin nà ba, ha malayka wurra de ɓàari daw. 11A jàk ây maan kpèrri dawge, ha e tâa jàk lònum da nit ây kana. Dii kètiya ngam e mgbèngna dot nit ây hèerra dot gbèerra kparri gi. 12Ngam maan nit yey dànge gòyrre gi, sey e faasi hak wàa ta e yaa ba. 13Un kpàa jàk rûfta kana ba, sey woy yey nirri ge mbin èfta tinîiri gi. Fay Fak mbâri ɗi, ge woonu jàk rûfta e hòmu di kpèw kpèw wun ba, amma to un lek go a jàk rûfta, ey ge mbangsunu ot saarra, ha un kpàa èfta tinîiri a jàk maan. 14Hû go nit yiɗum ta mum, faasin hak wun a coorra mâri! 15Mi yèenurre, mu gàa nit ây tâage ni hakkilo. Dànin ni hak wun a jàk yey yèemi gi! 16Tinjooni mbâr yey ngotna ni gàarra mbew di Fay, ti tâa 'mèmsum ni njîim Kristu ba yi? Tàat yey cèena gi, ti tâa 'mèmsum ni is Kristu ba yi? 17Tàat maan kpolo ɗi. Hû go orro, koo ye tâa ot mûuye, ot is kpolo ɗi, ngam orro pî ot 'mèmsirre a tàat kpolo. 18Raptin daw da ni-Israyel ây a tâam waw! Naa a nit ây riige joot yey gûun a àay Fay gi, aw 'mèmsi ni gin gûurra jàk gurfum maan naa? 19Ɗo ji yiɗim gàarra ya? Joot yey gûun a mâri gi, jàk ɓèl ɗi yi? Koo mâri gi jàk ɓèl ɗi yi? 20Oow! Amma jày gûun a nit ây cooge mâri gi, aw gûurre da tindòom makta ây, ti tâa di Fay ba. Mi yiɗi un 'mèmsi ni tindòom makta ây ba. 21Gun kpàaw njoorra ni kop Nitcoorra, ni kop tindòom ây ɗa cuk ba. Gun kpàaw riirra tiriit Nitcoorra, ni tiriit tindòom ây ɗa cuk ba. 22Koo ot mbitɗe hûy ha Nitcoorra e an ngèeri yi? Mba ot dànde, got hòmu dey kpèw kpèw yi? 23Orri dii ha ot mbir jày pî. Amma jày pî ti tâa delliya ba. Orri dii ha ot mbir jày pî, amma ti tâa jày pî ge mgbaanjina a goosum ba. 24Koo wuna ta e kàm jày ge delu di hak wàa ba, amma sey e kàm jày ge delu di nit kana. 25Riin jooci pî sàanu a luumu gi, ta un ngûmji yèk maan ba ngam yèk dànjum tinîiri. 26Ngam deesi ni jày mûuge a farra pî, woy Fay Tooy Ɓèl ɗi. 27To nit èca yèk Fay 'naasunu go riirra tiriici, un yiɗi go dikta gi, digin. Riin koo jâ iin a ɗàm kpees wun, ta un ngûmji ba yèk dànjum tinîiri. 28Amma to nirri gàanu go «yey joot mâri ɗi», ta un rii ba yèk nit yey kàlgunu gi, ni yèk dànjum tinîiri ɗa. 29Ti tâa yèk dànjum tinîir wey gàami ba, amma dànjum tinîir nit kana. Ngam jâ gim woo yèk dànjum tinîir nit kana e hiitim tâam tiròom mum ya? 30To mi riirre go ni gàarra mbew di Fay, ngam jâ gaw yèem a jàk yey riimi ni gàarra mbew di Fay gi ya? 31Hû go mbirin jày pî ngam 'misum nîir Fay, koo un riirre go, koo un njoorre go, koo un tèerre go tèem. 32Tâan un ii daw timgbòlnji da ni-Yude ây, koo da yòot ni-riiy ây kana, koo da nit ta Fay kimje gi ba. 33Mbirin kà mum, ye tâa mi mbire jày pî ngam e del daw da nit ây pî. Mi kàmde jày ge delu di hak mum ba, amma jày ge deli daw da nit ây dèy, ngam ha aw saa.

will be added

X\