1 Ni-Korintu ây 1

1Miy mi Pawlu, mi nit yey 'naasim Fay, ha mi tâa nit Yeesu Kristu tèerriya kà yey yiɗi Fay gi, 'mèmsa ni Sostenes kor worro, 2ot kèpfa dunde, dun nit ta Fay kimje a Korintu, un nit ây tâage ɓetkumya a gin Yeesu Kristu, ye 'naasunu ha un tâa nit della ta wàa, 'mèmsa ni nit ây tâage koo u hâ 'naase nîir Yeesu Kristu Nitcoorra waw, ni Nitcoorra worro gi. 3Nge Fay Too worro, ni Yeesu Kristu Nitcoorra aw hîinu mbâr waw ni tâam mbâri! 4Mi gàarre mbew di Fay ngam wun koo ningàa, a yèk mbâr wàa kpàanu a gin Yeesu Kristu gi. 5Ngam a gin Yeesu Kristu un kpàa bèebi pî, koo a yèk hâ, koo a cèngnum jàk hâ. 6Kà yey yèk seedamku Kristu gòyrre kpèw a tîim wun, 7cen hîir Jungci Delliya tâa un kpàa ba gi, ye tâa un waarre lòta Yeesu Kristu Nitcoorra worro. 8Ey gò ge gòynunu ɗa ha mgbàr gbèeni, gun tâa ni yèk kana a hak wun ba a unji wàa ge ii kiita gi. 9Fay gòyrre a yèk wàa, ey 'naasunuge ha un 'mèmsi kpolo ni Hàm wàa, Yeesu Kristu Nitcoorra worro. 10Amma un kor ta mum, mi mgbèngnurre ni nîir Yeesu Kristu Nitcoorra worro, ha un yèe yèk kpolo, ta ɗòlnjum e tâa a tîim wun ba, amma un 'mèmsi a dànda kpolo, ni raknjum a jày kpolo. 11Un kor ta mum, a nit Kolowe ây aw kàlimge, tilètnjum dii a tîim wun. 12Jày gàami kà yey, ngam koo wuna a tîim wun yèerre 'nang. Nit yey gàarre «miy mi nit Pawlu ɗi», nit kana gàarre «miy mi nit Apollo ɗi», nit kana gàarre «miy mi nit Piyèr ɗi», nit kana ɗa gàarre «miy mi nit Kristu ɗi». 13Mba Kristu ɗòlnji hak wàa cuk yi? Koo aw gbalim dim dim di Pawlu a minjum kpiiri ngam wun yi? Koo un kpàa baptisma ni nîir mum yi? 14Mi gàarre mbew di Fay, ngam mi ii baptisma koo di wuna a tîim wun ba, sey di Kirispu ni Gayu, 15ngam ta nirri kpolo e gàa, kpàa baptisma ni nîir mum ba. 16Amma mi ɓaysi ɗa, mi iiwrra baptisma di Estefanas ni nit àay rra wàa. Hòm go di yey, mi cèngni to mi iiwrra go baptisma di nit kana ba. 17Kristu ti tèem iirra baptisma ba, amma tèem ha mi sak Yèk Kâwrra, ti tâa ni còycum a yèk nirri ba, ngam ta wurra Kristu a minjum kpiiri e tâa ɓa hû go ba. 18Ngam sakta yèk wurra Kristu a minjum kpiiri, kà ray tâa daw da nit ây gbeegi gi. Amma a gin worro dot nit ây saage gi, yèk maan mbinum Fay ɗi. 19Ngam gàa a defterre Fay: Gbee gim gbeesifa còycum nit ây còyci gi, kpi gim kpiwfa cèngnum jàk nit ây cèngni jày gi. 20U hâ tâa ni còycum ya? U hâ tâa ni cèngnum yèk defterre ya? U hâ tâa nit mbinda hàanjum yèy a tîim yòot nit ây tâarra yey ya? Fay inuge di còycum kparri gi e tâa ray. 21Ye tâa kparri ni còycum wàa ti cèngni còycum Fay ba, Fay yiɗige e saani daw da nit ây goosu gi, ni ray a sakta yèy. 22A ni-Yude ây aw gunde lònum jàk kayeefi, a ni-Girèk ây ngaa aw kàmde còycum. 23Amma orro ot sakɗe yèk Kristu gbaluwan a minjum kpiiri gi. Da ni-Yude ây tâa daw yèk timgbòlnji, da nit ây èege yèk Fay tâa daw yèk ray, 24amma da nit ây tâage 'naasumya, koo ni-Yude ây ɗi, koo yòot ni-riiy ây kana ɗi, Kristu tâage mbinum Fay ni còycum Fay ngam waw. 25Ngam rak Fay hòme còycum da còycum nit ây, nûurra Fay hòme kpèw kpèw di kpèw kpèw nirri. 26Un kor ta mum, raptuwan di hak wun a ye 'naasunu Fay gi, un cen ni nit còycum ây dèy a tîim wun kà nit ây kana ba, un cen ni nit mbinum ây dèy ba, un cen ni tiròom ây dèy ba. 27Amma Fay carre rak kparri, ha e mòosini daw lawsam da nit còycum ây, carre nûurra kparri, ha e mòosini daw lawsam da nit kpèw kpèw ây. 28Fay carre jày tâa aw 'misurre a kparri ba, ni jày wâskin a nit ây, ni jày tâage ɓa hû go, ha e inu di jày 'misin a nit ây e tâa jàk ɓa hû go, 29ngam koo wuna ta e 'misi hak wàa a ɗàm kpees Fay ba. 30Amma ey 'mèmsunu ni Yeesu Kristu, iiwe e tâa còycum worro. Yeesu gi hîigina gòyrra ɗèm, ni tâarra nit della ta wàa di Fay, ni sàasum a jàk maarra, 31ha e tâa kà yey gàa defterre Fay: Nit yey râani hak wàa gi, sey e râani ngam Nitcoorra.

will be added

X\