Mateo 1

1Yesu Kristo si nye Fia David tɔgbuiyɔvi, eye David hã nye Abraham ƒe dzidzimevi la, ƒe dzidzimexexlẽfiae nye esi: 2Abraham dzi Isak, eye Isak dzi Yakob si dzi Yuda kple nɔviawo. 3Yuda kple srɔ̃a Tamar dzi Perez kple Zerax, eye Perez dzi Xezron. Xezron dzi Aram, 4eye eya dzi Aminadab; Aminadab dzi Naxeson, eye Naxeson dzi Salmon. 5Salmon kple Raxab dzi Boaz, eye Boaz kple Rut dzi Obed. Obed dzi Isai, 6eye Isai dzi David, fia la. Tso Fia David dzi va se ɖe aboyomeyiyi le Babilonia dzi la dzidzime lae nye esi: David kple nyɔnu si nye Uriya srɔ̃ hafi la, wodzi Salomo. 7Salomo dzi Rexabeam, eye eya dzi Abiya. Abiya hã dzi Asa, 8eye Asa dzi Yosafat. Yosafat dzi Yoram, eye Yoram dzi Uziya. 9Uziya dzi Yotam, eye Yotam dzi Axaz. Axaz dzi Xizkiya 10eye Xizkiya dzi Manase. Manase dzi Amon si dzi Yosiya, 11eye Yosiya dzi Yexonya kple nɔviawo le Babilonia-boyomenɔɣi. 12Le aboyomenɔnɔ le Babilonia vɔ megbe la, Yexonya dzi Sealtiel, eye Sealtiel dzi Zerubabel. 13Zerubabel dzi Abihud, eye eya dzi Elyakim. Elyakim dzi Azur, eye 14Azur dzi Zadok, ame si dzi Axim. Axim dzi Elihud, eye 15eya hã dzi Eleazar. Eleazar dzi Matan, eye eya dzi Yakob. 16Yakob dzi Yosef. Eya srɔ̃e nye Maria si dzi Yesu si woyɔna be Kristo la. 17Ale tso Abraham dzi va se ɖe David dzi le dzidzime wuiene, eye tso David dzi va se ɖe esime woyi aboyo me le Babilonia la hã le dzidzime wuiene; nenemake tso kpɔkplɔ yi Babilonia ŋɔli va se ɖe Kristo la dzi hã le dzidzime wuiene. 18Ale Yesu Kristo ƒe dzidzi lee nye esi: Yosef bia Maria ta be yeaɖe. Ke do ŋgɔ na srɔ̃ɖeɖea la, Maria fɔ fu tso Gbɔgbɔ Kɔkɔe la me. 19Ale srɔ̃a Yosef si nye ame dzɔdzɔe, eye medi be yeado ŋukpee o la ɖo ta me be yeaɖe asi le eŋu dzaa ko. 20Esime wòle nu sia ŋuti bum la, Aƒetɔ ƒe dɔla ɖe eɖokui fiae le drɔ̃eƒe gblɔ nɛ be: “Yosef, David vi, mègavɔ̃ srɔ̃wò Maria kpɔkplɔ o, elabe fu si wòfɔ la, Gbɔgbɔ Kɔkɔe la mee wòtso. 21Ele ŋutsuvi dzi ge, eye nàna ŋkɔe be Yesu, elabe eyae aɖe eƒe dukɔa tso woƒe nu vɔ̃wo me.” 22Nu siawo katã va me bene nya si Aƒetɔ la gblɔ to eƒe gbeƒãɖela la dzi la nava me. Gbedeasi siae nye: 23“Kpɔ ɖa, ɖetugbi, si menya ŋutsu o la, le fu fɔ ge, eye wòadzi ŋutsuvi. Woana ŋkɔe be Imanuel” (si gɔmee nye Mawu li kpli mí). 24Ale esi Yosef nyɔ la, ewɔ nu si mawudɔla la gblɔ nɛ la dzi, eye wòɖe Maria, kplɔe va eɖokui gbɔe. 25Ke mede asi eŋu kpɔ o, va se ɖe esime wòdzi vi. Edzi ŋutsuvi, eye Yosef na ŋkɔe be Yesu.


Copyrighted Material
Learn More

will be added

X\