1 Aneen :nyi Paawulō nyoo āpāyiisyēēchinii Iriin. Kiilēwēnān :Yēēsu Kiriistō ālēku kāāyooytooyiinteenyiin akuuyooytoon ātoorēt piich choo kiikulēwēn :Iriin kuuran inyeentee kusōwu man kutuup keey nkōō kiyoo mārwēēch :Iriin. 2 Ā-iraa pāyiisyōōni āātingʼēy man kilē ānyōōruuy sopoon nyēpō ākōy. /Kitoomō /kēētoowu ngʼwēny, kimwooru :Iriin nyoo mātingʼēy ngʼuurnan kilē kōōnēēch sopoon nyēpō ākōy. 3 Paani ki-itu :pērēētuu, kungʼoongʼwēēch :Iriin nyoo lēē Sāruuniintēēnyoon ngʼālyoonteenyiin akulēwēnān a-amtaata lōkōōyichu kāroomēēn. 4 Āsiruun inyēēn, Tiitō, nyoo ichō laakweenyuun nyēpō man, āmu kutiirēē keey :tōkōl Iriin. Kuupēēruurin :Paapa Iriin ākōō Sāruuniintēēnyoon Yēēsu Kiriistō akukōōnin kaalya. 5 Kiyoo kii-iraa soomētoochiin kōōroo Kirēētē ku kyoomārēy kilē siiroota pāyiisyōōn choo kiitoomō /keewaanta. Aku kyoomārēy kilē siilēwēnō kāāntōōy chēpō kaaniisa mu kōōroo Kirēētē kilēē paani kyoomwooruun. 6 Makaat kāāntōōyiin nyēpō kaaniisa ku chiich nyoo mātingʼēy tisya aku chiich nyoo tingʼēy cheepyooso ākoongʼo. Mārēy :laakōōchiich ku laakōōy choo /kuurānēy amātingʼēy ātēpuut choo āwēēsēēn. 7 Kāāntōōyiin ku mārēy ku chiich nyoo mātingʼēy tisya, āmu ryoonchinii pāyiisyoo Iriin. Māmārēy kulāsēy keey ntā ku chiich nyoo lēē kipsiirmōōyoon. Māmārēy mpō ku chiich nyoo lēē kipōōkityoon ntā ku chiich nyoo chāmēy ōriir, aku mā chiich nyoo chāmēy :rōōpiyō. 8 Makaat ku chiich nyoo tookēy too aku nyoo chāmēy ku-irēy ngʼal choo kāroomēēn. Mārēy ku chiich nyoo nkēt kiyoo irēy, nyoo chuulaat oortineechiich, nyoo tiliil akuriipēy keey. 9 Makaat kuriipēy koonēētuut chēpō man kilēē wōloo /kiikuuneetita sikuukiil piich walak nkōō koonēētuutēchoochēē akuupkoongʼēy piich choo kārtooy ngʼaleechoochēē. 10 Āmwooraa kilēē nyoonēē, āmu mii :piich chaa chaangʼ choo toosānchoot. Piich :pichu choo pōloopōlootēy kipaat, akuupootootēy piich mētēwēy. Choo irootēy ngʼaleechu ku choo pkootēy kilē ākōy /kēēmur chiich sikucham :Iriin. 11 Kara koongʼ pichoochēē, āmu mii kuupootootēy kēēstoon tōkōl kuunēētootēy tukun choo māyāmēy /keeneet. Nēētiisyēy :koonēēt choo lēē choochēē kipaat akipō rōōpiyō. 12 Kiimwooru mpō :ōōrkooyaanteengʼwaangʼ ākoongʼo kilē, "Ngʼuur ākōy :piich chēpō Kirēētē aku kimakēētōōy, sārātoon aku kimootiin." 13 Man :ngʼālyoontoonoonēē. Kunyuun, ipkoongʼ pichoochēē sikutuup ngʼālyoontoo Iriin nkōō oor nyaa karaam 14 amatuup siiyēēn chēpō Yāwuutik ntā ku ngʼātuut chēpō piich kipaat. Kiikuchuunnyo :pichu nkōō wōloo mii :ngʼālyoon nyēpō man. 15 Tiliil :kir aka tōkōl nkōō wōloo mii piich choo tiliilēēn. Aku choo mā tiliilō amēērānēy, ku moomii :kir nyoo tiliil nkōō wōloo mii :choochēē. Man, kiikwoongʼkwoongʼiisyō :mētēwēyiikwaak nyoo mēēnkēt kir nyaa karaam ākōō nyaa ra. 16 Irēy keey :pichoochēē kilē nkēt Iriin, aku ngʼuutuuy :ātēpuutēkwaak kilē mēēnkēt. Piich :pichoochēē choo kiikuroochiituuy aku āwēēsō nyoo mēērookēē mpō ku-ir kir aka tōkōl nyaa karaam.
